YouVersion Logo
Search Icon

NA VOSA VAKAIBALEBALE 1

1
A kena yaga na vosa vakaibalebale, 1-6. Ai vakaro eso, 7-19. Sa kaci tiko ko Vuku, ia sa daubeci ga, 20-33.
1A vosa vakaibalebale i Solomoni na luve i Tevita, na tui Isireli;
2Me kilai kina na vuku kei nai vakavuvuli;
Me kune kina na vosa vakayalomatua;
3Me rawa kina nai vakavuvuli ni vuku,
Kei na yalododonu, kei na lewa, kei na cakacaka dodonu;
4Me soli kina na yalomatua vei ira na yalowai,
Na kila ka kei na lomavuku vua na cauravou.
5Ena vakarorogo na lomavuku, ka na tubu cake kina na nona vuku;
Ia na tamata daukila ka, ena rawata nai vakavuvuli vuku:
6Me kila na vosa vakaibalebale, kei na kenai vakamacala;
Na nodra vosa na vuku, kei na nodra vosa vakatautauvata.
7Na rerevaki Jiova sa vu ni lomavuku:
Ia ko ira na lialia era sa cata na vuku kei nai vakavuvuli.
8Na luvequ, mo vakarorogo ki nai vakavuvuli i tamamu,
Ka mo kakua ni biuta na vunau i tinamu:
9Ni na dua na uku talei ki na ulumu,
Kei nai taube ki na domomu.
10Na luvequ, kevaka sa temaki iko ko ira na tamata ca,
Mo bese ga.
11Kevaka era sa kaya, Tou mai lako vata,
Me datou koto lawaki mada, me ia na veivakamatei,
Tou la'ki koto lo me vakamatei ira walega era sa sega ni cala;
12Me tou tilomi ira bulabula me vaka nai bulubulu;
Ka taucoko, me vakataki ira era sa lako sobu ki na davuke:
13Tou na kunea nai yau talei kecega.
Tou na yauta ki na nodratou veivale me oso:
14Me datoui votavota vata;
Me dua vata ga na nodatou taga i lavo:
15Na luvequ, mo kakua ni sala vata kei iratou;
Mo tarova na yavamu mai na nodratou i lakolako:
16Ni sa cici ki na ca na yavadratou,
A ratou sa kusarawa me ra vakadavea na dra.
17E dina sa sega ni yaga me biri na dai,
E matana e dua na manumanu vuka.
18Ia eratou sa lawakitaki iratou vakai iratou ga me ra vakadave dra,
Eratou sa koto lo me ra mate kina ko iratou.
19Sa vakakina na nodra i valavala kecega era sa kocova nai yau;
Sai koya ka vakamatei ira na kenai taukei.
20Sa dauvunau e tautuba ko Vuku;
Sa tabalaka na domona e na saqata:
21Sa kaci e na tikina e dausoqoni kina na tamata,
E na saqata ni matamata-ni-koro:
E na loma ni koro sa cavuta na nona vosa, ka kaya,
22Koi kemudou na yalowai, me vakaevei na kena dede na nomudou vinakata na yalowai?
Ka ra marau ko ira na dauveivakalialiai, e na nodra veivakalialiai,
Ka cata na vuku ko ira na sesewa?
23Dou saumaki mai e na noqu vunau:
Raica, ka'u na sovaraka na Yaloqu vei kemudou,
Ka'u na vakatakila na noqu vosa vei kemudou.
24Ni ka'u a daukaci, ia dou a bese ga;
Au a dodoka yani na ligaqu, ka sega e dua sa goleva;
25Ia dou a vakawaletaka kecega na noqu i vakavuvuli,
Ka sega ni vinakata na noqu vunau:
26Koi au talega ka'u na dredrevaka na nomudou vakaloloma;
Ka'u na vakalialia ni sa yaco mai na nomudou rere;
27Ni sa yaco mai na nomudou rere me vaka na rusa,
Kei na nomudou ca me vaka na covulaca;
Ni sa yacovi kemudou na rarawa kei na yaluma.
28Era na qai kaci mai vei au, ia ka'u na sega ni rogo yani;
Era na qarai au vagumatua, a ra na sega ni kunei au:
29Ni ra a cata na vuku,
Ka sega ni digitaka me ra rerevaki Jiova:
30Era a bese ga ki na noqu i vakavuvuli:
Era a beca na noqu vunau kecega.
31O koya era na kania kina na vua ni nodra i valavala,
Ka ra na vakamamautaki e na nodra lewa.
32Sa nodra lesu tani na yalowai era na mate kina,
Kei na nodra sautu na lialia era na rusa kina.
33Ia ko koya sa vakarorogo vei au ena tiko vinaka,
Ka na vakacegu ka sega ni rerevaka e dua na ka ca.

Currently Selected:

NA VOSA VAKAIBALEBALE 1: FOV

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy