JOSUA 1
1
Sa lesi ko Josua mei sosomi i Mosese, 1-9. Ai vakaro i Josua vei ira na tamata, kei na nodra vosa, 10-18.
1Sa mate ko Mosese nai talatala i Jiova, sa qai vosa ko Jiova vei Josua na luve i Nuni, o koya ka dauqaravi Mosese, ka kaya, 2Sa mate ko Mosese na noqu i talatala; ia oqo, mo cavu tu, mo qalo-kosova na Joritani oqo, ko iko kei ira kecega na tamata oqo, ki na vanua ka'u na solia vei ira, oi vei ira na Isireli. 3Na tikina kecega ena butuka na qeteqete ni yavamuni, au sa solia vei kemuni, me vaka ka'u a kaya vei Mosese. 4Me vakatekivu mai na vanua liwa, mai Lepanoni talega oqo, ka yacova na uciwai levu, na uciwai ko Uferetisi, na nodra vanua kecega na Itaiti, ka yacova na wasawasa levu talega sa donuya nai dromudromu ni mata-ni-siga, sa na kenai yalayala ni nomuni vanua. 5Ena sega e dua me vorati iko rawa e na veisiga kecega ko na bula kina: au na tiko vata kei iko, me vaka ka'u a tiko vata kei Mosese: au na sega ni weletaki iko, se biuti iko. 6Mo kaukauwa ka qaqa: ni ko na vota vei ira na tamata oqo na vanua ka'u a bubului kina kivei ira na nodra qase me'u solia vei ira. 7Mo kaukauwa ka qaqa sara ga, mo vakabauta mo cakava me vaka nai vakaro kecega sa vakarota vei iko ko Mosese na noqu i talatala: mo kakua ni gole tani ki nai matau se nai mawi, mo tamata yaco e na yasana kecega ko lako kina. 8Ai vola ni vunau oqo me kakua ni yali e na gusumu; ia mo vakanananu kina e na siga kei na bogi, mo vakabauta kina mo cakava me vaka na ka kecega sa volai kina: ko na qai kalougata e na nomu i valavala, ia ko na qai tamata yaco. 9Au sa sega li ni vakaroti iko kina? mo kaukauwa ka qaqa; mo kakua ni rere, se yalolailai: ni sa tiko vata kei iko ko Jiova na nomu Kalou e na veiyasana kecega ko sa lako kina.
10Ia ko Josua, sa qai vakaroti ira na nodra turaga lalai na tamata, ka kaya, 11Dou lako voli e na maliwa ni tikotiko, ka vakaroti ira na tamata, ka kaya, Ni vakarautaka na kemuni vaqa; ia sa bogi tolu kemuni na qalo-kosova na Joritani oqo, mo ni la'ki taukena na vanua sa solia vei kemuni ko Jiova na nomuni Kalou mo ni taukena.
12A sa vosa ko Josua vei ira na mataqali i Rupeni, kei na mataqali i Kata, kei na dua na kena wase ni mataqali i Manasa, ka kaya, 13Mo ni nanuma na vosa sa vakarota vei kemuni ko Mosese nai talatala i Jiova, ni sa kaya, Sa solia vei kemuni ko Jiova, na nomuni Kalou, na vakacegu, ka na solia vei kemuni na vanua oqo. 14Ko ira na watimuni, ko ira na nomuni lalai, kei na nomuni manumanu e yavai va, era na tiko ga e na vanua sa solia vei kemuni ko Mosese e na tai ni Joritani oqo; ia koi kemuni na tamata i valu qaqa kece, kemuni na vakarau tu ka liutaki ira na wekamuni, ka vukei ira; 15me vakacegui ira mada ko Jiova na wekamuni, me vakataki kemuni, ka me ra taukena talega na vanua sa solia vei ira ko Jiova na nomuni Kalou: kemuni na qai lesu ki na vanua kemuni sai taukei kina, ka taukena, o koya sa solia vei kemuni ko Mosese nai talatala i Jiova, e na tai ni Joritani oqo, sa donuya nai cadracadra ni mata-ni-siga.
16A ra sa vosa vei Josua, ka kaya, Na ka kecega ko sa vakarota vei keimami keimami na kitaka, ia keimami na lako ki na yasana kecega ko na talai keimami kina: 17Me vaka keimami a vakarorogo vei Mosese e na ka kecega, keimami na vakarorogo vakakina vei iko: ia me tiko vata ga kei iko ko Jiova na nomu Kalou, me vaka sa tiko vata kei Mosese ko koya: 18Ena vakamatei na tamata vakaaduaga sa talaidredre ki na nomu vunau, ka sega ni vakarorogo ki na nomu vosa e na ka kece ko sa vakaroti koya kina: ia mo kaukauwa ga ka yalodei.
Currently Selected:
JOSUA 1: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific