YouVersion Logo
Search Icon

San Juan 7

7
Amaꞌt ñeñth paꞌmoꞌnasheñneshaꞌ pen Jesúspaꞌ ñetpaꞌ ama eseshayeꞌ ameꞌñenayo
1Allempoña Jesúspaꞌ alla chopeñeꞌchyen eꞌñe alla Galileoꞌmar. Ama moeno oꞌch chopeñeꞌchen ñamha all Judeoꞌmar tharroꞌmar judioneshaꞌpaꞌ xha oꞌpateñet oꞌch moetset. 2Allempopaꞌ oꞌ xherrmocherr allempoch kosherrerr judioneshaꞌ; ñeñthchaꞌ kosherreterr añ paꞌsoꞌcheñ Manatpoetsopoꞌ, ñeñth ateth yexhenet ñet. 3Allempoña Jesúspaꞌ ateth och paꞌmoꞌnasheñneshaꞌ:
—Theꞌpaꞌ orrerreph arroth, awerreph alla Judeo allochñapaꞌ peyochreneshaxhno ñeñth alloꞌtsaꞌyen oꞌch phorrtatwerranet ñamet pepartsoña ñeñth ateth pephaꞌyena theꞌ arrma. 4Ñewa, ñerraꞌm yemneñ oꞌch yorrta allowenakoppaꞌ amaꞌt poesheñarrotheyapaꞌ amachña aꞌnawa es yephaꞌyeno. Ñerraꞌm poꞌñoxh phorrtatyen pepartsoña arrpaꞌ phorrtachñakaꞌye ñamha allowen acheñeneshakop añ patsro.
5Amaꞌt paꞌmoꞌnasheñneshaꞌpaꞌxhoꞌña tharroꞌmar ateth ochet ñetpaꞌxhoꞌña amakaꞌye ameꞌñeñeto. 6Jesúsñapaꞌ ateth otanet:
—Allempo ñeñth poktetsa nokop oꞌch norrta allowenakoppaꞌ amakaꞌye eꞌñeyeꞌ xhenaꞌ. Tharraña sokoppaꞌ eꞌñekaꞌye pokteꞌ xhokmakaꞌye eñall. 7Tharroꞌmar acheñeneshaꞌña añ patsropaꞌ amachkaꞌye errothenoth eꞌmoñeꞌtasoña sa, tharraña napaꞌ xhokma eꞌmoñeꞌtyennet tharroꞌmar napaꞌ añkaꞌye neñotatyenanet ñeñth ateth phatseꞌtyenet ñeñth ama pokteyaye. 8Sapaꞌ orras sokshapretenaꞌ. Napaꞌ eꞌñe thayekmapaꞌ amachkaꞌye neto koshapretatsa. Tharroꞌmar nokoppaꞌ ama eꞌñeyeꞌ xhenaꞌ allempoch eꞌñe poktaꞌwona.
9Ateth otwanetpaꞌ ñapaꞌ alla aꞌpa mameꞌ Galileo.
Allempo Jesús koshapretenaꞌ ñeñth otenet Manatpoetsopoꞌ
10Allempoña paꞌmoꞌnasheñexhnopaꞌ ñetñapaꞌ awanmoet koshapretatset. Oꞌña tama oꞌchetpaꞌ awoꞌ ñamha, tharraña ñapaꞌ ama orrtenaneto, aꞌnawa kothaꞌnenanet chentaꞌ. 11Judioneshaꞌña all koshenetpaꞌ ñetñapaꞌ eꞌneñet ateth otyenet:
—Taꞌmkaꞌye ¿erroꞌtsentheꞌña Jesús?
12Allña acheñeneshaꞌpaꞌ shonteꞌ eñosyenet ñokop. Patantaꞌtetspaꞌ ateth otyenet: “Ñapaꞌ eꞌñe kowen acheñer”; poꞌpotantañexhnopaꞌ ateth otyenet: “Amakaꞌye kowenayaye, atthakaꞌye shekareꞌtyenan acheñeneshaꞌ.”
13Ñetpaꞌ atarr mechaꞌteñet judioneshaꞌ ñeñthoꞌmarña aꞌnawa ateth otannaꞌtyenet.
14Oꞌña patmaꞌnma attho koshenet Jesúsñapaꞌ beꞌthosos Parets paꞌpakllo, yexhatosanet all. 15Allñapaꞌ epayeꞌ kowanrrorech judioneshaꞌ. Ñetñapaꞌ ateth otyeset:
—Taꞌ, errothentheꞌkaꞌyeña añ, amaꞌt ama ayxhatarethe kellekpaꞌ atarrepaꞌt es eñotyen.
16Jesúsñapaꞌ otanet:
—Ñeñth attho neyxhatyenes ñeñthpaꞌ amakaꞌye noyaye nokthaphña, ñeñthpaꞌ Yomporoña pokthaphña ñeñth nellsenseneꞌ. 17Ñerraꞌm eseshaꞌña moeneꞌ oꞌch ateth pet ñeñth moenen Yompor ñetñapaꞌ eñochetchaꞌ neyxhateñpaꞌ Yomporo amakaꞌye nothayeꞌ neñeno. 18Ñerraꞌm eseshaꞌ eꞌñe ñothotha eñenpaꞌ ñetñapaꞌ añach eꞌnenet oꞌch kowentateññañ acheñeneshaꞌ eꞌñe ñokop. Añña ñerraꞌm eseshaꞌ eꞌneneꞌ oꞌch kowentatenan ñeñth llesenseneꞌ ñapaꞌ ñeñthña eñetsña ñoñtso eꞌñe poꞌñoxh ama shekëñtsoyaye.
19‘Amaꞌt apasoña Moisés ñoñets ñeñth ateth anareth. Tharraña amaꞌt apaseñ, sañapaꞌ amaꞌt eꞌñe poesheñarrothesapaꞌ ama sephowenoña ñeñth ateth oten añ ñoñets, ñeñthepñapaꞌ esoꞌmareꞌtña theꞌpaꞌ semneñña oꞌch semtsan.
20Acheñeneshaꞌñapaꞌ ateth otereterr:
—Phapaꞌ xhatheꞌ chorrenpha oneñeth. Amarramcheꞌ eseshaꞌ phoꞌpatenayeña oꞌch moetsapet.
21Jesúsñapaꞌ alla oterraneterr:
—Napaꞌ amaꞌt parrocha norrtatonas nepartsoña añ yethro allempo yamesen saña allempopaꞌ atarr sekwanrroretnoñ tharraña sañapaꞌ ama pokteyeꞌ senteñe. 22Moiséspaꞌ apaꞌnmas ñeñthchaꞌ seyxhaꞌ atthoch setsorrannena. Ñewa, poꞌñoxh ñeñthpaꞌ ama ñanom Moisésoyeꞌ sapaye, ñeñthpaꞌ satañneshañeꞌnaña seyxhatnomoeꞌ awathotheñ. Ñeñthoꞌmarña sapaꞌ xhokmach setsorrateñ asheñorrotholl ñerraꞌm oꞌch posokmataꞌmoen amaꞌt añ yethro allempokma yamesen xhokmaña setsorrateñña asheñorrotholl. 23Attho sapaꞌ setsorrateñ asheñorrotholl amaꞌt añ yethro allempokma yamesen atthoch amach sathpoeno ñoñets ñeñth ateth anareth Moisésoth, ñeñthepñapaꞌ esoꞌmarwañakaꞌyeña seꞌmoñeꞌtenenña na allempo eꞌñe naꞌkrraten poesheñarr acheñ añ yethro allempokma yamesen. 24Ñerraꞌm esempo senteñ poꞌpsheñeñ ñeñth ateth penpaꞌ amachña ñeñthotha sotteñeꞌchatsche añoꞌ kowenayeꞌ es yexhkateno. Xhochña ñanom señoch errothentheꞌña ñeñth poꞌñoxh ateth pena.
Attho Jesúspaꞌ eñotatanet ñapaꞌ Yomporeshoth wapa
25Patantaꞌtets jerusaléñoꞌmarneshaꞌpaꞌ ateth otyenet:
—Taꞌm amatheꞌ añeyayeña ñeñth oꞌpatenet oꞌch moetset. 26Ñapaꞌxhoꞌña alloꞌtsenepaꞌt arr, attha ama es poexheno eñosets, amaña errotheyeꞌña oteñeto. Ñatoꞌ tharroꞌmartheꞌña amaꞌt amhchaꞌtarethneshaꞌpaꞌ oꞌkaꞌye eñotwet poꞌñoxh ñapaꞌ ñeñthkaꞌye Cristotets. 27Tharraña añpaꞌ yeñoteñkaꞌye alloth wena. Tharraña esempoch wapa ñeñthchaꞌ eꞌñe poꞌñoxh Cristotats ñapaꞌ amach eseshayeꞌ eñotapaye errothchaꞌ wapa.
28Jesúsña allempo yexhaten Parets paꞌpakllo, ñapaꞌ poerranaroth ateth otanet:
—Sapaꞌ sechmeꞌtennoñtheꞌ, señotennoñtheꞌña na erroththeꞌ nowapa. Tharraña napaꞌ ama nothayeꞌ nowapo, eñallña ñeñth nellsenseꞌ; ñapaꞌ eꞌñe poꞌñoxh ñerraꞌm erroth ot, ama poenesho poꞌñoñ. Ñeñthña sapaꞌ ama señoteñeña sa. 29Nañapaꞌ eꞌñe neñoteñ, ñeshothkaꞌye nowapa. Ñapaꞌ ñeñthkaꞌyeña nellsenserreꞌ.
30Allempokma atarr moeneñet oꞌch rromoetañ tharraña ama eseshaꞌ rromaye. Tharroꞌmar ama xhenaꞌ allempo ñeñth poktetsa ñokop atthoch rromoet. 31Shonteꞌ acheñeneshaꞌ ñeñth ameꞌñaya. Ñetñapaꞌ ateth otyenet:
—Añtheꞌkaꞌyeña poꞌñoxh Cristo ñeñth yekwen oꞌch wapa. Yapaꞌ oꞌkaꞌye orrtatosnay poꞌpartsoña, amatheꞌ errothenoth wapo poꞌpsheñeñ ñeñthchaꞌ ello metanoseꞌ poꞌpartsoteña ñeñth ateth entatyeney añ yakmar.
Allempo fariseoneshaꞌpaꞌ moeñet guardianeshaꞌ ñeñthchaꞌ rromoenayañ Jesús
32Fariseoneshaꞌñapaꞌ eꞌmareꞌteñet shonteꞌ acheñeneshaꞌpaꞌ eꞌñe kowen eñosyenet Jesúsokop. Ñeñthoꞌmar ñet ñamha ñeñth paꞌmhchaꞌtaretherneshaꞌ pen allowen judioneshaꞌ poꞌkornaneshar, ñetñapaꞌ moeñet guardianeshaꞌ ñeñthchaꞌ rromoenayañ Jesús. 33Jesúsñapaꞌ alla oterraneterr:
—Oꞌ mameshamha eꞌñe parroꞌtseney. Oꞌchña mamerrerrpaꞌ oꞌch alla awerren alloꞌtsen ñeñth nellsenseneꞌ. 34Allempoña amaꞌtchaꞌ seꞌnameꞌterrenpaꞌ amach senterrno. Allchaꞌ neserr napaꞌ sañapaꞌ amatheꞌ errothenoth sexhapo.
35Judioneshaꞌñapaꞌ ateth otannaꞌtyeset:
—Taꞌ, ¿errach taña añma ñeñthoꞌmar amach yentere? Ñatoꞌ arrchaꞌ ta griegoneshesho all parratseꞌtyen yamoꞌtseshaꞌ oꞌch yexhatenanaꞌ griegoneshaꞌ all. 36Taꞌ, ¿estheꞌña añma ñeñthoꞌmar ateth oten: “Amaꞌtchaꞌ seꞌnerrnaꞌpaꞌ amach senterrno; allchaꞌ neserr napaꞌ sañapaꞌ amach errothenoth sexhapo”?
Allowen ñeñth ameꞌñenaya Jesús, Parets Poekamkëñothpaꞌ eꞌñe poeñmateñothet poeyoxhreto ateth penet ñerraꞌmrratheꞌ alloth poten oñ ñeñth atarr kowen
37Oꞌ eꞌñe wañmoch all koshena judioneshaꞌ. Añe yethro allempo nanak koshenet, Jesúsñapaꞌ thomos all, poerranaroth ateth otosanet:
—Erraꞌtsentheꞌ acheñer oñpaꞌtets eꞌñe poeyoxhreto, onetepaꞌ nesho orretepaꞌ. 38Ñeñth nameꞌñenaya na eꞌñe poeñmateñothet poeyoxhretopaꞌ ateth pena ñerraꞌmrratheꞌ alloth poten oñ aton ñeñth atarr kowen, tharroꞌmar ñeñthpaꞌ ateth oten Yompor poꞌñoñ ñeñth anwareth awathotheñ.
39Ñewa, añ ñoñetspaꞌ añekop serrpareꞌten Yompor Poekamkëñekop ñeñthchaꞌ chorrerraya allowen ñeñthchaꞌ ameꞌñerraya ña. Tharraña allempopaꞌ ama aparethtenetaꞌ Yompor Poekamkëñ, tharroꞌmar Jesúspaꞌ ama xhenaꞌ allempoch alla awerr Yompor poeꞌntaño allchaꞌ eꞌñe kowentaterrñañet.
Allempo acheñeneshaꞌpaꞌ ellopaꞌtetstatenet pokthaphña Jesúsokop
40Allempo eꞌmwet ñeñth ateth oten Jesús, patantarrña acheñeneshaꞌpaꞌ ateth otyeset:
—Poꞌñoxh añmapaꞌ ñeñththeꞌkaꞌye aꞌmhteneꞌña Yompor poꞌñoñ ñeñth xhokma yekwen.
41Poꞌpotantañpaꞌ ateth otyeset:
—Añmapaꞌ ñeñththeꞌkaꞌyeña Cristotets ñeñth xhokma yekwen.
Poꞌpotantaññapaꞌ ateth otyenet:
—Ñeñthchaꞌ Cristoterretspaꞌ amatheꞌ arrotha wapo Galileoth. 42Amaꞌt otenoña Yompor poꞌñoñ ñeñth anwareth, Davidchaꞌ poꞌmhrenñoth wapaña ñeñthchaꞌ Cristoterrets; arrothchaꞌ wapa anetsoth ñeñth Beléñ ñeñth paꞌnetser peꞌth David.
43Ñeñthoꞌmarña allowen acheñeneshaꞌpaꞌ ellopaꞌtetstatenet pokthaphña Jesúsokop. 44Patantaꞌtetsñapaꞌ atarr moeneñet oꞌch rromoet, tharraña ama eseshaꞌ rromaye.
Attho judioneshaꞌ paꞌmhchaꞌtaretherneshaꞌ ama ameꞌñeñeto Jesús
45Guardianeshaꞌñapaꞌ poerraxherret alloꞌtsen ñeñth paꞌmhchaꞌtaretherneshaꞌ pen allowen judioneshaꞌ poꞌkornaneshar epoet ñamha fariseoneshaꞌ. Ñetñapaꞌ ateth otarethtapoerret:
—Esoꞌmarwañakaꞌyeña amaña sewapatere.
46Guardianeshaꞌñapaꞌ ateth otwerret:
—Amaꞌt eseshapaꞌ ama poeñosaroña atarr kowen ateth eñen ña.
47Fariseoneshaꞌñapaꞌ ateth oterraneterr:
—Tharroꞌmartheꞌ ama sewapatere sapaꞌxhoꞌña xhotheꞌkaꞌye shekapas samha. 48Amaꞌt ñamha patantarr amhchaꞌtarethneshaꞌpaꞌ amaꞌt oꞌ xha ameꞌñyeto ñamet. Amaꞌt ñamha patantarr fariseoneshaꞌpaꞌxhoꞌña oꞌtheꞌkaꞌye xha ameꞌñyet. 49Tharraña ñeñth acheñeneshar ñeñth ama eñotenaye ñoñets ñeñth ateth anareth ñetñapaꞌ aꞌkmarethet.
50Ñeñthña poesheñarr fariseo ñeñth Nicodemo ñeñth tatsa awaña Jesúsesho, ñañapaꞌ ateth otan pamoꞌtseshaꞌ fariseoneshaꞌ:
51—Ñoñets ñeñth ateth anareth yokoppaꞌ ateth oteney, amach errothenoth yekoñchache amaꞌt poesheñarra acheñ eꞌñe atthotha. Xhochña ñanom yeꞌmhñoch atthoch yeñoch estheꞌ otatseꞌtyen ñeñth atarr sosey yenten eshekchaꞌña yekoñchach.
52Ñetñapaꞌ ateth ochet:
—Esoꞌmarwachkaꞌ pemoñesyaña galileoꞌmarneshaꞌ, ñatoꞌ phapaꞌ galileoꞌmarneshaphtheꞌ. Phapaꞌ amarramcheꞌ galileoꞌmarneshayaype. Theꞌpaꞌ pelleyaꞌyes Yompor poꞌñoñ allochñapaꞌ oꞌch peñoch Galileothpaꞌ amaꞌt poesheñarrapaꞌ amach wapoña ñeñthchaꞌ aꞌmhteneꞌ Yompor poꞌñoñ. 53Allempoña allowenet awanemyerret paꞌpaklleto.

Currently Selected:

San Juan 7: ame

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy