NAI VAKATEKIVU 2
2
Sa lesi na siga tabu, 1-3. Ai bulibuli ni ka kecega, 4-6, kei nai bulibuli ni tamata, 7. A were ko Iteni, 8-17. Sa vakayacani na ka kecega; a sa buli ko Ivi. 18-25
1A sa buli oti na lomalagi kei vuravura, kei na lewena kecega. 2Ia e na kenai kavitu ni siga sa vakaotia na Kalou na nona cakacaka sa kitaka ko koya; a sa vakacegu ko koya e na kenai kavitu ni siga mai na nona cakacaka kecega sa kitaka ko koya. 3A sa vakalougatataka na kenai kavitu ni siga na Kalou ka vakatabuya; ni sa vakacegu kina mai na nona cakacaka kecega sa bulia na Kalou ka kitaka.
4Sa vakaoqo nai tukutuku kei lomalagi kei vuravura ni sa buli, e na siga sa bulia kina na vuravura kei lomalagi na Kalou ko Jiova, 5kei na kau kecega ni vanua ni sa bera ni tu e vuravura, kei na co kecega ni vanua ni sa bera ni tubu: ni sa sega ni vakatauca na uca ki vuravura na Kalou ko Jiova, a sa sega na tamata me wereca na vanua. 6Ia sa kuvu cake na kabukabu mai na qele, ka vakasuasuataka na dela ni vanua taucoko.
7A sa bulia na tamata na Kalou ko Jiova mai na kuvu ni qele, ka ceguva ki na ucuna nai cegu ni bula, a sa yaco kina na tamata me yalo bula.
8A sa tea e dua na were na Kalou ko Jiova, mai na tu-i-cake mai Iteni, a sa kauta kina na tamata ka bulia ko koya. 9A sa vakatubura mai na qele na Kalou ko Jiova na kau kecega sa vinaka na kenai rairai, ka yaga me kakana; na kau ni bula talega e loma ni were, kei na kau sa kilai kina na ka vinaka kei na ka ca. 10A sa drodro e dua na uciwai mai Iteni me vakasuasuataka na were; a sa wase maikea, ka yaco me va na kenai davedave. 11A yaca ni kenai matai, ko Paisoni; ko ya sa volita na vanua taucoko ko Avila, sa kune kina na koula; 12a sa vinaka na koula ni vanua ko ya; sa kune talega kina na mata-ni-civa, kei na vatu na yacana na onikisa. 13Ia na yaca ni kenai karua ni uciwai, ko Kioni; ko ya sa volita na vanua taucoko ko Iciopea. 14Ia na yaca ni kenai katolu ni uciwai, ko Itikeli: ko ya sa lako vaka ki Asiria, vaka ki na tu-i-cake. Ia nai kava ni uciwai na Uferetisi.
15A sa kauta na tamata na Kalou ko Jiova, ka vakatikora ki na were ko Iteni me wereca ka vakatawa. 16A sa vakarota na tamata na Kalou ko Jiova, ka kaya, E tara mo kana mai na kau kecega sa tu e na were: 17ia mai na kau sa kilai kina na ka vinaka kei na ka ca, mo kakua ga ni kana kina: ni ko na mate vakaidina e na siga ko sa kana kina.
18A sa kaya na Kalou ko Jiova, Sa sega ni vinaka me tiko duadua na tamata: au na bulia e dua na dauveivuke e yaga vua. 19Ia na Kalou ko Jiova sa bulia mai na qele na manumanu kecega ni vanua, kei na manumanu vuka kecega: ka sa kauti ira vei Atama, me raica se cava na yaca ena vakatokai ira kina. Ia na yaca sa vakatoka kina na ka bula kecega ko Atama, ko ya ga na yacana. 20A sa vakayacana na manumanu kecega ko Atama, kei na manumanu vuka, kei na manumanu tawa lasa ni vanua; ia sa sega ni kune vei Atama e dua na dauveivuke e yaga vua. 21Ia na Kalou ko Jiova sa vakayacora me biti Atama e dua na moce lutu, a sa moce kina ko koya: a sa kauta tani ko koya e dua na sui ni sarisarina, a sa cakava na lewena me veiuturi me kenai sosomi: 22ia na sui ni sarisarina ka kauta tani na Kalou ko Jiova mai vua na tagane, sa bulia kina e dua na yalewa, a sa kauti koya vei Atama. 23A sa kaya ko Atama, Oqo dina na sui mai na suiqu, kei na lewe mai na lewequ: ena vakatokai ko koya me yalewa, ni sa kauti tani mai vua na tagane. 24O koya oqo sa na biuta kina na tamana kei tinana na tagane, ka kabita na watina: a rau na lewe dua ga. 25A rau sa luvawale, na tagane kei na watina, a rau sa sega ni madua.
Currently Selected:
NAI VAKATEKIVU 2: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific