يوح 2
SHUARAB
2
الالمي بقي خمر
1وَ فِي الْيَوْم التَّالِتْ، نَاسْ وَاحِدِينْ فِي حِلَّةْ كَانَةْ فِي دَارْ الْجَلِيلْ سَوَّوْا عَازُومَةْ هَنَا عِرِسْ وَ أَمّ عِيسَى حِضْرَتْ. 2وَ عَزَمَوْا عِيسَى كُلَ وَ تَلَامِيذَهْ. 3وَ فِي الْعَازُومَةْ، الْخَمَرْ كَمَّلْ وَ أَمْ عِيسَى حَجَّتْ لَيَّهْ وَ قَالَتْ: خَمَرْهُمْ كَمَّلْ.
4وَ عِيسَى رَدَّ لَيْهَا وَ قَالْ: مَرَةْ زَيْنَةْ، مَالَا أَوْرَيتِنِي أَنَا؟ دَا مَا لَمَّانِي. الْوَكِتْ الْاللهْ قَطَعَهْ لَيِّ لِسَّاعْ مَا جَاءْ.
5وَ أَمَّهْ حَجَّتْ لِلْخَدَّامِينْ وَ قَالَتْ: سَوَّوْا أَيِّ شَيْء الْهَو يُقُولَهْ لَيْكُو.
6وَ فِي سِتَّةْ دَوَايِن كُبَارْ قَاعِدِينْ فِي الْبَكَانْ دَا. وَ دَوْل دَوَايِنْ هنا حَجَرْ وَ يُصُبُّوا فَوْقهُمْ أَلْمِي فِي شَانْ وَضُوءْ هَنَا الْيَهُودْ وَ أَيِّ وَاحِدَةْ مِنْهُمْ تِشِيلْ تَمَانِينْ وَلَّا مِيَةْ لِيتِرْ. 7وَ عِيسَى حَجَّى لِلْخَدَّامِينْ وَ قَالْ: أَمْلَوْا الدَّوَايِنْ أَلْمِي.
وَ خَلَاصْ مَلَوْهُمْ تَكْ.
8وَ عِيسَى قَالْ لَيْهُمْ: هَسَّعْ شِيلُوا أَلْمِي شِيَّةْ وَ وَدُّوْه لِسِيدْ الْعَازُومَةْ.
وَ خَلَاصْ وَدَّوْه لَيَّهْ. 9وَ سِيدْ الْعَازُومَةْ دَاقْ الْأَلْمِي الْبِقِي خَمَرْ. هُو مَا عِرِفْ الْخَمَرْ جَاءْ مِنْ وَيْن وَ لَاكِنْ الْخَدَّامِينْ الْغَرَفَوْا الْأَلْمِي عِرِفَوْه. وَ سِيدْ الْعَازُومَةْ نَادَى الْعَرِيسْ 10وَ قَالْ لَيَّهْ: نَاسْ آخَرِينْ يَنْطُوا ضِيفَانْهُمْ الْخَمَرْ الْحَلُو أَوَّلْ. وَ بَعَدْ الضِّيفَانْ شِرْبَوْا كَتِيرْ، يَنْطُوهُمْ الْخَمَرْ الْهَوَانْ. وَ لَاكِنْ إِنْتَ أَخَّرْت الْخَمَرْ الْحَلُو وَ هَسَّعْ بَسْ أَنْطَيْتَهْ لَيْنَا.
11وَ الْعَجَبْ الْعِيسَى سَوَّاهْ فِي حِلَّةْ كَانَةْ فِي دَارْ الْجَلِيلْ، دِي أَوَّلْ عَلَامَةْ الْعِيسَى وَصَّفَاهَا. وَ بِمِثِلْ دَا، هُو وَصَّفْ قُدُرْتَهْ الْمَجِيدَةْ لِتَلَامِيذَهْ وَ هُمَّنْ آمَنَوْا بَيَّهْ. 12وَ بَعَدْ دَا، هُو مَشَى مَعَ أَمَّهْ وَ أَخْوَانَهْ وَ تَلَامِيذَهْ فِي حِلَّةْ كَفَرْ نَاحُومْ وَ قَعَدَوْا أَيَّامْ.
المسيح في بيت الله
13وَ وَكِتْ عِيدْ الْفِصْحَةْ هَنَا الْيَهُودْ قَرَّبْ، عِيسَى مَشَى فِي مَدِينَةْ الْقُدُسْ. 14وَ مَشَى فِي حَوْش بَيْت اللهْ وَ شَافْ النَّاسْ الْقَاعِدِينْ يِبِيعُوا بَقَرْ وَ غَنَمْ وَ حَمَامْ وَ النَّاسْ الْقَاعِدِينْ يِبَدُّلُوا قُرُسْ. 15وَ شَالْ حُبَالْ وَاحِدِينْ وَ سَوَّى بَيْهُمْ سَوْط. وَ طَرَدْ بَيَّهْ كُلَّ النَّاسْ مِنْ حَوْش بَيْت اللهْ مَعَ الْبَقَرْ وَ الْغَنَمْ. وَ رَمَى طَرَابِيزْ هَنَا النَّاسْ الْقَاعِدِينْ يِبَدُّلُوا قُرُسْ وَ شَتَّتْ قُرُسْهُمْ. 16وَ حَجَّى بِحِسّ شَدِيدْ لِلنَّاسْ الْقَاعِدِينْ يِبِيعُوا حَمَامْ وَ قَالْ: أَمُرْقُوا خُمَامْكُو وَ خَلُّوا مِنْكُو التِّجَارَةْ فِي بَيْت أَبُوِي.
17وَ تَلَامِيذَهْ فَكَّرَوْا فِي الْكَلَامْ الْمَكْتُوبْ الْبُقُولْ ﴿فِي شَانْ بَيْتَكْ، قَلْبِي حَامِي مِثِلْ النَّارْ﴾.
18وَ كُبَارَاتْ الْيَهُودْ سَأَلَوْه وَ قَالَوْا: وَيْن الْعَجَبْ التِّوَصِّفَهْ لَيْنَا أَشَانْ نَعَرْفُوا عِنْدَكْ إِذِنْ مِنْ اللهْ أَشَانْ تِسَوِّي شَيْء مِثِلْ دَا؟
19وَ عِيسَى رَدَّ لَيْهُمْ وَ قَالْ: دَمُّرُوا الْبَيْت دَا وَ أَنَا نِقَوِّمَهْ فِي تَلَاتَةْ يَوْم.
20وَ كُبَارَاتْ الْيَهُودْ رَدَّوْا لَيَّهْ وَ قَالَوْا: الْبَيْت دَا قَاعِدِينْ يَبْنُوهْ مِنْ سِتَّةْ وَ أَرْبَعِينْ سَنَةْ وَ إِنْتَ تِدَوْر تَبْنِيهْ مَرَّةْ تَانِيَةْ فِي تَلَاتَةْ يَوْم؟
21وَ لَاكِنْ وَكِتْ عِيسَى قَالْ «الْبَيْت دَا» هُو مَا حَجَّى بِالْبَيْت النَّاسْ بَنَوْه. هُو حَجَّى بِجِسْمَهْ. 22وَ وَكِتْ اللهْ بَعَثْ عِيسَى مِنْ أُسْط الْمَيْتِينْ خَلَاصْ، تَلَامِيذَهْ فَكَّرَوْا فِي الْكَلَامْ الْقَالَهْ دَا وَ صَدَّقَوْا بِالْكُتُبْ وَ صَدَّقَوْا بِكَلَامْ عِيسَى.
23وَ وَكِتْ عِيسَى قَاعِدْ فِي مَدِينَةْ الْقُدُسْ فِي عِيدْ الْفِصْحَةْ، نَاسْ كَتِيرِينْ آمَنَوْا بَيَّهْ أَشَانْ شَافَوْا الْعَجَايِبْ الْعِيسَى قَاعِدْ يِسَوِّيهُمْ. 24وَ لَاكِنْ عِيسَى مَا أَمَّنْ لَيْهُمْ نَفْسَهْ أَشَانْ هُو عِرِفْ كُلَّ النَّاسْ. 25وَ مَا سَأَلْ نَادُمْ لِيَعَرِفْ النَّاسْ. هُو عِرِفْ كُلَّ شَيْء الْقَاعِدْ فِي قُلُوبْهُمْ.

© 2012 Alliance Biblique du Tchad

Learn More About Arabe tchadien (alphabet arabe)