LUKE 1
1
Sa bolea ko Luke me vola nai tukutuku kei Jisu, 1—4. Sa tukuna na agilose ni rau na kunekune na tinai Joni na dauveipapitaiso, kei na goneyalewa sa tina i Jisu, 5—38. Sa lako ko Meri vei Ilisapeci, ka vakarokorokotaka na Turaga, 39—56. Sa sucu ko Joni, 57—66. Sa tukuni Jisu kei Joni talega ko Sakaraia, 67—69.
1Ni ra sa lewe vuqa era sa bolea me ra vakarautaka nai tukutuku ni veika sa vakadinati deivaki sara vei keda, 2me vaka na ka era sa tukuna vei keda, ko ira era sa raica e na matadra ka sa qarava na vosa, mai nai vakatekivu; 3sa vinaka talega vei au, ni’u a vakatarotaroga matua sara na ka kecega mai nai vakatekivu, me’u veivakadutaitaka e nai vola vei kemuni, Ceofilo na turaga dina, 4mo kila kina na kena dina ni veika ko sa vakatavulici kina.
5E na gauna sa tui Jutia kina ko Eroti, sa dua na bete ko Sakaraia na yacana, e na matabete i Epaia: a sa watina e dua vei ira na luve i Eroni, ko Ilisapeci na yacana. 6A rau sa dodonu ruarua e na mata ni Kalou, erau sa muria kecega na vunau kei nai vakaro ni Turaga, ka sega ni cala. 7A sa sega na luvedrau, ni sa yava ko Ilisapeci, a rau sa qase ruarua mai.
8A sa yaco, ni sa ia tiko ko koya na cakacaka vakabete e na mata ni Kalou, e na vuku ni nona matabete, 9me vaka nai valavala ni cakacaka vakabete, sa nonai tavi me vakama na ka boi vinaka, ni sa curu ki na vale-ni-soro ni Turaga. 10Ia ko ira kecega na tamata era lewe vuqa, era sa tu etautuba ka masu ni sa kama tiko na ka boi vinaka.
11A sa rairai vua e dua na agilose ni Turaga, sa tu e na yasana i matau ni cabocabo ni ka boi vinaka. 12Ia ni sa raica ko Sakaraia, sa kidroa, a sa kani koya na rere. 13Sa kaya vei koya na agilose, Kakua ni rere, Sakaraia; sa rogoci na nomu masu; ka na vakasucuma e dua na luvemu-tagane ko Ilisapeci na watimu, ia ko na vakayacani koya ko Joni. 14Ia ko na reki ka marau kina, ena lewe vuqa talega era na reki e na vuku ni nona sucu. 15Ni na levu ko koya e na mata ni Turaga, ka na sega ni gunu waini se na yaqona; ena vakasinaiti talega e na Yalo Tabu, mai na kete i tinana. 16Ia ka lewe vuqa vei ira na luve i Isireli ena saumaka mai ko koya ki na Turaga na nodra Kalou. 17Ia ena liutaki koya e na yalo i Ilaija kei na nona kaukauwa, me saumaka na lomadra na qase vei ira na gone, kei ira era talaidredre ki na nodra vuku era yalododonu; me vakarautaka na tamata me ra qai nona na Turaga.
18A sa kaya vua na agilose ko Sakaraia, A cava me’u kila kina na ka oqo? ni’u sa qase, a sa vuqa na yabaki ni watiqu. 19A sa vosa na agilose, ka kaya vua, Oi au ko Keperieli, au sa dautu e na mata ni Kalou; ia ka’u sa talai mai me’u vosa vei iko, ka tukuna vei iko nai tukutuku vinaka oqo: 20ka raica, ko na galu ga, ko na sega ni vosa rawa, me yaco mada na siga ena vakayacori kina na veika oqo, ni ko sa sega ni vakadinata na noqu vosa, o koya ena vakayacori ga e na kena gauna.
21A ra sa waraki Sakaraia ko ira na tamata, a ra sa kidacala ni sa dede ko koya e na vale ni soro. 22Ia ni sa curu mai ko koya, sa sega ni vosa rawa vei ira: a ra sa qai kila ni sa raica ko koya e dua na raivotu e na vale ni soro; ia sa vakatabataba vei ira ko koya, ka sa galu tikoga.
23Ka ni sa oti na gauna ni nona cakacaka, sa lako tani yani ki nona vale. 24A sa oti na veisiga ko ya, sa qai kunekune na watina ko Ilisapeci, a sa vunitaki koya ka vula lima, ka kaya, 25Sa cakacaka vakaoqo vei au na Turaga e na siga sa nakita kina ko koya, me kauta tani na ka ka’u a rogo ca kina vei ira na tamata.
26Ia, e nai kaono ni vula sa talai na agilose ko Keperieli mai vua na Kalou, ki na dua na koro mai Kalili, a yacana ko Nasareci, 27vua e dua na goneyalewa sa musu vua e dua na tagane na yacana ko Josefa, e na mataqali i Tevita; ia na yaca ni goneyalewa ko Meri. 28A sa lako mai vei koya na agilose, ka kaya, Sa loloma, ko iko sa daulomani! sa tiko vei iko na Turaga; ko sa kalougata vakalevu vei ira na yalewa tani. 29Ia ko koya, sa kidroa e na nona vosa, a sa vakanananu e lomana se vakabeka evei nai valavala ni veikidavaki vakaoqo. 30A sa kaya vei koya na agilose, Kakua ni rere, Meri: ni ko sa kune loloma vua na Kalou: 31ka raica, ko na kunekune, ko na vakasucuma talega e dua na gonetagane; ia mo vakayacani koya ko JISU. 32Ena levu ko koya, ka na vakatokai na Luve i Koya sa cecere sara; ia na Turaga na Kalou ena solia vua nai tikotiko vakaturaga nei tamana ko Tevita: 33ia ena lewa ko koya na mataqali i Jekope ka sega ni mudu; ena sega talega ni oti na nona matanitu.
34Sa qai kaya vua na agilose ko Meri, Ena yaco vakabeka evei na ka oqo, ni’u sa sega ni veiyacovi kaya e dua na tagane? 35A sa vosa na agilose, ka kaya vua, Ena lako sobu mai vei iko na Yalo Tabu, ena vakarurugi iko talega na kaukauwa i Koya sa cecere sara: ia ko koya ena sucu mai vei iko ena vakatokai kina me ka tabu na Luve ni Kalou. 36Ka raica, na dauvemu ko Ilisapeci, sa kunekunetaka talega e dua na gone tagane, ni sa qase; ia oqo sa kenai kaono ni nona vula, ko koya ka vakatokai e yava. 37Ni na sega ni dredre vua na Kalou e dua na ka.
38Sa qai kaya ko Meri, Raica na vada ni Turaga; me yaco ga vei au me vaka na nomuni vosa. A sa lako tani na agilose maivei koya.
39A sa ia ko Meri e na gauna ko ya, ka lako vakusarawa ki colo, ki na dua na koro ni Jutia; 40a sa curu ki na vale i Sakaraia, a sa veikidavaki kei Ilisapeci. 41Ia ni sa rogoca ko Ilisapeci na vosa ni veikidavaki nei Meri, sa rika e ketena na gone, a sa vakasinaiti ko Ilisapeci ena Yalo Tabu: 42a sa tabalaka cake na domona ko koya, ka kaya, Ko sa kalougata vakalevu vei ira na yalewa tani, a sa kalougata na vua ni ketemu. 43A sa vakaevei na ka oqo vei au, ni sa lako maivei au na tinana na noqu Turaga? 44Ka raica, ni sa rorogo e daligaqu na vosa ni nomu veikidavaki, sa rika e na reki na gone ena ketequ. 45A sa kalougata ko koya sa vakadinata; ni na vakayacori na ka sa tukuni vua maivei koya na Turaga. 46A sa kaya ko Meri, Sa vakamalua vua na Turaga na yaloqu, 47A sa reki na yaloqu vua na Kalou na noqui Vakabula. 48Ni sa lomana na nona vada ni sa dravudravua: Ka raica, mai na gauna oqo ena kaya nai tabatamata kecega ni’u sa kalougata. 49Ni sa cakava na ka levu eso vei au ko koya sa qaqa; Ia sa dokai na yacana. 50A sa tu na nona loloma vei ira sa rerevaki koya, ka yacova nai tabatamata e vuqa. 51Sa kaukauwa na cakacaka ni ligana; Sa dui vakasesei ira na viavialevu ko koya e na vuku ni nanuma ni yalodra. 52Sa vakasivoi ira na kaukauwa mai na nodrai tikotiko, A sa vakaceceretaki ira era tamata lalai. 53Sa vakamamautaki ira era sa viakana e na ka vinaka; A sa vakatalai ira wale era vutuniyau. 54Sa vukei ira na nona tamata na Isireli, Ni sa vakananuma na loloma; 55(Me vaka na nona vosa vei ira na noda qase,) Vei Eparaama, kei na nona kawa ka sega ni mudu.
56A sa tiko vata kaya ko Meri ka vula tolu beka, a sa qai lesu ki nona vale.
57A sa yaco na siga i Ilisapeci me vakasucu kina; a sa vakasucuma ko koya e dua na gonetagane. 58A ra sa rogoca ko ira sa tiko voleka vua, kei ira na dauvena, ni sa lomani koya vakalevu na Turaga; a ra sa reki vata kaya.
59Ia e nai kawalu ni siga era sa lako mai me ra ciliva na gone; a ra sa vakayacani koya ko Sakaraia, me rau veiyacani kei tamana. 60Ia sa kaya na tinana, Me kakua; sa yacana ga ko Joni. 61A ra sa kaya vua, Sa sega na wekamu sa vakayacani e na yaca oqo. 62A ra sa vakatabataba vei tamana, se cava e vinakata ko koya me yacana. 63A sa vaka ko koya me dua na papa ni volavola, a sa vola. A yacana ko Joni. A ra sa kurabui kecega. 64A sa sereki sara na gusuna kei na yamena, a sa vosa ko koya, ka vakarokorokotaka na Kalou.
65A ra sa rere kecega era tiko vakavolivoliti ira; a sa tukuni yani na vosa kecega oqo ki na colo taucoko vaka-Jutia. 66A ra sa tugana e lomadra ko ira kece era rogoca, a ra sa kaya, Ena vakabeka evei nai valavala ni gone oqo? A sa tiko vata kaya na liga ni Turaga.
67A sa vakasinaiti e na Yalo Tabu ko Sakaraia na tamana, a sa parofisai mai, ka kaya, 68Me vakarokorokotaki na Turaga na Kalou nei Isireli; Ni sa lako mai vei ira na nona tamata ka vakabulai ira, 69A sa vakatubura vei keda e dua na veivakabulai sa vaka na kaukamea, E na mataqali i Tevita na nona tamata; 70(Me vaka na ka sa tukuna ko koya e na gusudra na nona parofita tabu, mai nai vakatekivu kei vuravura:) 71Na veivakabulai mai na noda meca, mai na ligadra kece talega era sa cati keda: 72Me vakayacora na yalololoma vei ira na noda qase, Me nanuma talega na nona veiyalayalati tabu; 73Na bubului sa bubului kina ko koya vei Eparaama na tamada, 74Me solia mai vei keda, me da vakabulai mai na ligadra na noda meca, Ka qaravi koya ka sega ni rere, 75E na yalosavasava kei na caka dodonu e matana, e na veisiga kecega ni noda bula. 76Ia ko iko na gone, ko na vakatokai na parofita i Koya sa cecere sara: Ni ko na liu vua na Turaga me caramaka na nona sala: 77Me vakatakila vei ira na nona tamata na ka me ra bula kina, Ni sa bokoci na nodra i valavala ca, 78E na vuku ni nona loloma levu na noda Kalou, Sa kida mai kina vei keda na rarama maicake, 79Me vakararamataki ira era sa tiko e na butobuto kei na yaloyalo ni mate, Ka me tubera na yavada ki na sala ni veivinakati.
80A sa tubu cake na gone, a sa yalomatua sara, a sa tiko e loma ni veikau me yaco mada na nona siga me vakarairaitaki kina vei ira na Isireli.
Currently Selected:
LUKE 1: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific