NA VUNAU NI SORO 1
1
Sa vakavulici Mosese ko Jiova e nai valavala ni soro kama, ni sa dua na pulumokau, 1-9; se sipi, 10-13; se manumanu vuka, 14-17.
1A sa kacivi Mosese ko Jiova, ka vosa vua mai na vale ni veitavaki, ka kaya, 2Mo vosa vei ira na Isireli, ka kaya vei ira, Kevaka e dua vei kemudou sa vakacabora nai madrali vei Jiova, dou vakacabora na manumanu me nomudou i madrali, na pulumokau, se sipi, se me.
3Kevaka sa nonai madrali na pulumokau mei soro kama, me vakacabora ko koya na ka tagane sa sega na kena ca: me vakacabora mai na katuba ni vale ni veitavaki, me vinakati kina, e na mata i Jiova. 4Ia me tabaka ko koya na ulu ni soro kama e na ligana; ena qai ka me vinakati kina ko koya, ka me nonai bulubulu. 5Ia me vakamatei na pulumokau e na mata i Jiova: ia ko ira na bete, na luve i Eroni, me ra kauta na dra, ka volita nai cabocabo-ni-soro, sa tu mai na katuba ni vale ni veitavaki ka kureitaka kina na dra. 6Ia me qai lauvoci nai soro kama, ka tava me vaka na kenai tavatava. 7Ia ko ira na luve i Eroni na bete me ra virikotora na bukawaqa e na dela ni cabocabo-ni-soro, ka tuva vakavinaka na buka e dela ni bukawaqa: 8ia ko ira na bete, na luve i Eroni, me ra tuva vakavinaka na kenai tavatava, na uluna, kei na kena uro, e na dela ni buka sa toka e na dela ni bukawaqa, e na dela ni cabocabo-ni-soro: 9ia na kena gacagaca, kei na yavana, me vuya e na wai; me qai vakama kecega na bete e na dela ni cabocabo-ni-soro, mei soro kama, sa vakacabori e na bukawaqa, me ka boi vinaka vei Jiova.
10Ia kevaka sa nonai madrali na sipi se na me, mei soro kama, me na vakacabora ko koya na ka tagane sa sega na kena ca. 11Ia me vakamatei e na yasa ni cabocabo-ni-soro sa donuya na tokalau, e na mata i Jiova: ia ko ira na bete, na luve i Eroni, me ra volita nai cabocabo-ni-soro, ka kureitaka kina na kena dra. 12Me tava talega me vaka na kenai tavatava, io na uluna kei na kena uro: me qai tuva vakavinaka na bete e na dela ni buka sa toka e dela ni bukawaqa, e na dela ni cabocabo-ni-soro. 13Ia na gacagaca kei na yavana, me vuya e na wai: me qai kauta kecega na bete, ka vakama e na dela ni cabocabo-ni-soro: oqo nai soro kama, sa vakacabori e na bukawaqa, me ka boi vinaka vei Jiova.
14Ia kevaka sa nonai madrali na manumanu vuka mei soro kama vei Jiova, me qai cabora ko koya na soqe, se na luve ni ruve, me nonai madrali. 15Ia me kauta na bete ki nai cabocabo-ni-soro, ka kinita laivi na uluna, ka vakama e na dela ni cabocabo-ni-soro; ia me loba yani na kena dra ki na yasa ni cabocabo-ni-soro: 16me qai tunaka ka vutia, ka biuta ki na yasa ni cabocabo-ni-soro sa donuya na tu-i-cake, e na tikina sa biu kina na dravusa: 17ka me tava na tabana, ia me kakua ni tawasea laivi, me qai vakama na bete e na dela ni cabocabo-ni-soro, e na dela ni buka sa toka e dela ni bukawaqa: oqo nai soro kama, sa vakacabori e na bukawaqa, me ka boi vinaka vei Jiova.
Currently Selected:
NA VUNAU NI SORO 1: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific