ዮሃኒሳ 13
13
ዬሱሲ ባሬ ካሊያዋንቱ ጌዲያ ሜጬዳ
1ፓሲጋ ቦንቺያ ጋላሳይ ጋካናፔ ካሴቲዴ፥ ሃ ሳዓፔ ሻኬቲዴ፥ ኣዉዋኮ ቢያ ዎዲ ጋኬዳዋ ዬሱሲ ኤሬዳ፤ ሃ ሳዓን ዴዒያ ባሬዋንታ ኡባ ዎዴ ሲቄዳ፤ ዉርሴይ ጋካናው ኡንቱንታ ሲቄዳ።
2ዬሱሲኔ ካሊያዋንቱ ካዉዋ ሚሺን፥ ሲሞና ናዓ ዪሁዳ ኣስቆሮቱ ዬሱሳ ኣ ኢማናዳን፥ ፃላሂ ኣ ቆፊሲ ዎዳ። 3ዬሱሲ ባሬ ኣዉ ኡባባ ኣ ኩሺያን ዎዳዋ፥ ቃሲ ፆሳ ማታፔ ኢ ዬዳዋኔ፥ ሲሚዴ ኣኮ ባናዋ ኤሬዳ። 4ዬሱሲ ሚያሳፔ ዴንዲ ኤቂዴ፥ ቦላ ባጋ ማዩዋ ቃሪ ዎዴ፥ ፖፃ ባሬ ፄሳን ዳንጬዳ። 5ሄዋፔ ጉዪያን፥ ሃ ሜቻ ሚሻን ቲጊዴ፥ ባሬና ካሊያዋንቱ ጌዲያ ሜቻኔ ባሬ ፄሳን ዳንጬዳ ፖፃን ቁጩሳ ዶሜዳ።
6ዬሱሲ ሲሞኒ ጴፂሮሳኮ ዪና ጴፂሮሴ፥ «ጎዳው፥ ኔኒ ታ ጌዲያ ሜጫናው ሃናዪዬ?» ያጌዳ።
7ዬሱሲ ዛሪዴ ኣ፥ «ታኒ ኦያዋ ኔኒ ሃዒ ኤራካ፤ ሺን ጉዬፔ ኤራናሳ» ያጌዳ።
8ጴፂሮሴ፥ «ኔኒ ታ ጌዲያ ኡባካ ሜጫካ!» ያጌዳ።
ዬሱሲ ኣ፥ «ታኒ ኔ ጌዲያ ሜጫና ዮፔ፥ ኔዉኔ ታዉኔ ኢቲፔቴይ ባዋ» ያጊዴ ዛሬዳ።
9ሲሞና ጴፂሮሴ ዬሱሳ፥ «ጎዳው፥ ያቶፔ፥ ታ ጌዲያ ፃላላ ሜጮፓ፤ ታ ኩሺያካ ታ ሁጲያካ ሜጫ!» ያጌዳ።
10ዬሱሲ ዛሪዴ፥ «ቦላ ሜጬቲዲጌዳ ኡራይ ኦኒኔ ጌዲያፔ ሃራባ ሜጬታናው ኮሼና፤ ኣው ኡባሳይካ ጌሻ። ቃሲ ሂንቴንቱካ ጌሻ፤ ሺን ኡባይ ጌሻ ጊዲኪታ» ያጌዳ። 11ኣዪሲ ጎፔ፥ ዬሱሲ ባሬና ኣ ኢማና ኡራይ ኦኔንቶኔ ኤሬዳ፤ ኢ፥ «ሂንቴንቱ ኡባይ ጌሻ ጊዲኪታ» ጌዳዌ ሃዋሳ።
12ኡንቱንቱ ጌዲያ ሜጬዳዋፔ ጉዪያን፥ ዬሱሲ ባሬ ማዩዋ ማዪዴ፥ ባሬሳ ጉዬ ሲሚ ቢ ኡቲዴ ኡንቱንታ ያጌዳ፤ «ታኒ ሂንቴንቱሲ ኦዳዋ ኣኬኪቴ? 13ሂንቴንቱ ታና፥ ታማሪሲያዎኔ ጎዳው ጊታ፤ ታኒ ሄ ሂንቴንቱ ጊያዋ ጊዲያ ዲራው፥ ሎይዲታ። 14ታኒ ሂንቴንቱሲ ጎዳኔ ሂንቴንታ ታማሪሲያዋ ጊዳዴ፥ ሂንቴንቱ ጌዲያ ሜጪያዋ ጊዶፔ፥ ሂንቴንቱካ ኢቱ ኢቱዋ ጌዲያ ሜጫናው ቤሴ። 15ኣዪሲ ጎፔ፥ ታኒ ሂንቴንቱሲ ኦዳዋዳን፥ ሂንቴንቱካ ኦና ማላ፥ ሂንቴንቱሲ ሌሚሱዋ ጊዳዲ። 16ታኒ ሂንቴንቱሲ ቱሙዋ ኦዳይ፤ ቆማይ ባሬ ጎዳፔ ኣና። ቃሲ ኪቴቴዳ ኡራይካ ባሬና ኪቴዳዋፔ ኣና። 17ሂንቴንቱ ሄዋ ኤሪዴ ኦያዋ ጊዶፔ ኣንጄቴዳዋንታ።
18«ታኒ ሂንቴንቶ ኡባባ ሃሳዪኬ። ታኒ ዶሬዳዋንታ ኤራይ፤ ሺን ፆሳ ማፃፋይ፥ ‹ታኒ ባርሴዳዌ ታ ኩሺያ ሳዔዳ› ጌዳዌ ቱማ ጊዳናው ቤሴ። #ማዝ 41፡9 19ሄዌ ሃኒያ ዎዴ ታኒ ታና #13፡19 ታኒ ታና፡ ዮህ 8፡24 ፄሊቴ። ጊዲያዋ ሂንቴንቱ ኣማናና ማላ፥ ሄዌ ሃናናፔ ካሴታዴ ሂንቴንቱሲ ሃናናዋ ኦዳይ። 20ታኒ ሂንቴንቱሲ ቱሙዋ ኦዳይ፤ ታኒ ኪቲያ ኦናኔ ሞኪያ ኡራይ ታናካ ሞኬ፤ ቃሲ ታና ሞኪያ ኦኒኔ ታና ኪቴዳዋ ሞኬ» ያጌዳ።
ዬሱሲ ባሬና ኣ ኢማናዌ ኦኔንቶ ካሴቲዴ ኦዴዳ
(ማት 26፡20-25፤ ማር 14፡17-21፤ ሉቅ 22፡21-23)
21ዬሱሲ ሄዋ ሃሳዬዳዋፔ ጉዪያን፥ ባሬ ዎዛናን ዳሮ ሜቶቲዴ፥ «ታኒ ሂንቴንቱሲ ቱሙዋ ኦዳይ፤ ታና ሂንቴፔ ኢቱ ኣ ኢማናዋ» ጊዴ ቆንጪያን ኦዴዳ።
22ኢ ኦና ሃሳዪንቶኔ፥ ካሊያዋንቱሲ ኡባካ ኤሬቴናን ኢፂና፥ ኢቱ ኢቱዋ ፄሌዲኖ። 23ዬሱሳ ካሊያዋንቱፔ ኢቱ፥ ዬሱሲ ሲቂያዌ፥ ዬሱሳ ማታን ኡቴዳ። 24ሄዋ ዲራው፥ ሲሞና ጴፂሮሴ ሄ ካሊያዋ ሲሚዒዴ፥ «ኢ ኦና ጊንቶ፥ ኣኔ ኣ ኦቻ» ያጌዳ።
25ሄዋ ዲራው፥ ሄ ካሊያዌ ዬሱሳ ሃይኮ ሺቂዴ፥ «ጎዳው፥ ኢ ኦኔ?» ያጌዳ።
26ዬሱሲ ዛሪዴ፥ «ታኒ ኡኪን ጫባ ቱሻዴ ኢሚያዌ ኣ» ያጌዳ። ቃሲ ኡኪ ሜን ኣኪዴ፥ ጫባ ቱሺዴ፥ ሲሞና ናዓ፥ ዪሁዳ ኣስቆሮቱሲ ኢሜዳ። 27ዪሁዳይ ኡኪ ሜንዋ ኣኮዋፔ ጉዪያን፥ ሴፃናይ ኤሌካ ዪሁዳን ጌሌዳ። ዬሱሲ ኣ፥ «ኔኒ ኦናዋ ኤሌላ ኦ!» ያጌዳ። 28ሺን ሄ ሳዓን ኡቴዳዋንቱፔ ኦኒኔ ዬሱሲ ሄዋ ኣ ኣዪሲ ጌዴንቶኔ ኤሪቤና። 29ዪሁዳይ ሚሻ ቃርጪቲያ ኦይቂያ ዲራው፥ ካሊያዋንቱፔ ኢቱ ኢቱ ዬሱሲ ዪሁዳ፥ «ፓሲጋ ቦንቺያ ጋላሳው ባሬና ኮሺያዋ ባዴ ሻማ ዎይ ሂዬሳው ሚፁዋታ ኢማ ጌዳ» ያጊዴ ቆፔዲኖ።
30ዪሁዳይ ኡኪ ሜንዋ ኣኪዴ፥ ኤሌካ ካሬ ኬሴዳ፤ ሄ ዎዴ ሳዓይ ቃማ።
ኦራ ኣዛዙዋ
31ዪሁዳይ ካሬ ኬሴዳዋፔ ጉዪያን፥ ዬሱሲ ያጌዳ፤ «ሃዒ ታኒ ኣሳ ናዓይ ቦንቼታዲ፡ ፆሳይካ ታ ባጋና ቦንቼቴዳ። 32ፆሳይ ታ ባጋና፥ ኣሳ ናዓ ባጋና ቦንቼቶፔ፥ ኢ ባሬ ሁጴው ታና ኣሳ ናዓ ቦንቻናዋ፤ ቃሲ ኢ ታና ኤሌካ ቦንቻናዋ። 33ታ ናቶ፥ ታኒ ሂንቴናና ዳሮ ዎዲያ ጋሚዒኬ። ሂንቴንቱ ታና ኮያና፤ ሺን ታኒ ኣዪሁዳቱዋ፥ ‹ታኒ ቢያሳ ሂንቴንቱ ባናው ዳንዳዪኪታ› ጌዳዋዳን፥ ሂንቴዉካ ሃዒ ኦዳይ። 34ታኒ ሂንቴንታ ኦራ ኣዛዙዋ ኣዛዛይ፤ ኢቱ ኢቱዋ ሲቂቴ። ታኒ ሂንቴንታ ሲቄዳዋዳንካ፥ ሂንቴንቱ ኢቱ ኢቱዋ ሲቃና ቤሴ። 35ሂንቴንቱ ኢቱ ኢቱዋና ሲቄቶፔ፥ ታና ካሊያዋንታ ጊዲያዋ ኣሳይ ኡባይ ኤራና» ያጌዳ።
ጴፂሮሴ ካዳናዋ ዬሱሲ ካሴቲዴ ኦዴዳ
(ማት 26፡31-35፤ ማር 14፡27-31፤ ሉቅ 22፡31-34)
36ሲሞኒ ጴፂሮሴ ዬሱሳ፥ «ጎዳው፥ ኔኒ ሃቃ ባይ?» ያጌዳ።
ዬሱሲ ዛሪዴ፥ «ታኒ ቢያሳ ኔኒ ሃዒ ታና ካላናው ዳንዳያካ፤ ሺን ጉዬፔ ካላና» ያጌዳ።
37ጴፂሮሴ፥ «ጎዳው፥ ታኒ ኔና ሃዒ ካላናው ኣዪሲ ዳንዳዪኪታ? ታኒ ኔ ዲራው፥ ሃይቃናዉካ ጊጋ ኡታዲ!» ያጌዳ።
38ዬሱሲ ዛሪዴ፥ «ታ ዲራው ሃይቃናው ሃዒ ቱሙ ጊጋ ኡታዲ? ታኒ ኔው ቱሙዋ ኦዳይ፤ ኩቱ ዋሳናፔ ካሴ፥ ኔኒ ታና ሄዙ ጌዴ ካዳናሳ» ያጌዳ።
Currently Selected:
ዮሃኒሳ 13: dwrENT
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
Learn More About Ooratha Caaquwaa