JOELI 1
1
O Joeli, sa tukuna mada na veicudruvi ena yaco maivua na Kalou, ka qai vakarota vei ira na bete me lesia na siga, me ia kina na lolo kei na veivutuni, 1-20.
1A vosa i Jiova sa yaco vei Joeli na luve i Pecueli.
2Dou rogoca mada na ka oqo, na qase, ka vakatu daliga, oi kemudou kece na lewe ni vanua. Sa yaco beka na ka vakaoqo e na nomudou gauna, se na nodra gauna na nomudou qase? 3Dou tukuna matua vei ira na luvemudou, ka me ra tukuna ko ira na luvemudou vei ira na luvedra, kei na luvedra me ra tukuna ki nai tabatamata e tarava. 4A ka sa vakavoca na vodre dauquru, sa kania na vodre dina; kei na ka sa vakavoca na vodre dina, sa kania na vodre dramidrami; kei na ka sa vakavoca na vodre dramidrami, sa kania na nuve.
5Dou yadra mai, koi kemudou na daumateni, ka tagi; ia dou qoqolou kece, koi kemudou na daugunu waini, e na vuku ni waini vou; ni sa kau tani mai na gusumudou. 6Ni sa dua na matanitu sa lako cake mai ki na noqu vanua, e kaukauwa ka sa sega ni wili rawa, a batidra sa vaka na bati ni laioni, ka ra sa vakagalegalena me vaka na laioni yalewa. 7Sa vakamalaitaka na noqu vaini, ka sa vocia na noqu lolo: sa luvata laivi na kulina, ka sa biuta; sa vakavulavulataki na tabana.
8Mo tagi me vaka na goneyalewa sa sulumaki e nai sulu taga nai loloku ni watina ni sa goneyalewa. 9Sa mudu sara mai na vale i Jiova nai madrali laukana kei nai madrali gunuvi: era sa tagi na bete, nai talatala i Jiova. 10Sa vakacacani na were, sa tagi na qele; ni sa vakacacani na sila: sa di na waini vou, sa via oti mai na waiwai.
11Dou madua, nai vakatau-ni-were; dou qoqolou, na dausamaki vaini, e na vuku ni witi kei na parile; ni sa rusa na vuata ni were. 12Sa malai na vaini, a sa via malai na lolo; na pomekaraneti, na balabala talega, kei na wi, io, na kau kecega ni vanua sa malai: ni sa malai yani na nodra marau na luve ni tamata.
13Dou sulumaki kemudou mada e nai sulu taga, na bete, ka tagi; dou qoqolou, koi kemudou sa qarava nai cabocabo-ni-soro: dou mai curu, ka vakabogi e nai sulu taga, oi kemudou nai talatala ni noqu Kalou: ni sa bureitaki ki na vale ni nomudou Kalou nai madrali laukana kei nai madrali gunuvi. 14Dou vakatabuya e dua na siga me ia kina na lolo, kacivaka e dua nai soqosoqo tabu, vakasoqoni ira na qase kei ira kece na lewe ni vanua ki na vale i Jiova na nomudou Kalou, ka tagi vei Jiova.
15Ulei na siga ko ya! ni sa voleka na siga i Jiova, ia ena yaco mai me vaka na veivakarusai maivei Koya sa Kaukauwa. 16Sa sega li ni vakaoti tani mai vei keda na kakana, io na marau kei na reki mai na vale ni noda Kalou? 17Sa vuca na sore ni sila e na loma ni kena qele, sa lala na vale-ni-yau, sa rusa na lololo: ni sa malai na sila. 18Ulei na nodra vutugu na manumanu! sa kidroa na qele ni pulumokau, ni sa sega na kedra vanua veico; io, na qele ni sipi sa vakaloloma. 19I Jiova, ka'u na tagi vei kemuni: ni sa kama e na bukawaqa na vanua veico mai veikau, ia na yameyame ni bukawaqa sa kama kina na kau kecega ni vanua. 20A manumanu ni vanua talega sa tagi vei kemuni: ni sa di mai na dreke ni wai, ia na bukawaqa sa kania na vanua veico mai veikau.
Currently Selected:
JOELI 1: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific