مەرقۆس 1
KSS
1
دەركەوتنی یەحیای كوڕی زەكەریا
1سەرەتای مزگێنی عیسای مەسیحی كوڕی خودا.
2لە پەڕتووكی ئیشایای پێغەمبەردا نووسراوە:
[من نێردراوی خۆم لەپێشتەوە دەنێرم،
ئەوەی ڕێگات بۆ ئامادە دەكات،]#1‏:2 مەلاخی 3‏:1.‏‏
3[كەسێك لە چۆڵەوانی هاوار دەكات و دەڵێت:
«ڕێگا بۆ هاتنی یەزدان ئامادە بكەن،
ڕێچكەكانی بۆ ڕێكبخەن.»]#1‏:3 ئیشایا 40‏:3.‏‏
4یەحیا هات، لە چۆڵەوانیدا خەڵكی لە ئاو هەڵدەكێشا و جاڕی لەئاوهەڵكێشانی#1‏:4 یۆنانی: باپتسمە، بە واتای شوشتن دێت بۆ پاكبوونەوە لە گوناە، وەك (بسمیلكردن). تۆبەكردنی دەدا بۆ گوناە بەخشین. 5خەڵكی هەموو گوندەكانی یەهودیا و هەموو ئۆرشەلیم دەهاتنە لای یەحیا، دانیان بە گوناهەكانیاندا دەنا و لە ڕووباری ئوردون لەلایەن ئەوەوە لە ئاو هەڵدەكێشران. 6جلوبەرگی یەحیا لە مووی وشتر بوو، پشتێنێكی چەرمیشی لە كەمەری دەبەست، كوللە و هەنگوینی كێوی دەخوارد. 7ئەمە پەیامەكەی ئەو بوو: «لەدوای من كەسێك دێت كە زۆر لە من بەهێزترە كە تەنانەت شایانی ئەوە نیم دابنەوێمەوە و قەیتانی پێڵاوەكانی بۆ بكەمەوە. 8من لە ئاوتان هەڵدەكێشم، بەڵام ئەو لە ڕۆحی پیرۆزتان هەڵدەكێشێت#1‏:8 بە واتای شوشتن دێت بۆ پاكبوونەوە لە گوناە بەهۆی ڕۆحی پیرۆز.
لەئاوهەڵكێشانی عیسا
9لەو ڕۆژانەدا عیسا لە ناسیرەوە هات، كە سەر بە ناوچەی جەلیلە و لەسەر دەستی یەحیا لە ڕووباری ئوردون لە ئاو هەڵكێشرا. 10هەر كە عیسا لە ئاوەكە هاتە دەرەوە، بینی ئاسمان شەقبوو، ڕۆحی پیرۆزیش وەك كۆترێك لەسەری نیشتەوە. 11دەنگێكیش لە ئاسمانەوە هات: «تۆ كوڕی خۆشەویستمی، بە تۆ زۆر دڵشادم.»
12دەستبەجێ ڕۆحی پیرۆز عیسای بەرەو چۆڵەوانی برد. 13چل ڕۆژ لە چۆڵەوانیدا لەنێوان ئاژەڵانی كێویدا بوو، شەیتان تاقی دەكردەوە، فریشتەكانیش خزمەتیان دەكرد.
هەڵبژاردنی قوتابییەكان
14دوای دەستگیركردنی یەحیا، عیسا هاتە جەلیل و مزگێنی خودای ڕادەگەیاند و 15دەیفەرموو: «كاتەكە هاتووەتە دی و پاشایەتی خودا نزیك بووەتەوە. تۆبە بكەن، باوەڕ بەم مزگێنییە بهێنن.»
16كاتێك عیسا لە كەناری دەریاچەی جەلیل دەڕۆیشت، شیمۆن و ئەندراوسی برای بینی، تۆڕیان فڕێدەدایە دەریاچەكە، چونكە ماسیگر بوون. 17عیسا پێی فەرموون: «وەرن دوام بكەون، دەتانكەم بە ڕاوكەری مرۆڤ#1‏:17 بەدەستهێنانی خەڵك تاكو ببنە قوتابی مەسیح.18دەستبەجێ تۆڕەكانیان بەجێهێشت و دوای كەوتن.
19ئینجا كەمێك دووركەوتەوە، یاقوبی كوڕی زەبدی و یۆحەنای برای بینی، لەناو بەلەمدا تۆڕەكەی خۆیان چاكدەكردەوە. 20یەكسەر بانگی كردن، ئەوانیش زەبدی باوكیان لەگەڵ كرێكاران لەناو بەلەمەكە بەجێهێشت و دوای كەوتن.
دەركردنی ڕۆحی پیس
21ئینجا چوونە كەفەرناحوم. لە ڕۆژی شەممەدا عیسا چووە كەنیشت و دەستی كرد بە فێركردنی خەڵك. 22خەڵكی لە فێركردنەكەی سەرسام بوون، چونكە وەك دەسەڵاتدارێك فێری دەكردن، نەك وەكو مامۆستایانی تەورات#1‏:22 مالم.. 23لە كەنیشتەكەیاندا یەكێكی لێبوو ڕۆحی پیسی تێدابوو، لەپڕ هاواری كرد، 24گوتی: «عیسای ناسیرەیی، چیت لێمان دەوێت؟ هاتووی لەناومان ببەیت؟ دەزانم تۆ كێیت، پیرۆزەكەی خودایت!»
25عیسا لێی ڕاخوڕی و فەرمووی: «بێدەنگ بە! لێی وەرە دەرەوە!» 26ڕۆحە پیسەكەش فێی لە پیاوەكە هێنا و بە دەنگی بەرز هاواری كرد و لێی هاتە دەرەوە.
27هەموو سەرسام بوون و كەوتنە پرسیار لە یەكتری: «ئەمە چییە؟ فێركردنێكی نوێیە بە دەسەڵاتەوە! فەرمان بە ڕۆحە پیسەكانیش دەدات و گوێڕایەڵی دەبن.» 28یەكسەر ناوبانگی بە هەموو ناوچەی دەوروبەری جەلیلدا بڵاو بووەوە.
چاككردنەوەی خەڵكێكی زۆر
29كاتێك عیسا لەگەڵ یاقوب و یۆحەنا كەنیشتەكەیان بەجێهێشت، چوونە ماڵی شیمۆن و ئەندراوس. 30خەسووی شیمۆن لەناو جێگا كەوتبوو، تای هەبوو، خێرا باسی ئەویان بۆ عیسا كرد. 31ئەویش هات، دەستی گرت و هەڵیستاندەوە. تایەكە بەریدا و دەستی بە خزمەتكردنیان كرد.
32ئەو ئێوارەیە لەپاش ڕۆژئاوابوون، هەموو نەخۆش و ئەو كەسانەیان بۆ دەهێنا كە ڕۆحی پیسیان تێدابوو. 33هەموو دانیشتووانی شارەكە لەبەر دەرگا كۆبوونەوە، 34عیسا ژمارەیەكی زۆر نەخۆشی بە جۆرەها دەردەوە چاككردەوە و زۆر ڕۆحی پیسیشی دەركرد و نەیهێشت ڕۆحە پیسەكان بدوێن، چونكە دەیانزانی كێیە.
مزگێنیدان لە ناوچەی جەلیل
35بەرەبەیانی ڕۆژی دواتر كە هێشتا تاریك بوو، عیسا هەستا و چووە شوێنێكی چۆڵ و لەوێ دەستی كرد بە نوێژكردن. 36شیمۆن و هاوڕێكانی بە شوێنیدا گەڕان، 37كە دۆزییانەوە پێیان گوت: «هەموو خەڵكەكە بەدواتدا دەگەڕێن.»
38عیسا پێی فەرموون: «وەرن، با بڕۆین بۆ دێیەكانی دەوروپشت، تاكو لەوێش پەیامەكەم ڕابگەیەنم، چونكە من بۆ ئەمە هاتووم.» 39ئینجا ڕۆیشت و لە هەموو جەلیلدا لەناو كەنیشتەكانیان پەیامی خودای ڕادەگەیاند و ڕۆحی پیسی دەردەكرد.
چاككردنەوەی نەخۆشی گولی
40پیاوێكی گول هاتە لای عیسا و لێی پاڕایەوە، چۆكی دادا و پێی گوت: «ئەگەر بتەوێت، دەتوانیت پاكم بكەیتەوە.»
41عیسا دڵی پێی سووتا و دەستی بۆ درێژكرد و دەستی لێدا و پێی فەرموو: «دەمەوێت. پاك بەرەوە!» 42دەستبەجێ گولییەكەی لێبووەوە و پاك بووەوە.
43دوای ئەوەی كە عیسا پیاوەكەی بە توندی ئاگادار كردەوە، دەستبەجێ بەڕێی كرد، 44پێی فەرموو: «ئاگاداربە، هیچ شتێك بە كەس مەڵێ، بەڵام بڕۆ خۆت بە كاهین#1‏:44 كاهین: پیاوێكی ئایینی جولەكەیە كە هەڵدەستێ بە ئەركی قوربانی كردن لەناو پەرستگا و فێركردنی خەڵك. پیشان بدە و بۆ پاكبوونەوەكەت ئەو قوربانییەی موسا فەرمانی كردووە بیكە، وەك شایەتییەك بۆیان.» 45بەڵام ئەو ڕۆیشت و دەستی بە جاڕدان و بڵاوكردنەوەی ئەم هەواڵە كرد، لەبەر ئەوە عیسا نەیتوانی بە ئاشكرا بچێتە ناو شار، بەڵكو لە دەرەوە لە شوێنە چۆڵەكاندا بوو و خەڵكیش لە هەموو لایەكەوە دەهاتنە لای.

Holy Bible, Kurdi Sorani Standard, KSS
Copyright © 1998, 2011, 2016 by Biblica, Inc‎.‎®‎‎
All rights reserved worldwide‎.

‫كتێبی پیرۆز، كوردی سۆرانی ستانده‌ر
‫© مافی چاپكردن پارێزراوه‌ ١٩٩٨، ٢٠١١، ٢٠١٦ له‌لایه‌ن ببلیكا‎
‫هه‌موو مافه‌كانی پارێزراوه‌.‎

Learn More About كوردی سۆرانی ستانده‌رد