JONI 9
9
Sa vakabula na tamata sa sucu mataboko ko Jisu; a ra sa cudru kina na Farisi, ka vakatatabui koya na tamata, a sa vunauci ira ko Jisu, 141.
1Ia ni sa lako yani ko koya, sa raica e dua na tamata sa sucu mataboko. 2A sa tarogi koya ko ira na nona tisaipeli, ka kaya, Vakavuvuli, ko cei sai valavala ca, a tamata oqo, se tamana kei tinana, sa sucu mataboko kina ko koya? 3Sa kaya ko Jisu, Sa sega ni valavala ca ko koya oqo, se tamana kei tinana, me vakatakilai ga na cakacaka ni Kalou e na vukuna. 4Sa dodonu me da kitaka na cakacaka i koya sa talai au mai, ni sa siga toka: sa voleka mai na bogi, sa sega ni cakacaka rawa kina e dua na tamata. 5Niu sa tiko e vuravura, au sa rarama kei vuravura.
6Ni sa vosa vakaoqo ko koya, sa kasivita na qele, ka ulia vata na soso kei na kasivi, a sa boroya kina na mata ni tamata mataboko, 7a sa kaya vua, Laki tavoi e nai silisili ko Sailoama, (a kenai balebale, Sa talaki.) A sa lako yani, ka tavoi, ka tale mai ka rai rawa.
8Era sa qai kaya kina na lewe ni koro, kei ira sa raici koya eliu ni sa daukerekere, Sa sega li ni koya oqo sa dautiko ka daukerekere? 9Sa kaya eso, Sai koya oqo: ka so tani, E segai, ia sa vakataki koya: sa kaya ko koya, Sai au ga. 10Era sa qai kaya vua, Sa rai rawa vakaevei na matamu? 11Sa kaya ko koya, na tamata sa vakatokai ko Jisu sa ulia na soso, ka boroya na mataqu, ka kaya vei au, Lako ki Sailoama, ka tavoi: ia kau a laki tavoi, kau sa qai rai rawa. 12Era sa qai ka kaya vua, Evei ko koya? Sa kaya ko koya, Au sa sega ni kila.
13Era sa qai kauti koya ka mataboko eliu vei ira na Farisi. 14Ia sa siga ni vakacecegu sa ulia kina na soso ko Jisu, ka basuka na matana. 15Era sa qai tarogi koya tale na Farisi, se sa rai rawa vakaevei. A sa kaya vei ira ko koya, Sa boroya na mataqu ko koya e na soso, kau sa tavoi, kau sa qai rai rawa. 16Eso vei ira na Farisi era sa qai kaya, A tamata oqo sa sega ni tamata ni Kalou, ni sa sega ni vakatabuya na siga ni vakacecegu. Eso tani sa kaya, E cakava rawa vakaevei na cakacaka-mana vakaoqo e dua na tamatai valavala ca? A ra sa sega ni lomavata. 17Era sa kaya tale vua na tamata ka mataboko, A cava ko sa kaya e na vukuna, ni sa basuka na matamu? A sa kaya ko koya, A parofita ko koya.
18Ia ko ira na kai Jutia era sa sega ni vakadinata, ni sa mataboko eliu ko koya, a sa rai rawa, ka ra sa kacivi rau mada na tama i koya sa rai rawa, kei na tinana: 19a ra sa tarogi rau, ka kaya, A luvemudrau oqo, drau sa kaya sa sucu mataboko, ne? sa qai rai rawa vakaevei oqo? 20Erau sa vosa vei ira ko tamana kei tinana, ka kaya, Keirau sa kila ni sa luve i keirau oqo, ka sa sucu mataboko: 21ia keirau sa sega ni kila se sa rai rawa vakaevei; se ko cei sa basuka na matana, keirau sa sega ni kila: sa tamata bula ko koya; taroga: ena tukuni koya.
22Erau sa vosa vakaoqo ko tamana kei tinana, ni rau sa rerevaki ira na kai Jutia: ni ra sa qai loma vata na kai Jutia, me vakatatabui mai na vale ni lotu ko koya yadua sa vakatusa ni sa Karisito ko koya oqo. 23A ka oqo erau sa kaya kina ko tamana kei tinana, Sa tamata bula ko koya; tarogi koya.
24Era sa qai kaciva tale na tamata ka mataboko, ka kaya vua, Vakarokorokotaka na Kalou: keitou sa kila sa tamatai valavala ca ko koya oqori. 25Sa vosa ko koya, ka kaya, Au sa sega ni kila, se sa tamatai valavala ca ko koya, se segai: e dua na ka kau sa kila niu a mataboko eliu, au sa qai rai rawa.
26Era sa qai kaya tale vua, A cava ka kitaka vei iko ko koya? ka basuka vakaevei na matamu? 27Sa kaya vei ira ko koya, Au sa tukuna walega oqo vei kemudou, ia dou a sega ni vakarogoca: dou sa via rogoca tale e na vuku ni cava? dou sa vinakata beka mo dou yaco talega mo dou nona tisaipeli?
28Era sa qai vakalialiai koya, ka kaya, O iko sa nona tisaipeli: ia koi keimami na tisaipeli i Mosese. 29Keimami sa kila ni sa vosa vei Mosese na Kalou; ia na tamata oqo, keimami sega ni kila se sa lako maivei ko koya. 30Sa vosa na tamata, ka kaya vei ira, Sa qai dua na ka vakurabui oqo, ni dou sa sega ni kila se sa lako maivei ko koya, ia sa basuka na mataqu ko koya. 31Eda sa kila sa sega ni rogoci ira na tamatai valavala ca na Kalou; ia kevaka sa daulotu vua na Kalou e dua na tamata, ka kitaka na nona lewa, sa rogoci koya oqo ko koya. 32Sa sega ni rogo mai nai vakatekivu kei vuravura, ni sa dua sa basuka na matana e dua sa sucu mataboko. 33Kevaka sa sega ni lako mai vua na Kalou ko koya oqo, sa sega ni rawata e dua na ka. 34Era sa vosa, ka kaya vua, O iko la ko sa sucu sara e nai valavala ca, ia ko sa vakatavulici keimami oi? A ra sa vakatatabui koya.
35Sa rogoca ko Jisu ni ra sa vakatatabui koya: ia ni sa kunei koya, sa kaya vua, O sa vakabauta na Luve ni Kalou, ne? 36Sa vosa ko koya, ka kaya, O cei ko koya, Turaga, meu vakabauti koya? 37A sa kaya vua ko Jisu, O sa raici koya oti, ia sai koya drau sa veivosaki kaya. 38Sa qai kaya ko koya, Noqu Turaga, au sa vakabauta, A sa cuva vua.
39A sa kaya ko Jisu, Au sa lako mai ki vuravura oqo meu lewa, me ra rai rawa ko ira sa sega ni rai rawa, ia me ra mataboko ko ira sa rai.
40Ko ira na Farisi ka tiko kaya era sa rogoca na veika oqo, a ra sa kaya vua, Sa mataboko beka koi keitou talega? 41Sa kaya vei ira ko Jisu, Kevaka dou sa mataboko, sa sega na nomudou cala; ia dou sa qai kaya, Keitou sa rai; o koya sa tu ga kina na nomudou cala.
Currently Selected:
JONI 9: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific