مَتَّى 1
ع.د.ت19

مَتَّى 1

1
جُدود المسيح
1دَاهُو قُرْمَةْ هَنَا جُدُودْ عِيسَى الْمَسِيحْ إِبْن دَاوُدْ إِبْن إِبْرَاهِيمْ.
2إِبْرَاهِيمْ وِلِدْ إِسْحَاقْ
وَ إِسْحَاقْ وِلِدْ يَعْقُوبْ
وَ يَعْقُوبْ وِلِدْ يَهُوذَا وَ أَخْوَانَهْ.
3وَ يَهُوذَا وِلِدْ فَارِصْ وَ زَارَحْ وَ أَمُّهُمْ تَامَارْ.
وَ فَارِصْ وِلِدْ حَصْرُونْ.
وَ حَصْرُونْ وِلِدْ رَامْ.
4وَ رَامْ وِلِدْ عَمِنَدَابْ.
وَ عَمِنَدَابْ وِلِدْ نَحْشُونْ.
وَ نَحْشُونْ وِلِدْ سَلْمُونْ.
5وَ سَلْمُونْ وِلِدْ بُعَازْ وَ أَمّ بُعَازْ هِي رَاحَابْ.
وَ بُعَازْ وِلِدْ عُبَيْد وَ أَمّ عُبَيْد هِي رَعُوثْ.
وَ عُبَيْد وِلِدْ يَسَّى.
6وَ يَسَّى وِلِدْ دَاوُدْ الْمَلِكْ.
وَ دَاوُدْ وِلِدْ سُلَيْمَانْ وَ أَمّ سُلَيْمَانْ، أَوَّلْ هِي مَرِةْ أُرِيَّا.
7وَ سُلَيْمَانْ وِلِدْ رَحَبْعَامْ.
وَ رَحَبْعَامْ وِلِدْ أَبِيَّا.
وَ أَبِيَّا وِلِدْ عَصَاةْ.
8وَ عَصَاةْ وِلِدْ يَهُوشَفَطْ.
وَ يَهُوشَفَطْ وِلِدْ يُورَامْ.
وَ يُورَامْ وِلِدْ عُزِّيَّا.
9وَ عُزِّيَّا وِلِدْ يُوتَامْ.
وَ يُوتَامْ وِلِدْ أَحَازْ.
وَ أَحَازْ وِلِدْ حِزْقِيَّا.
10وَ حِزْقِيَّا وِلِدْ مَنَسَّى.
وَ مَنَسَّى وِلِدْ آمُونْ.
وَ آمُونْ وِلِدْ يُوشِيَّا.
11وَ يُوشِيَّا وِلِدْ يُيَكِينْ وَ أَخْوَانَهْ وَ دَا فِي الزَّمَنْ الْفَوْقَهْ وَدَّوْا بَنِي إِسْرَائِيلْ فِي الْغُرْبَةْ فِي بَلَدْ بَابِلْ.
12وَ بَعَدْ وَدَّوْهُمْ فِي بَابِلْ، يُيَكِينْ وِلِدْ شَلْتِيِيلْ.
وَ شَلْتِيِيلْ وِلِدْ زَرُبَابِلْ.
13وَ زَرُبَابِلْ وِلِدْ أَبِهُودْ.
وَ أَبِهُودْ وِلِدْ أَلِيَاقِيمْ.
وَ أَلِيَاقِيمْ وِلِدْ عَزُورْ.
14وَ عَزُورْ وِلِدْ صَدُوقْ. وَ صَدُوقْ وِلِدْ أَخِيمْ.
وَ أَخِيمْ وِلِدْ أَلِيُودْ.
15وَ أَلِيُودْ وِلِدْ أَلِعَازَرْ.
وَ أَلِعَازَرْ وِلِدْ مَتَّانْ.
وَ مَتَّانْ وِلِدْ يَعْقُوبْ.
16وَ يَعْقُوبْ وِلِدْ يُوسُفْ.
وَ يُوسُفْ دَا رَاجِلْ مَرْيَمْ وَ مَرْيَمْ وِلْدَتْ عِيسَى الْبِنَادُوهْ الْمَسِيحْ.
17وَ خَلَاصْ مِنْ إِبْرَاهِيمْ لَحَدِّي دَاوُدْ، حَسَبَوْا 14 جُدُودْ. وَ مِنْ دَاوُدْ لَحَدِّي الْوَكِتْ الْوَدَّوْا فَوْقَهْ الْيَهُودْ فِي بَابِلْ، حَسَبَوْا 14 جُدُودْ. وَ مِنْ وَكِتْ وَدَّوْا الْيَهُودْ فِي بَابِلْ لَحَدِّي وَالُودَةْ الْمَسِيحْ، حَسَبَوْا 14 جُدُودْ.
والودة المسيح
18دَاهُو تَارِيخْ وَالُودَةْ عِيسَى الْمَسِيحْ. وَ أَمَّهْ أُسُمْهَا مَرْيَمْ وَ مَرْيَمْ دِي هِي بِنَيَّةْ عُدْرِيَّةْ وَ رَاجِلْ وَاحِدْ أُسْمَهْ يُوسُفْ كَرَبْ رَاسْهَا. وَ قُبَّالْ مَا يِشِيلْهَا، هِي بِقَتْ غَلْبَانَةْ بِقُدْرَةْ الرُّوحْ الْقُدُّوسْ. 19وَ يُوسُفْ رَاجِلْهَا دَا، هُو نَادُمْ صَالِحْ وَ مَا يِدَوْر يِعَيِّبْهَا قِدَّامْ النَّاسْ. وَ أَشَانْ دَا، هُو شَالْ نِيَّةْ يِطَلِّقْهَا بِعَشِيرْ.
20وَ وَكِتْ هُو لِسَّاعْ قَاعِدْ يِفَكِّرْ فِي الْكَلَامْ دَا، وَاحِدْ مِنْ مَلَائِكَةْ اللّٰهْ جَاءْ لَيَّهْ فِي رُؤْيَةْ وَ قَالْ: «يَا يُوسُفْ وِلَيْد دَاوُدْ، مَا تَخَافْ. شِيلْ مَرْيَمْ فِي بَيْتَكْ وَ خَلِّي تَبْقَى مَرْتَكْ أَشَانْ الصَّغِيرْ الْفِي بَطُنْهَا دَا، جَاءْ بِقُدْرَةْ الرُّوحْ الْقُدُّوسْ. 21وَ هِي تَلْدَ وِلَيْد وَ إِنْتَ تِسَمِّيهْ عِيسَى#1‏:21 عِيسَى: بكلام عِبْرَانِي، لُغّة اليَهُود، أُسْمه يَشُوع و معناته اللّه ينجّي. أَشَانْ هُو بَسْ النَّادُمْ الْيِنَجِّي شَعَبَهْ مِنْ ذُنُوبْهُمْ.»
22وَ كُلَّ يَبْقَى مِثِلْ دَا أَشَانْ الْكَلَامْ الْاللّٰهْ قَالَهْ بِخَشُمْ النَّبِي يِتِمّ: 23<الْبِنَيَّةْ الْعُدْرِيَّةْ تَبْقَى غَلْبَانَةْ وَ تَلْدَ وِلَيْد وَ يِسَمُّوهْ عِمَّانُوِيل.>#1‏:23 الكلام دا تلقوه في إشَعْيا 7‏:14، حسب الترْجمة اليونانيّة. وَ أُسُمْ عِمَّانُوِيل مَعَنَاتَهْ اللّٰهْ مَعَانَا.
24وَ وَكِتْ يُوسُفْ قَمَّ مِنْ النَّوْم، هُو سَوَّى الشَّيّءْ الْمَلَكْ اللّٰهْ قَالَهْ لَيَّهْ وَ شَالْ مَرْتَهْ فِي بَيْتَهْ. 25وَ لَاكِنْ مَا لِمِسْهَا لَحَدِّي وِلْدَتْ وِلَيْد وَ سَمَّاهْ عِيسَى.

La Bible en arabe tchadien © Alliance biblique du Tchad, 2019


Learn More About الكتاب المقدس بالعربي الدارجي هنا تشاد

Encouraging and challenging you to seek intimacy with God every day.


YouVersion uses cookies to personalize your experience. By using our website, you accept our use of cookies as described in our Privacy Policy.