San Juan 16
16
1‘Ñeñthpaꞌ tharroꞌmarña oꞌ ateth notwas allochñapaꞌ amach alla ello sepoerrerro. 2Tharroꞌmar esempopaꞌ xhapchaꞌ allempoch waporeꞌtas judioneshaꞌ poꞌprawoth. Poꞌñoxh xhapchaꞌ allempo eseshaꞌpaꞌ ñatoꞌ oꞌch moetsaset xhach otenapoetañ ñetpaꞌ allotheꞌ sherbeñetña Yompor. 3Ñeñthpaꞌ tharroꞌmarchaꞌ ateth phaset ñetpaꞌ ama eseshayeꞌ eñotenaye Apa amaꞌt napaꞌ ama eñotenneto. 4Añexhnopaꞌ oꞌ notwas allochñapaꞌ ñerraꞌm esempoch xhap, sapaꞌ seyerpoerrnanach ñeñth ateth notaseꞌth.
Attho Parets Poekamkëñ ñach yokthapeꞌchatyeseꞌ eꞌñe kowen
‘Awañmoꞌcha añexhnopaꞌ ama notaseꞌthe tharroꞌmar allempotheñpaꞌ eꞌñe parrokma alloꞌtseney. 5Na theꞌpaꞌ oꞌch awerren alloꞌtsen ñeñth nellsenseꞌ. Saña amaꞌt poesheñarrothesapaꞌ amaña saꞌphthoꞌtenno, errachña neserr. 6Theꞌña ñeñth ateth notenes saña seyoxhropaꞌ xhaña atarr sellkëna. 7Theꞌpaꞌ añ notenes ñeñth eꞌñe poꞌñoxh. Sokoppaꞌ aña nanak poktetsa napaꞌ oꞌch awerren. Tharroꞌmar ñerraꞌm amach neserro amatheꞌ errothenoth waponasoña Yompor Poekamkëñ ñeñthchaꞌ sokthapeꞌchaterreꞌ kowen. Tharraña ñerraꞌm neserrchaꞌ napaꞌ añchaꞌ nemñawerrnas Yompor Poekamkëñ ñeñthchaꞌ sokthapeꞌchaterreꞌ kowen seyoxhro. 8Ñerraꞌm esempoch wapa Yompor Poekamkëñ acheñeneshaꞌña arr patsropaꞌ ñachña xhapatawetña poeyoxhreto atthoch eñochet ñet poꞌñoxhepaꞌt eñallet poꞌchñaret. Ñamha añchaꞌña xhapatanet poeyoxhreto ñeñth eꞌñe pokteꞌ entyen Yompor. Ñamha añchaꞌña xhapatanet poeyoxhreto atthoch ñetpaꞌ eñoteretchaꞌ poꞌñoxhpaꞌ koñcheñtsach amñarethterret ñeñth ama nameꞌñenayo na ñeñthen Yompor Poechemeren. 9Yompor Poekamkëñpaꞌ eñotaterranchaꞌ acheñeneshaꞌ poꞌñoxh ñetpaꞌ ama pokteyeꞌ entenaneto Yompor tharroꞌmar ama ameꞌñenneto na ñeñthen Yompor Poechemeren. 10Ñamha ñach eñotaterrawet ñeñth eꞌñe pokteꞌ entyen Yompor tharroꞌmar napaꞌ amach alloꞌtsenarano sesho. Napaꞌ oꞌch awerren Apoesho amach alla senterrneꞌthe. 11Paretsña Poekamkëñpaꞌ ñachña eñotaterrawet poꞌñoxhpaꞌ koñcheñtsach amñarethterret ñeñth ama ameꞌñetso tharroꞌmar oneñeth ñeñth paꞌmhchaꞌtarether pen shonteꞌ acheñeneshaꞌ arr patsro, ñokoppaꞌ eꞌñe poꞌñoxh anwareth amñarethterrach koñcheñtso.
12‘Shontemeñ ñeñthchaꞌ notaseñ tharraña theꞌ sapaꞌ amatheꞌ errothenoth xhaponaso seyoxhro. 13Tharraña ñerraꞌm esempoch waponasa Parets Poekamkëñ, ñeñthchaꞌña señotaterreꞌ ñeñth eꞌñe poꞌñoxh Yompor poꞌñoñ tharroꞌmar ñapaꞌ ñachkaꞌye señotateneꞌ ñeñth eꞌñe poꞌñoxh Yompor poꞌñoñ ñeñth ama shekëñtsoyaye. Ñapaꞌ amakaꞌye eꞌñe ñotha eñeno. Añkaꞌyeña eñen ñeñth ateth eꞌmoen Partsesho. Ñapaꞌ añchaꞌ serrpareꞌtatas ñeñthchaꞌ ateth perra tsapathoneth. 14Ñapaꞌ nachkaꞌye kowentaterreꞌ; eꞌñe eñotennan ñeñth ateth nepena na, ñapaꞌ ñeñthchaꞌña eñotatyerres. 15Ora allowen ñeñth ateth pena Apapaꞌ napaꞌxhoꞌña eꞌñe ateth nepena namha. Ñeñthoꞌmarña napaꞌ notenes eñotenan ñeñth ateth nepena na, ñapaꞌ ñeñthchaꞌ señotatyerreꞌña samha.
Ñeñthña sellkëñapaꞌ poenaserrach soksheña
16Jesúsñapaꞌ ateth oterraneterr:
—Theꞌpaꞌ mameshamha oꞌwañchaꞌ alloꞌna sentnenen tharroꞌmar napaꞌ oꞌch awerren Apoesho. Tharraña sapaꞌ eꞌñe mameshapaꞌ oꞌch alla yentannerra.
17Poeyochreshaꞌñapaꞌ ateth otannaꞌtyeset:
—¿Errothentheꞌña añ ñeñthoꞌmar ateth oteney, mameshamhapaꞌ oꞌwañoꞌch alloꞌna yentneñ tharraña mameshapaꞌ awoꞌch alla yentannerra? ¿Errothentheꞌña añ ñeñthoꞌmar ñapaꞌ ateth oteney, ñapaꞌ awoꞌch awerr Pomporesho?
18Alla otannaꞌtyenet:
—¿Esoꞌmartheꞌña ateth oteney, mameshamhapaꞌ oꞌwañchaꞌ alloꞌna yentneñ? Amakaꞌyeña yeñoteñe estheꞌña oteney.
19Jesúsña eñotanet ñetpaꞌ xho moeneñetañ oꞌch aꞌphthoꞌchet. Ñañapaꞌ otanet:
—¿Ñeñtheꞌtña sotannena ñeñth ateth notenes, oꞌ mameshamha oꞌwañchaꞌ alloꞌna sentnenen, tharraña mameshapaꞌ oꞌch alla yentannerra? 20Poꞌñoxhkaꞌye oꞌch notas: Sapaꞌ sellkëñothpaꞌ seyawerrach. Acheñeneshaꞌña arr patsro ñeñth ama ameꞌñetso ñetñapaꞌ xhach atarr koshet. Sapaꞌ sellkërrach tharraña sellkëña sapaꞌ poenaserrnasach soksheña. 21Ñeñthpaꞌ oꞌch netmaꞌntatasa ñerraꞌmrratheꞌ koyaneshaꞌ allempo xheññaña allempoch emareꞌten, xhach lleka tharroꞌmar oꞌ xhapoña allempoch atsotenana poechoyoretholl. Tharraña allempochña eñalletatwepaꞌ oꞌch alla atarr kosherra oꞌch poeserranña attho atarr llekach poeꞌmaretholl, elloñapaꞌ atarrchaꞌ kosherra tharroꞌmar oꞌ eñalletatwan poeꞌmaretholl arr patsro.
22Jesúsña alla oterranerr poeyochreshaꞌ:
—Theꞌña sapaꞌ nanak llekëñtsoꞌtsenes, tharraña elloñapaꞌ oꞌch alla yentannerra. Allempoña sapaꞌ oꞌch alla atarr soksherra seyoxhro. Ñeñthña soksheñapaꞌ amaꞌt eꞌñe poesheñarra amach errothenoth poerratamperrseto.
23‘Allempopaꞌ amach sepallteno oꞌch alla es saꞌphthoꞌterrnerr. Eꞌñe poꞌñoxh theꞌpaꞌ oꞌch notas: Ñerraꞌm es senamoeñ Apa eꞌñe na nesoꞌchño eꞌñe seyemteñothen na ñañapaꞌ apaschaꞌ ñeñth senamoeñ. 24Sa themeꞌttsenpaꞌ ama es senamoeno eꞌñe seyemteñothen na eꞌñe nesoꞌchño. Theꞌña ñerraꞌm senampaꞌ sagaphchaꞌ allochñapaꞌ oꞌch soksha eꞌñe poktakma.
Attho Jesucristo aꞌmchechatwerran allowen ñeñth eꞌmoñeꞌteneꞌ Yompor arr patsro
25‘Ñeñth allpon neserrpareꞌtatyesaseꞌth ñeñthpaꞌ eꞌñe tomaꞌnteñtsoxhno notyesaseꞌth. Tharraña xhapchaꞌ esempo allempopaꞌ amach alla neserrpareꞌtaterrserro tomaꞌnteñtso. Allempopaꞌ añchaꞌ neserrpareꞌtatas Apakop ñeñthpaꞌ amach tomaꞌnteñtsoyaye, allochñapaꞌ eꞌñech señotwe. 26Allempopaꞌ senamoeñchaꞌ Apa eꞌñe seyemteñothen na eꞌñe nesoꞌchño. Allempopaꞌ amach pallteno oꞌch nemaꞌyochampensa Apoesho. 27Apañapaꞌ atarrchaꞌ morrentensa attho sapaꞌ semorrentenna, eꞌñe seyemtenna attho napaꞌ Apoeshoth nowapa. 28Poꞌñoxh napaꞌ Apoeshoth nowapa, oꞌ nexhap añe patsro. Elloñapaꞌ oꞌch alla nesaꞌnerr añ pats, oꞌch alla awerren Apoesho.
29Poeyochreshaꞌñapaꞌ ateth ochet:
—Theꞌñapaꞌ ama tomaꞌnteñtsoyeꞌ peñeno ñeñthoꞌmarña yapaꞌ eꞌñech yeñotwe. 30Theꞌpaꞌ yeñoteneph phapaꞌ ñeñtheph eñotweneꞌ ora allowen esokmañen. Ñeñthoꞌmarña yapaꞌ amakaꞌye pallteno oꞌch alla yaꞌphthoꞌterrperr poꞌpoñoneth. Tharroꞌmar theꞌpaꞌ yeñoteneph phapaꞌ Partseshoth pewapa.
31Jesúsñapaꞌ ateth oterraneterr:
—Sapaꞌ thayaꞌtña oꞌ sameꞌñaꞌna. 32Theꞌpaꞌ oꞌ eꞌñe xhapmoch sa amaꞌt poesheñaꞌttsospaꞌ oꞌ xhaponasañ xhach sematrraꞌtyesa allemeñ. Xhach sawanomyesa allchaꞌ semnaꞌyes sa. Nañapaꞌ saꞌypoꞌñaꞌwanmoenchaꞌ. Tharraña napaꞌ ama eꞌñe naptheyaye, epanña Apa. 33Ora allowen añexhnopaꞌ oꞌ eꞌñe notwas allochñapaꞌ eꞌñe seyemteñothen napaꞌ xhokmach sokshena seyoxhro. Poꞌñoxh añ patsropaꞌ xhokmach semoeroxhtena. Tharraña eꞌñe seyoxhro sapaꞌ xhokmoepaꞌchña sokshena tharroꞌmar napaꞌ oꞌ naꞌmchechatwe allowen ñeñth eꞌmoñeꞌteneꞌ Yompor añe patsroth.
Currently Selected:
San Juan 16: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.