2 KORINICA 1
1
Sa vakavinavinaka vua na Kalou ko Paula e na vukudra na kai Korinica, e na vukuna talega, 111. Sa via raici ira, a sa sega ni nona lomalomarua sa berabera kina ni lako, 1224.
1Koi au ko Paula, nai apositolo i Jisu Karisito e na lewa ni Kalou, kei Timoci na wekaqu, kivei ira nai soqosoqo lewe ni lotu ni Kalou mai Korinica, kei ira kecega era sa lotu mai Akaia taucoko: 2Me nomudou na loloma kei na vakacegu mai vua na Kalou ko Tamada, kei na Turaga ko Jisu Karisito.
3Me vakavinavinakataki na Kalou, o koya na Tama ni noda Turaga ko Jisu Karisito, a Tama ni loloma, kei na Kalou ni veivakacegui kecega; 4o koya sa vakacegui keitou e na neitou rarawa kecega, me keitou vakacegui ira rawa era sa rarawa e na dua na ka, e na veivakacegui keitou sa vakacegui kina mai vua na Kalou. 5Ia me vaka sa yaco vakalevu sara vei keitou na rarawa e na vuku i Karisito, sa vakacegui keitou vakalevu sara vakakina na Karisito. 6Ia kevaka keitou sa vakararawataki, sa ka mo dou vakacegui kina ka vakabulai, ka sa yaco oqo ni dou sa vosota talega na veika rarawa keitou sa vakararawataki kina; se keitou vakacegui, sa ka mo dou vakacegui kina ka vakabulai. 7Ia sa tu dei na neitou nuitaki kemudou, ni keitou sa kila, dou sa votai e na veivakararawataki, dou na votai talega e na veivakacegui.
8Ni keitou sa sega ni vinakata, na veiwekani, mo dou lecava na neitou rarawa sa yaco vei keitou mai Esia, ni keitou sa bitaki vakalevu sara, sa dredre kina na vosota, ka keitou sa sega ni dinata ni keitou na bula: 9ia keitou sa vaka ni keitou sa lewai me keitou mate, me keitou kakua ni vakararavi kina vei keitou, vua ga na Kalou o koya sa vakaturi ira cake tale na mate: 10o koya ka vakabulai keitou mai na mate levu ko ya, ka na vakabula tikoga: o koya talega keitou sa vakararavi kina ni na vakabula tikoga; 11ni dou veivuke talega e na masulaki keitou, me lewe vuqa kina era vakavinavinaka e na vuku i keitou, e na vuku ni ka sa soli vei keitou e na vukudra na lewe vuqa.
12Ia oqo na ka keitou sa reki kina, nai tukutuku ni neitou lewa eloma, ni sa ia na neitou i valavala e vuravura oqo e na loma e dua bauga, kei na loma dina vua na Kalou, ka vakalevu sara vei kemudou, sa segai e na vuku vakavuravura, e na loloma ga ni Kalou. 13Ni sa sega na ka tani keitou sa vola vei kemudou, oqori ga dou sa wilika se kila; ia kau sa vakadinata dou na kila ka yacova nai vakataotioti, 14me vaka na nomudou kilai keitou ga e na ka eso; ni keitou sa nomudou mo dou reki kina, me vaka dou sa neitou ka ni reki talega, e na siga ni Turaga ko Jisu.
15Ia ni kau a vakadinata oqo kau a nanuma meu lako eliu vei kemudou, me yaco kina vakarua vei kemudou nai solisoli loloma; 16ka meu qai laivi kemudou ka lako ki Masitonia ka lesu tale mai Masitonia vei kemudou, mo dou kauti au e na noqu lako vaka ki Jutia. 17Ia ni kau a nanuma me vakaoqo, au sa qai lomalomarua kina, se segai? se na ka kau sa nakita, au sa nakita vakavuravura beka, me tu kina vei au na io io, kei na sega sega?
18Ia me vaka na nona dina na Kalou, sa vakakina sa sega ni io ka sega ni sega na neitou vosa vei kemudou. 19Ni sa sega ni io ka sega ni sega na neitou vunautaka vei kemudou na Luve ni Kalou, ko Jisu Karisito, oi keitou kei Silivenuse kei Timoci, a sa cakava ga ko koya me io: 20ni sa io na vosa ni yalayala kecega ni Kalou e na vukuna, era sa vakaemeni talega e na vukuna, me vakacaucautaki na Kalou e na vuku i keitou. 21Ia sai koya na Kalou sa vakataudeitaki keitou kei kemudou me da tu vata kei Karisito, a sa lumuti keda; 22o koya talega sa dregati keda, a sa solia ki na lomada na Yalo Tabu me kenai sevu.
23Ia kau sa kaciva na Kalou me lewa na yaloqu kevaka kau sega ni dina, ni sa noqu lomani kemudou ga kau sa vakaberaberataka kina na noqu lako ki Korinica. 24Sa segai ni keitou sa veitaliataka na nomudou vakabauta, keitou sa veivuke ga e na nomudou reki: ni dou sa tu dei ga e na vakabauta.
Currently Selected:
2 KORINICA 1: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific