NAI VAKARUA 1
1
Sa tukuna ko Mosese na cakacaka ni Kalou vei ira na Isireli, ni ra sa lako voli e na lekutu.
1Oqo na vosa sa tukuna ko Mosese vei ira kecega na Isireli e na tai ni Joritani oqo, mai na vanua liwa, e na vanua cecelevu sa donui Sufi, e na tadrua kei Perana, kei Tofeli, kei Lepani, kei Eseroci, kei Ti-saapi. 2(Sa bogi tinikadua nai lakolako mai Orepi e na sala ni ulu-ni-vanua ko Sia me yaco ki Katesaparinea.) 3Ia e nai kavasagavulu ni yabaki, e nai katinikadua ni vula, e nai matai ni siga ni vula, sa qai vosa ko Mosese vei ira na Isireli, me vaka na ka kecega sa vakarota vua ko Jiova me tukuna vei ira; 4ni sa yaviti Sioni ko koya, na nodra tui na Amoraiti, ko koya ka tiko mai Esiponi, kei Oki na tui Pasani, ko koya ka tiko mai Aseteroci mai Etirei. 5E na bati ni Joritani oqo e na vanua ko Moapi, sa vakatekivu ko Mosese me tukuna na vunau oqo, ka kaya:
6Sa vosa vei keda ko Jiova na noda Kalou mai Orepi, ka kaya, Sa dede na nomuni tiko e na ulu-ni-vanua oqo: 7mo ni gole tani ka lako, ka yacova na nodra ulu-ni-vanua na Amoraiti, kei na yasana kecega sa voleka kina, e na vanua cecelevu, e na ulu-ni-vanua, kei na buca, kei na yasana ki na ceva, kei na baravi, na nodra vanua na kai Kenani, kei Lepanoni, me yacova na uciwai levu io na uciwai ko Uferetisi. 8Raica, ka'u sa solia na vanua e na matamuni: ni lako kina mo ni taukena na vanua ka bubului kina ko Jiova vei iratou na nomuni qase, kivei Eparaama, kei Aisake, kei Jekope, me solia vei iratou kei na nodratou kawa.
9Ia ka'u a vosa vei kemuni e na gauna ko ya, ka kaya, Au sa sega ni vosoti kemuni rawa vakai au ga: 10sa vakalewevuqataki kemuni ko Jiova na nomuni Kalou, ka raica, kemuni sa lewe vuqa edaidai me vaka na veikalokalo mai lomalagi. 11(Me vakaikuritaki kemuni mada vakaudolu ko Jiova, na Kalou ni nomuni qase, ka vakalougatataki kemuni, me vaka sa vosataka vei kemuni!) 12Au na rawata vakaevei me'u vosota duadua na nomuni veibeitaki, kei na kemuni bibi, kei na nomuni veileti? 13Mo ni vakasaqara eso na tamata vuku, ka yalomatua, ka kilai, mai na nomuni veimataqali, me'u lesi ira me ra turaga vei kemuni. 14Ia kemuni a vosa vei au, ka kaya, Sa vinaka mo kitaka na ka ko sa kaya. 15Ia ka'u a kauti ira na tamata sa turaga e na nomuni veimataqali, na tamata sa vuku, ka kilai, ka lesi ira me ra liu vei kemuni, me ra turaga ni yayaudolu, ka turaga ni yayadrau, ka turaga ni yayalimasagavulu, ka turaga ni yayatini, kei na turaga lalai eso e na nomuni veimataqali. 16Ia ka'u a vakaroti ira na nomuni mataveilewai e na siga ko ya, ka kaya, Ni rogoca na ka e veiletitaki vei ira na wekamuni, ka lewa vakadodonu e na vuku ni tamata kei na kai nona, kei na vulagi sa tiko vata kaya: 17ni kakua ni kila na tamata ni kemuni sa ia na lewa: ni rogoci koya na tamata wale me vakataki koya sa tamata yaco; ni kakua ni rerevaka na mata ni tamata; ni kemuni sa lewa e na vuku ni Kalou: ia na ka sa dredre vei kemuni, mo ni kauta mai vei au, ia ka'u na rogoca. 18Ia ka'u a vakarota vei kemuni e na gauna ko ya na ka kecega mo ni cakava.
19Ia eda a tiko mai Orepi, ka lako e loma ni vanua liwa ka rerevaki ko ya, kemuni a raica e na sala ni nodra ulu-ni-vanua na Amoraiti, me vaka ka vakarota vei keda ko Jiova na noda Kalou; ia eda a yaco ki Ketesa-parinea. 20Ia ka'u a qai kaya vei kemuni, O ni sa yaco ki na nodra ulu-ni-vanua na Amoraiti, o koya sa solia vei keda ko Jiova na noda Kalou: 21raica, sa solia e matamuni na vanua ko Jiova na nomuni Kalou: mo ni lako cake mo ni taukena, me vaka na vosa i Jiova na Kalou ni nomuni qase vei kemuni; mo ni kakua ni rere, se yalolailai.
22Kemuni a qai toro mai vei au koi kemuni kecega, ka kaya, Me da tala na tamata eso me liu vei keda, me ra la'ki raica vinaka na vanua e na vukuda, ka mai tukuna vei keda na sala me da muria, kei na veikoro eda na lako kina. 23Ka sa vinaka vei au na vosa ko ya: ka'u a qai kauta e lewe tinikarua vei kemuni, e dua mai na mataqali yadua: 24a ra a gole yani, ka cabeta na ulu-ni-vanua, ka yaco ki na buca ko Esikoli, ka yamata. 25A ra sa taura e ligadra eso na vuata ni vanua, ka kauta sobu mai vei keda, ka mai tukutuku vei keda, ka kaya, Sa vinaka na vanua sa solia vei keda ko Jiova na noda Kalou.
26Ia kemuni a bese ni lako cake, ka sa talaidredre ga ki na vosa i Jiova na nomuni Kalou: 27ia kemuni a vosa kudrukudru ga e na nomuni veivale laca, ka kaya, Sa cati keda ko Jiova, sa kauti keda kina mai na vanua ko Ijipita, me soli keda ki na ligadra na Amoraiti, me ra vakawabokotaki keda: 28eda na lako cake kivei? era sa vakawaicalataka na yaloda na wekada, ni ra kaya, Era sa tamata lelevu ka babalavu, ka lailai koi keda; sa lelevu na veikoro, a sa yala ki lomalagi na kedra bai: ia keitou a kunei ira talega kina na luve i Anaki.
29Au a qai kaya vei kemuni, Mo ni kakua ni domobula, se rerevaki ira: 30o Jiova na nomuni Kalou o koya sa liutaki kemuni, ena vala ko koya e na vukumuni, me vaka na ka kecega sa kitaka e na vukumuni, e matamuni mai Ijipita; 31kei na vanua liwa, ko ni a raica kina ni sa keveti kemuni ko Jiova na nomuni Kalou, me vaka sa keveta na luvena na tamata, e na sala kece ko ni a lako kina, ko ni a yaco mada kina ki na yasana oqo.
32Ia e na ka oqo, ko ni a sega kina ni vakadinati Jiova na nomuni Kalou, 33ko koya ka liutaki kemuni e na sala, me qara na nomuni yasana mo ni tiko kina; e na bukawaqa e na bogi, kei na o e na siga, me vakaraitaka vei kemuni na sala mo ni lako kina.
34A sa rogoca na nomuni vosa ko Jiova, a sa cudru mai, a sa bubului, ka kaya, 35Sa sega dina e dua vei ira na tamata oqo, e nai tabatamata ca oqo, ena raica na vanua vinaka ko ya, ka'u a bubului kina me'u solia vei ira na nomuni qase, 36ko Kelepi duaduaga na luve i Jifune; ena raica ko koya, ia ka'u na solia vua na vanua sa butuka ko koya, vei ira talega na luvena, ni sa muri Jiova tikoga ko koya. 37Sa cudru talega vei au ko Jiova e na vukumuni, a sa kaya, Ko iko talega, ko na sega ni yaco kina: 38ena lako kina ko Josua, na luve i Nuni, ko koya sa dautu e matamu; mo vakaukauwataki koya: ni na kauti ira kina na Isireli ko koya, me ra taukena. 39Kei ira talega na nomuni lalai, ko ira kemuni a kaya era na bobula, kei ira na luvemuni, era sa sega ni kila e na siga oqo na ka vinaka se na ka ca, era na lako kina, ia ka'u na solia vei ira me ra taukena: 40ia koi kemuni, mo ni gole tani, ka lako ki na vanua liwa e na sala vaka ki na Wasa Damudamu.
41Kemuni a qai vosa, ka kaya vei au, Keimami sai valavala ca vei Jiova, keimami na lako cake ka vala, me vaka na ka kecega sa vakarota vei keimami ko Jiova na noda Kalou. Ia kemuni a vauca na tamata yadua na nonai yaragi ni valu, ka sa vakarau me cabeta na ulu-ni-vanua. 42A sa kaya vei au ko Jiova, Mo kaya vei ira, Ni kakua ni lako cake, se vala; ni'u sa sega ni tiko e na kemuni maliwa; de kemuni sa moku e matadra na nomuni meca. 43Ka'u a qai vosa vei kemuni; ia kemuni a bese ga ni vakarogoca, ka sa talaidredre ga ki nai vakaro i Jiova, ka cabe vakaqaqasodrosodro ki na ulu-ni-vanua. 44A ra sa mai la'ki tavaki kemuni na Amoraiti era tiko e na ulu-ni-vanua ko ya, ka vakasavi kemuni, me vaka sa kitaka na lagotavuivui daukata, ka mokuti kemuni mai Sia, ka yacovi Orima. 45Kemuni a qai lesu mai ka tagi e na mata i Jiova; ia ka sa sega ni rogoca na domomuni ko Jiova, se vakatu daliga vei kemuni. 46Kemuni a qai tiko mai Ketesa ka bogi vuqa, me vaka na veibogi kemuni a tiko mai kina.
Currently Selected:
NAI VAKARUA 1: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific