2 PITA 1
1
Sa vakavulici ira ko Pita me kakua ni yali vei ira e dua na ka vinaka; ka me ra gumatua sara me curu ki lomalagi, 111. Sa vakarota matua vei ira me ra gumatua sara me ra vakabauti Jisu, 1221.
1Oi au ko Saimoni Pita, ai talatala kei nai apositolo i Jisu Karisito, vei ira era rawata na vakabauta talei sa tautauvata kei na neitou e na yalododonu ni noda Kalou ko Jisu Karisito nai Vakabula: 2Me vakalevutaki vei kemudou na loloma kei na vakacegu ni dou sa qai kila na Kalou, kei Jisu na noda Turaga.
3Ni sa solia mai vei keda ko koya e na nona kaukauwa Vakalou na ka kecega sa yaga e na noda bula kei na lotu talega, ni da kilai koya sa kacivi keda ki na vanua vakaiukuuku kei nai valavala vinaka: 4o koya oqo sa soli kina vei keda na vosa ni yalayala e levu sara ka talei: mo dou rawata kina na ka sa Vakalou, ni dou sa dro tani mai na dukadukali sa tu e vuravura e na vuku ni daugagadre ca. 5Ia, e na vuku ni ka oqo, dou gumatua vakalevu sara kina, mo dou vakaikuritaka na nomudou vakabauta e nai valavala vinaka; kei nai valavala vinaka e na vuku; 6kei na vuku e nai valavala malua; kei nai valavala malua e na vosota; kei na vosota e na daulotu; 7kei na daulotu e na veilomani vakaveitacini; kei na veilomani vakaveitacini e na yalololoma. 8Ia kevaka sa tu ga e na lomamudou na veika oqo, ka sa tubu cake me levu, era sa uqeti kemudou mo dou kakua ni vucesa se tawa vua e na nomudou kila na noda Turaga ko Jisu Karisito. 9Ia ko koya sa sega vua na veika oqo sa mataboko, a sa matabuawa, a sa guilecava ni sa vakasavasavataki tu mai na nonai valavala ca eliu. 10Ia koi kemudou na veiwekani, dou gumatua cake kina, mo dou vakataudeitaka sara na nomudou kacivi kei na nomudou digitaki; ni dou na sega sara ni bale, kevaka dou sa kitaka na veika oqo: 11ni na soli vakayauyau vakakina me rawarawa vei kemudou me curu ki na matanitu tawa mudu ni noda Turaga kei nai Vakabula ko Jisu Karisito.
12O koya oqo kau na sega ni guca kina niu sa vakananumi kemudou tiko e na veika oqo, ia sa dina ga dou sa kila, ka dou sa vakataudeitaki e nai vakavuvuli dina oqo. 13Ia kau sa vakasama, ni sa dodonu, e na veisiga kau sa tiko kina e na vale vakacevaceva oqo, meu vakauqeta na lomamudou mo dou nanuma; 14niu sa kila kau sa voleka ni biuta tani na noqu vale vakacevaceva, me vaka sa tukuna mai vei au na noda Turaga ko Jisu Karisito. 15Ia kau na gumatua mada mo dou nanuma tikoga na veika oqo, niu sa mate.
16Ni keitou a sega ni muria nai tukuni sa caka vakavuku, ni keitou a tukuna vei kemudou na nona kaukauwa kei na nona lako mai na noda Turaga ko Jisu Karisito, ia keitou a raica dina ga na nonai valavala vakaturaga. 17Ni sa yaco vei koya mai vua na Kalou ko Tamana na vakarokoroko kei na vakadokadokai, ni sa rogo sara vua na domo ko ya mai nai ukuuku dina sara vakaoqo, O koya oqo na noqu Gone ni toko, au sa dauvinakata vakalevu. 18Ia na domo oqo mai lomalagi keitou sa rogoca, ni keitou a tiko kaya e na ulu-ni-vanua tabu.
19A sa tu talega vei keda na vosa sa vakadinadinataki vakalevu cake, a parofisai; ia dou na caka vinaka, kevaka dou sa vakananuma kina, me vaka ki na cina sa serau e na vanua sa butobuto, ka malua me kida mai na mataka, ka cabe mai ki na lomamudou na kalokalo i vola siga; 20ni dou sa kila taumada na ka oqo, ni sa sega na parofisai e nai Vola Tabu, sa vu e na kena kilai eliu na kenai balebale; 21ni sa sega ni vu na parofisai e na gauna eliu e na lewa ni tamata: sa vosa ga na tamata yalosavasava ni Kalou me vaka sa vakauti ira na Yalo Tabu.
Currently Selected:
2 PITA 1: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific