KOLOSA 1
1
Sa vakavinavinaka e na vukudra ko Paula, a sa vakadinadinataka nai vakavuvuli kei Karisito, a sa masulaki ira, a sa qai tukuni Jisu kei na nodra bula e na vukuna, 129.
1Koi au ko Paula, nai apositolo i Jisu Karisito e na lewa ni Kalou, ko Timoci talega na taciqu, 2vei ira era sa lotu ka veiwekani dina, era sa tu vata kei Karisito, era sa tiko mai Kolosa: Me nomudou na loloma, kei na vakacegu, mai vua na Kalou ko Tamada.
3Keirau sa vakavinavinaka vua na Kalou na Tama i Jisu Karisito na noda Turaga, ka masulaki kemudou e na veisiga, 4ni keirau a rogoca na nomudou vakabauti Karisito Jisu, kei na nomudou loloma vei ira kecega era sa lotu, 5e na vuku ni ka dou sa vakanuinuitaka, o koya sa maroroi mai lomalagi me nomudou, ia dou a rogoca kina e na vosa dina ni tukutuku-vinaka, 6sa yaco vei kemudou, me vaka talega ki vuravura taucoko; a sa vuataka na vuana, ka sa tubu tiko, me vaka talega kina vei kemudou, a sa vakatekivu vata kei na siga dou a rogoca kina, ka kila dina na loloma ni Kalou: 7me vaka dou sa kila maivei Epafira, a neirau i tokani daulomani, ia nai talatala yalodina i Karisito vei kemudou: 8o koya talega sa tukuna vei keirau na nomudou loloma e na Yalo Tabu.
9E na vuku ni ka oqo koi keirau talega, sa vakatekivu vata kei na siga keirau a rogoca kina, keirau sa sega ni mudu kina ni masulaki kemudou, ka masu mo dou vakasinaiti e na nomudou kila na lomana, e na yalomatua kei na vuku vakayalo kecega; 10mo dou ia nai valavala e kilikili kei ira sa nona na Turaga, me vinakata kecega ko koya, mo dou vakavuana tiko e na cakacaka vinaka kecega, me tubu cake talega na nomudou kila na Kalou; 11mo dou kaukauwa mai e na kaukauwa kecega, me vaka na nona kaukauwa vakaidina, me tubu na vosota kecega kei na vosota vakadede e na marau; 12mo dou vakavinavinaka vua na Tamada, o koya sa vakarautaki keda me da rawata na kedrai votavota era sa yalosavasava, e na rarama: 13o koya sa vakabulai keda mai na lewa ni butobuto, a sa kauti keda ki na matanitu nei koya na nona Gone ni toko: 14ko koya eda sa rawata kina na bula e na vuku ni nona dra, ni sa bokoci na nodai valavala ca: 15ko koya na yaloyalo ni Kalou sa sega ni rairai, ka vakatuburi eliu ka qai muri na ka kecega ka caka: 16ni sa cakava na ka kecega ko koya, se ra tu mai lomalagi, se ra tu e vuravura, se ra rairai se ra sega ni rairai, se ra veitikotiko vakaturaga, se ra veimatanitu, se ra turaga sa liu, se ra turaga kaukauwa: sa cakava na ka kecega ko koya, ka me nona talega; 17a sa bula eliu ko koya sa muri na ka kecega, ka sa vakataudeitaka na ka kecega ko koya. 18O koya na ulu talega ni yago, nai soqosoqo lewe ni lotu: o koya nai vakatekivu, na ulumatua mai na mate; me uasivi cake kina ko koya e na ka kecega.
19Ni sa vinakati me sinai ko koya e na ka kecega; 20ka me vakaveivinakatitaki ira kaya na ka kecega e na vukuna, ni sa ia mada na ka ni veivinakati e na nona dra ni sa lauvako ki na kauveilatai; io, e na vukuna ga, se ra tu e vuravura se ra tu mai lomalagi.
21Oi kemudou talega, dou a kai tani eliu ka meca e na vu ni yalomudou e na cakacaka ca, sa qai vakaveivinakatitaki kemudou ko koya, 22e na yagona vakalewe ni sa mate, me vakaraitaki kemudou kina ni dou sa yalosavasava ka sega ni beitaki rawa ka sega ni vunauci rawa e matana; 23kevaka dou sa vakabauta tikoga ka vakataudeitaki ka vakaukauwataki, ka sega ni vukici tani mai nai nuinui ni tukutuku-vinaka dou a rogoca, ka sa vunautaki vei ira na tamata kecega sa tiko e ruku i lomalagi; ia koi au ko Paula au sa lesi meu kenai talatala.
24Au sa qai marau niu sa vakararawataki e na vukumudou, ka vakayacora e na yagoqu na kena vo ni rarawa e na vuku i Karisito, e na vuku ni yagona, ko ya nai soqosoqo lewe ni lotu: 25au sa lesi kina meu kenai talatala, me vaka nai lesilesi ni Kalou, au sa lesi kina e na vukumudou, meu vakayacora na vosa ni Kalou: 26na ka vuni ka vunitaki maivei ira nai tabatamata e na gauna eliu, ia sa qai vakaraitaki mai vei ira na nona tamata yalosavasava: 27ni sa vinakata na Kalou me vakatakila vei ira na kena vakaidina kei na kena talei ni ka vuni oqo e na kedra maliwa na veimatanitu; oqori na Karisito e na lomamudou, na vu ni kena nuitaka na kalougata: 28o koya keitou sa vunautaka, ni keitou sa vakasalataka tiko na tamata yadua, ka vakavulica na tamata yadua e na vuku kecega; me keitou vakaraitaka kina na tamata yadua ni sa vinaka sara e na vuku i Karisito: 29oqo na ka kau sa daucakacaka talega kina, kau sa gumatua talega me vaka na nona cakacaka sa mana e na lomaqu.
Currently Selected:
KOLOSA 1: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific