FILIPAI 1
1
Sa tukuna vei ira ko Paula ni sa vakavinavinaka e na vukudra, ka daumasulaki ira, 111. Sa tukuna ni sa vakacegui ni sa dauvakacacani, 1226. Sa vakarota vei ira, ka vakacegui ira, 2730.
1Oi keirau ko Paula kei Timoci, nai talatala i Jisu Karisito, vei ira kecega era sa lotu mai Filipai, era sa tu vata kei Karisito Jisu. Kei ira nai talatala qase, kei ira na tuirara: 2Me nomudou na loloma, kei na vakacegu, mai vua na Kalou ko Tamada, kei na Turaga ko Jisu Karisito.
3Au sa vakavinavinaka vua na noqu Kalou e na gauna kecega kau sa nanumi kemudou kina, 4e na veisiga kecega, e na noqu masu kecega, au sa masulaki kemudou e na marau, 5ni dou sa lomavata tu e nai tukutuku-vinaka mai nai vakatekivu ka yacova na siga edaidai; 6ia na ka oqo kau sa vakadinata sara, o koya sa vakatekivuna na cakacaka vinaka e na lomamudou, ena kitaka tiko me yaco mada na siga i Jisu Karisito: 7ia sa dodonu meu nanumi kemudou kecega vakaoqo, ni dou sa tiko e na lomaqu; ni dou sa rawata vata kei au na loloma koi kemudou kecega, niu sa vesu tu, ka totaka ka vakadinadinataka nai tukutuku-vinaka. 8Ni sa kila na Kalou, niu sa lomani kemudou kecega vakalevu sara e na yalololoma i Jisu Karisito. 9Ia na ka oqo kau sa kerea, me tubu cake vakalevu sara na nomudou loloma e na vuku kei na lewa vinaka kecega; 10mo dou vinakata kina na veika sa vinaka sara, mo dou yalodina ka sega ni cala me yaco mada na siga i Karisito; 11ni dou sa sinai e na vua ni yalododonu, sa tubu e na vuku i Jisu Karisito, me vakarokorokotaki ka vakavinavinakataki na Kalou.
12Ia kau sa vinakata, mo dou kila, na veiwekani, ni sa tubu cake nai tukutuku-vinaka e na vuku ni ka sa yaco vei au; 13a sa vakaraitaki kina na noqu vesuki e na vuku i Karisito vei ira kecega na sotia e na vale ni tui, vei ira kece talega na kena vo; 14a ra sa lewe vuqa na veiwekani era sa tu vata kei na Turaga, era sa gumatua mai niu sa vesuki tu, a ra sa doudou cake kina me ra tukuna na Vosa ni Kalou ka sega ni rere. 15E dina ga sa so era sa vunautaki Karisito ni ra sa dauvuvu ka dauveileti, eso talega ni ra sa lomavinaka; 16sa vunautaki Karisito ko ira eso ni ra sa dauveileti, ka segai e na lomadina, era nakita ga me vakaikuritaka na noqu vesu e na ka rarawa eso; 17eso tale e na loloma, ni ra sa kila kau sa lesi meu totaka nai tukutuku-vinaka. 18Ia ka vakaevei? sa takiveivinaka, se ra vakailasu, se ra dina, sa vunautaki na Karisito: ia na ka oqo kau sa rekitaka, io, kau na rekitaka tikoga. 19Niu sa kila ni na yaco na ka oqo me ka meu bula kina, e na vuku ni nomudou masu, kei nai solisoli ni Yalo i Jisu Karisito, 20me vaka na ka kau sa dauwaraka ka vakanuinuitaka meu kakua ni madua e na dua na ka, meu doudou sara ga, me vaka eliu, me vakakina edaidai me vakalevulevui na Karisito e na vuku ni yagoqu, se sa bula, se sa mate.
21Ni sai koya na Karisito kau sa bula kina; ia sa ka vinaka kevaka kau sa mate. 22Ia kevaka sa vakavuana tiko na noqu cakacaka niu sa bula vakayago oqo, au sa qai sega ni kila na ka meu digitaka. 23Niu sa lomalomarua e na ka e rua, niu sa gadreva meu lako yani, ka tiko vata kei Karisito; o koya sa vinaka cake sara: 24ia sa yaga cake vei kemudou meu tiko ga vakayago. 25Ia niu sa vakadinata oqo, au sa kila niu na tiko ga, io, ka tiko vata kei kemudou kecega, mo dou tubu cake kina e na marau ni vakabauta; 26me levu cake e na vukuqu na nomudou rekitaki Jisu Karisito, e na noqu tiko vata tale kei kemudou.
27Mo dou ia ga nai valavala sa kilikili kei nai tukutuku-vinaka kei Karisito: meu rogoci kemudou kina, seu lako yani ka raici kemudou, seu tiko tani, ni dou sa tu dei e na yalovata, ka gumatua sara e na lomavata me tubu na vakabauta ni tukutuku-vinaka; 28me kakua ni vakarerei kemudou ko ira na nomudou meca e na dua na ka; oqori nai vakatakilakila vei ira ni ra na rusa, ia vei kemudou ni dou na bula, ia oqo mai vua na Kalou. 29Ni sa soli vei kemudou e na vuku i Karisito, e segai walega mo dou vakabauti koya, mo dou vosota talega na ca e na vukuna; 30ni sa nomudou na veivala dou sa raica eliu vei au, ka dou sa rogoca sa yaco vei au edaidai.
Currently Selected:
FILIPAI 1: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific