2 TUI 1
1
Sa tukuna ko Ilaija, ni na mate ko Easaia na tui Isireli; ka na qai taravi koya ko Jiorami.
1Ia ni sa mate ko Eapi, sa qai bese ni qaravi ira tiko na Isireli ko ira na Moapi.
2A sa lutu sobu ko Easaia, mai nai sogo cicila e nonai taba loma-ni-vale e cake mai Samaria, a sa malumalumu kina: a sa tala eso na tamata ko koya, a sa kaya vei iratou, Dou la'ki tarogi Peali-sipupi na kalou ni Ekironi, se'u na bula tale mai na malumalumu oqo, se segai. 3A sa kaya na agilose i Jiova vei Ilaija na kai Tisipa, Mo ia, mo la'ki tavaki iratou nai talaki nei tui Samaria, ka kaya vei iratou, Sa sega beka na Kalou e Isireli, dou sa lako kina me tarogi Peali-sipupi na kalou ni Ekironi? 4O koya oqo sa kaya kina ko Jiova, Ko na sega ni kevu sobu tale mai nai mocemoce ko sa cabe cake kina, ia ko na mate vakaidina ga. A sa lako yani ko Ilaija.
5A sa lesu tale vua ko iratou nai talaki, a sa kaya vei iratou ko koya, A cava dou sa qai lesu tale mai kina? 6A ratou sa kaya vua, Sa lako cake mai e dua na tamata me tavaki keitou, ka sa kaya vei keitou, Dou lesu tale vua na tui ka talai kemudou, ka kaya vua, Sa vosa vakaoqo ko Jiova, Sa sega beka na Kalou e Isireli, ko sa talatala kina me tarogi Peali-sipupi na kalou ni Ekironi? o koya oqo ko na sega ni kevu sobu tale mai nai mocemoce ko sa cabe cake kina, ia ko na mate vakaidina ga. 7A sa kaya vei iratou ko koya, A tamata vakacava ka lako cake me tavaki kemudou, ka tukuna vei kemudou na vosa oqo? 8A ratou sa kaya vua, A tamata sa vakaisulu e nai sulu vuti ka ni manumanu, ka sa vau na tolona e nai vau kuli-ni-manumanu. A sa kaya ko koya, O koya ga ko Ilaija na kai Tisipa.
9Sa qai tala vua ko koya e dua na turaga ni le limasagavulu, kei ira vata kaya na nona le limasagavulu. A sa lako cake vua ko koya: ka raica, sa tiko ko koya e na dua na dela-ni-koro. A sa kaya vua ko koya, O iko na tamata ni Kalou, sa kaya na tui, Mo lako sobu mai. 10A sa vosa ko Ilaija vua na turaga ni le limasagavulu, ka kaya, Kevaka ka'u sa tamata ni Kalou, me lako sobu mai lomalagi na bukawaqa, ka kani iko kei ira na nomu le limasagavulu. A sa lako sobu mai lomalagi na bukawaqa, a sa kani koya kei ira na nona le limasagavulu. 11A sa baci tala tale vua ko koya e dua na turaga ni le limasagavulu, kei ira vata kaya na nona le limasagavulu: a sa vosa ko koya, ka kaya vua, O iko na tamata ni Kalou, sa kaya vakaoqo na tui, Mo kusarawa sobu mai. 12A sa vosa ko Ilaija, ka kaya vei ira, Kevaka ka'u sa tamata ni Kalou, me lako sobu mai lomalagi na bukawaqa, ka kani iko kei ira na nomu le limasagavulu. A sa lako sobu na bukawaqa ni Kalou mai lomalagi, ka kani koya kei ira na nona le limasagavulu. 13A sa qai tala tale ko koya na turaga ni kenai katolu ni le limasagavulu, kei ira vata kaya na nona le limasagavulu. A sa lako cake na kenai katolu ni turaga ni le limasagavulu, ka la'ki vakatekiduru e na mata i Ilaija, ka vakamamasu vua, ka kaya vua, O iko na tamata ni Kalou, me ka talei e matamu na noqu bula, kei na nodra bula na nomu tamata e le limasagavulu oqo: 14raica, sa lako sobu mai lomalagi na bukawaqa, ka kani rau na turaga ni le limasagavulu erau liu mai, kei na nodrau yayalimasagavulu: ia oqo, me ka talei e matamu na noqu bula. 15A sa kaya vei Ilaija na agilose i Jiova, Mo drau lako sobu kaya; kakua ni rerevaki koya. A sa cavu tu ko koya, ka lako sobu kaya vua na tui. 16A sa kaya vua ko koya, Sa vosa vakaoqo ko Jiova, Ni ko a talai iratou nai talaki me tarogi Peali-sipupi na kalou ni Ekironi, sa ka beka ni sa sega na Kalou e Isireli mo taroga nona vosa? O koya oqo ko na sega kina ni kevu sobu mai nai mocemoce ko sa cabe cake kina, ia ko na mate vakaidina ga.
17A sa mate ko koya, me vaka na vosa i Jiova ka vosataka ko Ilaija. A sa tekivu me lewa ko Jiorami me kenai sosomi, e na kenai karua ni yabaki i Jiorami na luve i Jiosafati na tui Juta; ni sa sega na luvena tagane.
18Ia na kena vo ni cakacaka i Easaia ka kitaka ko koya, sa sega li ni volai e nai vola ni veika sa caka e na nodra gauna na tui Isireli.
Currently Selected:
2 TUI 1: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific