Parallel
1
المسيح هو كلمة الله
1فِي الْبِدَايَةْ الْكَلِمَةْ قَاعِدَةْ. وَ الْكَلِمَةْ قَاعِدَةْ مَعَ اللهْ وَ الْكَلِمَةْ هِي اللهْ. 2فِي الْبِدَايَةْ هُو قَاعِدْ مَعَ اللهْ. 3وَ كُلَّ شَيْء كَوَّنْ بِالْكَلِمَةْ وَ مِنْ كُلَّ الْأَشْيَاءْ الْكَوَّنَوْا، مَا فِي شَيْء الْكَوَّنْ بَلَايَهْ. 4هُو عِنْدَهْ الْحَيَاةْ وَ الْحَيَاةْ هِي نُورْ لِلنَّاسْ. 5النُّورْ قَاعِدْ يِضَوِّي فِي الضَّلَامْ وَ لَاكِنْ الضَّلَامْ مَا أَنَّصَرْ فَوْقَهْ.
6وَ اللهْ رَسَّلْ نَادُمْ وَاحِدْ أُسْمَهْ يَحْيَى. 7هُو جَاءْ أَشَانْ يَشْهَدْ وَ شَهَدْ لِلنُّورْ أَشَانْ كُلَّ النَّاسْ يِآمُنُوا بِالنُّورْ بِسَبَبْ شَهَادْتَهْ. 8يَحْيَى ذَاتَهْ هُو مَا النُّورْ لَاكِنْ هُو جَاءْ أَشَانْ يَشْهَدْ لِلنُّورْ. 9وَ النُّورْ الصَّحِيحْ جَاءْ فِي الدُّنْيَا لِيَنْطِي نُورْ لِكُلَّ النَّاسْ. 10الدُّنْيَا كَوَّنَتْ بَيَّهْ وَ لَاكِنْ وَكِتْ هُو جَاءْ فِي الدُّنْيَا، نَاسْ الدُّنْيَا مَا عِرِفَوْه. 11هُو جَاءْ فِي دَارَهْ وَ لَاكِنْ نَاسْ دَارَهْ مَا قِبْلَوْه. 12لَاكِنْ لِكُلَّ النَّاسْ الْقِبْلَوْه وَ آمَنَوْا بِأُسْمَهْ، هُو فَتَحْ لَيْهُمْ الدَّرِبْ أَشَانْ يَبْقَوْا عِيَالْ اللهْ. 13وَ يَبْقَوْا عِيَالْ اللهْ مَا بِسَبَبْ وَالْدَيْنهُمْ وَ مَا بِسَبَبْ شَهْوَةْ النَّاسْ وَ مَا بِسَبَبْ نِيَّةْ هَنَا أَيِّ رَاجِلْ لَاكِنْ هُمَّنْ بِقَوْا عِيَالْ اللهْ بِقُدْرَةْ اللهْ بَسْ.
14وَ الْكَلِمَةْ بِقَتْ نَادُمْ وَ هُو سَكَنْ فِي أُسُطْنَا. وَ شِفْنَا قُدُرْتَهْ الْمَجِيدَةْ. وَ قُدُرْتَهْ هِي مَجِيدَةْ بِلْحَيْن وَ مُوَافْقَةْ لِلْإِبْن الْوَاحِدْ الْجَايِ مِنْ اللهْ أَبُوهْ. وَ هُو مَلَانْ بِرَحْمَةْ وَ حَقّ. 15وَ يَحْيَى شَاهِدْ لَيَّهْ وَ نَادَى النَّاسْ وَ قَالْ: دَا بَسْ النَّادُمْ الْأَوْرَيْتكُو بَيَّهْ وَ قُلْت هُو الْجَايِ وَرَايِ عَالِي مِنِّي بِلْحَيْن أَشَانْ هُو مَوْجُودْ قُبَّالِي.
16وَ رَحْمَتَهْ كَامِلَةْ وَ كُلِّنَا لِقِينَا بَرَكَةْ فِي بَرَكَةْ. 17اللهْ نَزَّلْ شُرُوطْ التَّوْرَاةْ فِي إِيدَيْن مُوسَى وَ لَاكِنْ اللهْ نَزَّلْ الرَّحْمَةْ وَ الْحَقّ بِعِيسَى الْمَسِيحْ. 18أَبَداً مَا فِي نَادُمْ شَافْ اللهْ لَاكِنْ إِبْن اللهْ الْوَاحِدْ هُو الْقَاعِدْ جَنْب أَبُوهْ، دَا بَسْ هُو الْبَيَّنْ اللهْ لِلنَّاسْ.
يحيى ردّ لليهود
19وَ دِيهِي شَهَادَةْ يَحْيَى وَكِتْ كُبَارَاتْ الْيَهُودْ رَسَّلَوْا لَيَّهْ رُجَالْ الدِّينْ وَ لَاوِيِينْ مِنْ مَدِينَةْ الْقُدُسْ أَشَانْ يَسْأَلَوْه هُو يَاتُو. 20يَحْيَى مَا نَكَرْ شَيْء وَ لَاكِنْ شَهَدْ بِكَلَامْ وَاضِحْ وَ قَالْ: أَنَا مَا الْمَسِيحْ.
21وَ أَشَانْ دَا، سَأَلَوْه بَتَّانْ وَ قَالَوْا: إِنْتَ يَاتُو؟ إِنْتَ النَّبِي إِلِيَاسْ#1‏:21 الياس: في فكر اليهود، النبي الياس واجب يقبّل في الأرض قبال المسيح ما يجي. وَلَّا؟
وَ يَحْيَى قَالْ: لَا أَنَا مَا هُو.
وَ قَالَوْا: إِنْتَ النَّبِي#1‏:21 النبي البجي: في التوراة في التثنية 18‏:15‏-19، النبي موسى قال نبي كبير يقمّ في اسط بني اسرائيل. و في فكر يهود واحدين النبي دا شق من المسيح. و لاكن الإنجيل يعلمنا كدر عيسى المسيح ذاته هو النبي الكبير الموسى قال يقمّ في اسط بني اسرائيل. اقري يوحنا 1‏:45 و 5‏:46 و عمل 3‏:20‏-26. الْبَجِي وَلَّا؟
وَ هُو رَدَّ لَيْهُمْ وَ قَالْ: لَا.
22وَ خَلَاصْ قَالَوْا لَيَّهْ: إِنْتَ يَاتُو؟
أَوْرِينَا أَشَانْ نِقَبُّلُوا لِلنَّاسْ الرَّسَّلَوْنَا وَ نِأَوْرُوهُمْ. شُنُو الْكَلَامْ تُقُولَهْ فِي نَفْسَكْ؟ 23وَ هُو رَدَّ لَيْهُمْ بِكَلَامْ النَّبِي إِشَعْيَاءْ وَ قَالْ: أَنَا ﴿حِسّ النَّادُمْ الْقَاعِدْ بِنَادِي فِي الْخَلَاءْ الْبُقُولْ: عَدُّلُوا دَرِبْ الرَّبّ﴾.
24وَ فِيَهْ فَرِيسِيِّينْ بَيْن النَّاسْ الرَّسَّلَوْهُمْ. 25وَ هُمَّنْ سَأَلَوْا يَحْيَى وَ قَالَوْا: كَانْ إِنْتَ مَا الْمَسِيحْ وَ لَا إِلِيَاسْ وَ لَا النَّبِي الْبَجِي، مَالَا إِنْتَ قَاعِدْ تِغَطِّسْ#1‏:25 تغطّس: أي نادم التاب من ذنوبه جاء ليحيى في البحر و دلى راسه تحت في الالمي و بتان قم فوق. و دا مَثل و يوصف كدر النادم خلى ذنوبه خلاص و دخل في حياة جديدة. النَّاسْ فِي أَلْمِي؟
26وَ يَحْيَى رَدَّ لَيْهُمْ وَ قَالْ: أَنَا نِغَطِّسْ النَّاسْ فِي أَلْمِي وَ لَاكِنْ نَادُمْ وَاحِدْ قَاعِدْ مَعَاكُو وَ إِنْتُو مَا تَعَرْفُوهْ. 27وَ هُو بَسْ النَّادُمْ الْيَجِي وَرَايِ. وَ أَنَا مَا تَمَّيْت لَيَّهْ خَدَّامْ كُلَ.
28وَ الْبَكَانْ السَّأَلَوْا يَحْيَى فَوْقَهْ، هُو فِي حِلَّةْ بَيْت عَنْيَا الْقَاعِدَةْ فِي وَادِي الْأُرْدُنْ فِي نُصَّهْ الصَّبْحَانِي. وَ دَا الْبَكَانْ الْيَحْيَى قَاعِدْ يِغَطِّسْ فَوْقَهْ النَّاسْ.
خروف الله
29وَ أَمْبَاكِرْ، يَحْيَى شَافْ عِيسَى جَايِ لَيَّهْ وَ قَالْ: دَا بَسْ الْخَرُوفْ الْاللهْ رَسَّلَهْ أَشَانْ يَمْحَى ذُنُوبْ هَنَا نَاسْ الدُّنْيَا. 30دَا بَسْ النَّادُمْ الْأَوْرَيْتكُو بَيَّهْ وَ قُلْت نَادُمْ وَاحِدْ يَجِي وَرَايِ وَ هُو عَالِي مِنِّي بِلْحَيْن أَشَانْ هُو مَوْجُودْ قُبَّالِي. 31أَوَّلْ أَنَا مَا عِرِفْتَهْ. لَاكِنْ أَنَا جِيتْ نِغَطِّسْ النَّاسْ أَشَانْ نِوَصِّفَهْ لِبَنِي إِسْرَائِيلْ.
32وَ يَحْيَى شَهَدْ لَيَّهْ وَ قَالْ: أَنَا شِفْت الرُّوحْ الْقُدُّوسْ نَزَلْ فَوْقَهْ مِنْ السَّمَاءْ مِثِلْ حَمَامَةْ وَ دَلَّى فَوْقَهْ وَ قَعَدْ. 33أَوَّلْ أَنَا مَا عِرِفْتَهْ لَاكِنْ الرَّسَّلَانِي لِنِغَطِّسْ النَّاسْ فِي أَلْمِي حَجَّى لَيِّ مِنْ أَوَّلْ وَ قَالْ لَيِّ «النَّادُمْ التِّشِيفْ الرُّوحْ الْقُدُّوسْ يَنْزِلْ فَوْقَهْ وَ يَقْعُدْ فَوْقَهْ، دَا بَسْ النَّادُمْ الْيِغَطِّسْ النَّاسْ فِي الرُّوحْ الْقُدُّوسْ». 34وَ خَلَاصْ، أَنَا شِفْتَهْ وَ أَنَا شَاهِدْ لَيَّهْ هُو إِبْن اللهْ.
تلاميذ المسيح الأولانيين
35وَ أَمْبَاكِرْ، يَحْيَى قَاعِدْ فِي نَفْس الْبَكَانْ وَ نَاسَيْن مِنْ تَلَامِيذَهْ قَاعِدِينْ مَعَايَهْ. 36وَ يَحْيَى شَافْ عِيسَى رَايِغْ فِي الدَّرِبْ وَ قَالْ لَيْهُمْ: دَاهُو خَرُوفْ اللهْ.
37وَ التَّلَامِيذْ الْإِتْنَيْن سِمْعَوْا كَلَامَهْ وَ قَمَّوْا تَابَعَوْا عِيسَى. 38وَ عِيسَى أَنْلَفَتْ وَ شَافَاهُمْ جَايِينْ وَرَايَهْ. وَ سَأَلَاهُمْ وَ قَالْ تِفَتُّشُوا شُنُو؟
وَ رَدَّوْا لَيَّهْ وَ قَالَوْا: يَا رَبِّاي، إِنْتَ سَاكِنْ وَيْن؟
وَ «رَبِّاي» مَعَنَاتَهْ سَيِّدْ بِكَلَامْ عِبْرَانِي.
39وَ عِيسَى رَدَّ لَيْهُمْ وَ قَالْ: تَعَالُوا شِيفُوا الْبَكَانْ.
وَ دَا بِقِي فِي العَصُرْ. وَ مَشَوْا مَعَايَهْ وَ شَافَوْا الْبَيْت الْهُو قَاعِدْ فَوْقَهْ وَ الْيَوْم دَا قَعَدَوْا مَعَايَهْ.
40وَ نَادُمْ وَاحِدْ مِنْ النَّاسَيْن السِّمْعَوْا كَلَامْ يَحْيَى وَ قَمَّوْا تَابَعَوْا عِيسَى، أُسْمَهْ أَنْدَرَيَّسْ وَ هُو أَخُو هَنَا سِمْعَانْ بُطْرُسْ. 41أَوَّلْ شَيْء، أَنْدَرَيَّسْ مَشَى لِقِي أَخُوهْ سِمْعَانْ وَ حَجَّى لَيَّهْ وَ قَالْ: لِقِينَا مَسِّيَا.
و «مَسِّيَا» مَعَنَاتَهْ الْمَسِيحْ بِكَلَامْ عِبْرَانِي.
42وَ أَنْدَرَيَّسْ وَدَّى بُطْرُسْ لِعِيسَى. وَ عِيسَى شَافْ سِمْعَانْ فِي عُيُونَهْ وَ قَالْ: إِنْتَ سِمْعَانْ وِلَيْد يُوحَنَّا. بِنَادُوكْ صَفَا.
وَ مَعَنَى هَنَا صَفَا هُو حَجَرْ وَ بِكَلَامْ يُونَانِي دَا بُطْرُسْ.
43وَ أَمْبَاكِرْ عِيسَى دَوَّرْ يَمْشِي فِي دَارْ الْجَلِيلْ. وَ لِقِي فِلِبُّسْ وَ قَالْ لَيَّهْ: تَعَالْ تَابِعْنِي.
44وَ فِلِبُّسْ هُو مِنْ حِلَّةْ بَيْت صَيْدَا وَ دِي حِلَّةْ هَنَا أَنْدَرَيَّسْ وَ بُطْرُسْ. 45وَ فِلِبُّسْ مَشَى لِقِي نَتَنَايِلْ وَ قَالْ لَيَّهْ: لِقِينَا النَّادُمْ الْمُوسَى كَتَبْ بِسَبَبَهْ فِي التَّوْرَاةْ وَ الْأَنْبِيَاءْ كَتَبَوْا بَيَّهْ فِي كُتُبْهُمْ. وَ هُو عِيسَى وِلَيْد يُوسُفْ مِنْ حِلَّةْ النَّاصِرَةْ.
46وَ نَتَنَايِلْ رَدَّ لَيَّهْ وَ قَالْ: هَايْ! مَتَى كَيْ يَوْم وَاحِدْ شَيْء عَدِيلْ الْجَاءْ مِنْ النَّاصِرَةْ؟
وَ فِلِبُّسْ قَالْ لَيَّهْ: تَعَالْ مَعَايِ وَ شِيفَهْ.
47وَ عِيسَى شَافْ نَتَنَايِلْ جَايِ لَيَّهْ وَ قَالْ: دَاهُو إِسْرَائِيلِي صَحِيحْ. هُو مَا يُغُشّ أَيِّ نَادُمْ.
48وَ نَتَنَايِلْ سَأَلَهْ وَ قَالْ: كِكَّيْف عِرِفْتِنِي؟
وَ عِيسَى قَالْ: شِفْتَكْ وَكِتْ إِنْتَ قَاعِدْ تِحِتْ الشَّدَرَةْ قُبَّالْ فِلِبُّسْ مَا يِنَادِيكْ.
49وَ نَتَنَايِلْ قَالْ: سَيِّدْنَا، إِنْتَ إِبْن اللهْ. إِنْتَ مَلِكْ هَنَا إِسْرَائِيلْ.
50وَ عِيسَى قَالْ لَيَّهْ: إِنْتَ آمَنْت بَيِّ أَشَانْ قُلْت لَيْك أَنَا شِفْتَكْ تِحْت الشَّدَرَةْ؟ تِشِيفْ أَشْيَاءْ كُبَارْ مِنْ دَا.
51وَ عِيسَى قَالْ لَيْهُمْ: أَسْمَعَوْا، نُقُولْ لَيْكُو الْحَقّ، تِشِيفُوا السَّمَاءْ فَاتِحْ وَ مَلَائِكَةْ اللهْ طَالِعِينْ وَ نَازِلِينْ#1‏:51 السماء فاتح و ملائكة الله طالعين و نازلين: دا الشيء النبي يعقوب شافه في التكوين 28‏:12 وكت الله بان ليه و وصّف هو إِختاره. فَوْق إِبْن الْإِنْسَانْ.