San Juan 14
14
Jesúspaꞌ ña thoñetets alloch yexherr Yomporesho
1Jesúspaꞌ alla oterraneterr:
—Seyoxhropaꞌ amach xha sellkatsto. Attho seyemteña Yompor napaꞌxhoꞌña xhoña seyemterrna. 2Nompor paꞌnetsro all poeꞌntaño allpaꞌ shonteꞌ pokoll allchaꞌ seyxhaꞌwerra. Ñerraꞌm ama attheñepaꞌ napaꞌ amatheꞌ notasñe. Ñeñthoꞌmarña napaꞌ oꞌch awerren atthoch naññoꞌtwerrnas allchaꞌ seyxhaꞌwerra. 3Ñerraꞌm oꞌch awerren napaꞌ naññoꞌtwerrnaschaꞌ allchaꞌ seyxhaꞌwerra. Ellochña nowerrerrpaꞌ allempochña eꞌñe nawerrsaꞌ nesho allochñapaꞌ alloꞌtseneychaꞌ eꞌñe parro. 4Sapaꞌ eꞌñe señoteñ allchaꞌ neserr ñamha eꞌñe señoteñ atthoch sexherr samha all.
5Tomásñapaꞌ ateth och:
—Ayochreshathe, yapaꞌ amakaꞌye yeñotenpe errachña peserr. Errothenothwachkaꞌye yeñochtheꞌ atthoch yexherr yamha.
6Jesúsñapaꞌ ateth och:
—Napaꞌ na thoñetets ñeñthen alloch sexherr Yomporesho, napaꞌ na ñeñthen soteneꞌ ñeñth eꞌñe poꞌñoxh Yompor poꞌñoñ, napaꞌ na ñeñthen alloch eꞌñe sokrrena. Amach eseshaꞌ xherrtso Yomporesho ñerraꞌm ama nanom ameꞌñerreto. 7Ñerraꞌm oꞌ señoterrnoñ na, Nomporeꞌnatheꞌña señoterreñ. Thayotheñña eꞌñe poꞌñoxhpaꞌ oꞌch señoter tharroꞌmar theꞌpaꞌ oꞌ senter.
8Felipeñapaꞌ ateth och:
—Partseshachaꞌ pegatey ñeñth Apa, yapaꞌ oꞌ ñeñthamha yepallta oꞌch yeñoch.
9Jesúsñapaꞌ ateth och:
—Felipe, awathotheñ napaꞌ alloꞌtseney parro. Phañapaꞌ ¿amaꞌt peñotenno? Ñeñth poentaren napaꞌ Apaꞌnakaꞌyeña oꞌ enterret. Esoꞌmareꞌtña photenen oꞌch negataph Apa. 10Phapaꞌ amaꞌtña phameꞌñenno napaꞌ eꞌñe neparrokmaten epan Apa, Apapaꞌxhoꞌña eꞌñe parrokmatenna. Ñeñth ateth notenespaꞌ ama nothayeꞌ ateth notenso. Apaña ñeñth neparrokmaten, ñapaꞌ eꞌñe etsotatennan ñeñth ateth nephaꞌyen. 11Sameꞌñaꞌna ñeñth notenes, napaꞌ eꞌñe neparrokmaten epan Apa, Apapaꞌxhoꞌña eꞌñe parrokmatenna. Amaꞌt napaꞌ ama ameꞌñaꞌpoyeꞌ sentenno tharraña attho poꞌñoxh norrtatyeññañ Nompor poꞌpartsoña amaꞌt ñeñthapaꞌ sameꞌñyañakaꞌye. 12Poꞌñoxhkaꞌye oꞌch notas, ñerraꞌm eseshaꞌ nameꞌñerraya ñetpaꞌxhoꞌña elloch atarr kowen orrtatyerret ñeñth ateth norrtatyen theꞌ. Tharroꞌmar na theꞌpaꞌ oꞌch awerren Apoesho. 13Ñerraꞌm eschaꞌ senamoen eꞌñe na nesoꞌchño eꞌñe seyemteñothen na, napaꞌ eꞌñech ateth nepennas. Atthochña na ñeñthen Yompor Poechemerenpaꞌ nekowentateññañchaꞌ Apa. 14Ñerraꞌm es senamoen eꞌñe nesoꞌchño eꞌñe seyemteñothen na, napaꞌ eꞌñech ateth nepennas.
Attho Jesúspaꞌ otnerranet oꞌch moeñwerranet Parets Poekamkëñ
15‘Ñerraꞌm sa poꞌñoxh semorrentennatheꞌpaꞌ oꞌch sameꞌñerrnana neñoñ ñeñth ateth notenes. 16Napaꞌ nenamonaschaꞌ Apa ñapaꞌ apaschaꞌ poꞌpsheñeñ ñeñthchaꞌ sokthapeꞌchaterreꞌ ñeñthchaꞌña sechorrerraya errponañowen. 17Ñeñthña Yompor Poekamkëñ ñeñthchaꞌña señotaterreꞌ ñeñth eꞌñe poꞌñoxh Yompor pokthaphña. Ñeñthña ama ameꞌñetso arr patsropaꞌ ñetpaꞌ amach errothenoth chorrerranetoña Yompor Poekamkëñ tharroꞌmar ñetpaꞌ ama enteñeto ñamha amach eñoteñeto. Tharraña sapaꞌ oꞌ señoter tharroꞌmar ñapaꞌ alloꞌtsenes parro epas allchaꞌ chorrerrsa. 18Napaꞌ amach xha newokchapotatnerrso. Ellochña alla nowerrerr sesho. 19Oꞌ mameshamerra palltenmeñ ñeñthña ama ameꞌñetso arr patsro ñetñapaꞌ amach eseshayeꞌ nenterraye, tharraña sapaꞌ xhokmach senterren. Tharroꞌmar napaꞌ korretsana, ñeñthoꞌmarña sapaꞌxhoꞌña korretsasach. 20Allempoch chorrerrsa Yompor Poekamkëñ allempochña señoter napaꞌ eꞌñe poꞌñoxh neparrokmaten epan Apa, sañapaꞌ separrokmaterrnach, nañapaꞌ neparrokmatennasach. 21Ñerraꞌm eseshaꞌ eꞌmhñoterreꞌ neñoñ ñamha eꞌñech ateth perret ñeñth ateth notenanet ñetñapaꞌ ñeñthet eꞌñe poꞌñoxh nemorrentenaya. Ñeñthña nemorrentenaya napaꞌ ñetñapaꞌ Apach atarr morrentenawet. Napaꞌxhoꞌña atarr nemorrentenanet, nañapaꞌ neñotaterranetchaꞌ eꞌñe poꞌñoxh ñeñth ateth nepena na.
22Allempoña poꞌpsheñeñ Judas ñeñth ama añeyaye Iscariote, ñañapaꞌ ateth och:
—Partseshachaꞌ, yapaꞌ ¿esoꞌmareꞌtchaꞌña theꞌpaꞌ oꞌch peñotatey ya ñeñth ateth pepena amachña añeyeꞌña peñotato ñeñth ama ameꞌñetso arr patsro?
23Jesúsñapaꞌ ateth oterraneterr:
—Ñerraꞌm eseshaꞌch nemorrentaya na eꞌñechña ateth perret ñeñth ateth notenanet. Apañapaꞌ atarrchaꞌ morrentenanet. Ñeshetoñapaꞌ yexhapchaꞌ atthoch yeyxherra ñet poeyoxhreto. 24Ñeñthoꞌmarña ñerraꞌm eseshaꞌ ama nemorrentayo amach ateth perreto ñeñth notenanet. Añ ñoñets ñeñth ateth seꞌmoennan ñeñthpaꞌ ama noyaye neñoñ, ñeñthpaꞌ Apoña poꞌñoñ ñeñth nellsenseneꞌ.
25‘Añmapaꞌ tharroꞌmar ateth notenes thayepaꞌtñapaꞌ alloꞌtsenmeñen na arr eꞌñe sesho. 26Tharraña Parets Poekamkëñ ñeñthchaꞌ sokthapeꞌchaterreꞌ, Apapaꞌ moeñerrnaschaꞌ eꞌñe na nesoꞌchño eꞌñe seyemteñothen na. Ñapaꞌ ñeñthchaꞌ señotaterreꞌña seyoxhro ora allowen ñeñth xhokma neyxhatenes theꞌ. Ñamha ñeñthchaꞌ seyerpaterraya allowen ñeñth ateth notyesaseꞌth.
27‘Nokshateña nenaꞌnerrnaschaꞌ alloch eꞌñe soksherra seyoxhro, napaꞌ xhochña atarr nokshaterres seyoxhro. Ñeñth ateth nokshatenes na seyoxhro ñeñthpaꞌ ama attheyaye ñerraꞌmrratheꞌ añ patsoꞌmar kosheñets. Ñeñthoꞌmarña seyoxhropaꞌ amach xha sellkaꞌpeno amaꞌt mamesha, amach xha es semhchaꞌteno. 28Theꞌpaꞌ oꞌ seꞌmwe ateth oꞌ notwas, na oꞌch awerren, ellochña alla nowerrerr sesho. Ñerraꞌm poꞌñoxh semorrentennañ oꞌtheꞌ sokshañ tharroꞌmar napaꞌ oꞌch awerren Apoesho. Tharroꞌmar ñapaꞌ nanak awamenkatheshaꞌ, ello metanenen na. 29Theꞌpaꞌ amaꞌt ama etsotenaꞌ, napaꞌ oꞌ notwas, allochñapaꞌ ñerraꞌm esempoch etsoterra, sañapaꞌ sameꞌñerach.
30‘Theꞌ eꞌñe parroꞌtseneypaꞌ oꞌwañchaꞌ alloꞌna neñosnen shonteꞌ tharroꞌmar oꞌ wapmocha oneñeth ñeñth paꞌmhchaꞌtarether pen acheñeneshaꞌ arr patsro. Tharraña amaꞌt oꞌ wapañpaꞌ eꞌñe ñothapaꞌ amach erroth phosno. 31Napaꞌ añchaꞌña ateth nepha ñeñth ateth otenen Apa. Atthochña acheñeneshaꞌ arr patsropaꞌ eñochetchaꞌ na poꞌñoxhpaꞌ eꞌñe nemorrenteña Apa. Theꞌpaꞌ sathomxhaꞌt oꞌch awey arroth.
Currently Selected:
San Juan 14: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.