خُروج 33

اللّه أمر الشعب يرْحلوا

1وَ بَعَدْ دَا، بَتَّانْ اللّٰهْ قَالْ لِمُوسَى: «أَمْشِي مِنْ هِنِي إِنْتَ وَ الشَّعَبْ الْإِنْتَ مَرَقْتُهُمْ مِنْ بَلَدْ مَصِرْ. وَ قُمُّوا أَمْشُوا لِلْبَلَدْ الْأَنَا حَلَفْت لِإِبْرَاهِيمْ وَ إِسْحَاقْ وَ يَعْقُوبْ وَ قُلْت نَنْطِيهَا لِذُرِّيِّتْهُمْ. 2وَ أَنَا نِرَسِّلْ قِدَّامَكْ مَلَكْ وَ نَطْرُدْ الْكَنْعَانِيِّينْ وَ الْأَمُورِيِّينْ وَ الْحِتِّيِّينْ وَ الْفِرِزِّيِّينْ وَ الْحِوِّيِّينْ وَ الْيَبُوسِيِّينْ. 3وَ بَعَدْ دَا، إِنْتُو تَمْشُوا لِلْبَلَدْ الْمَلَانَةْ بِاللَّبَنْ وَ الْعَسَلْ. وَ لَاكِنْ أَنَا مَا نَمْشِي مَعَاكُو أَشَانْ مَا نَكْتُلْكُو فِي الدَّرِبْ بِسَبَبْ إِنْتُو شَعَبْ رَاسْكُو قَوِي.»

4وَ وَكِتْ الشَّعَبْ سِمْعَوْا الْكَلَامْ دَا، بِقِي لَيْهُمْ قَاسِي وَ قَمَّوْا يَبْكُوا وَ نَادُمْ مِنْهُمْ لِبِسْ زِينْتَهْ كُلَ مَا فِيهْ. 5وَ دَا أَشَانْ اللّٰهْ قَالْ لِمُوسَى: «قُولْ لِبَنِي إِسْرَائِيلْ: ‹إِنْتُو شَعَبْ رَاسْكُو قَوِي. كَنْ أَنَا مَشَيْت مَعَاكُو لِوَكِتْ شِيَّةْ كُلَ، نَكْتُلْكُو. هَسَّعْ دَا، سِلُّوا مِنْكُو زِينِتْكُو. وَ أَنَا نِشِيفْ كِكَّيْف نِسَوِّي لَيْكُو.›»

6وَ خَلَاصْ مِنْ الْيَوْم دَا فِي جَبَلْ حُورِيبْ، بَنِي إِسْرَائِيلْ سَلَّوْا زِينِتْهُمْ وَ مَا لِبْسَوْهَا بَتَّانْ.

خَيْمة الْإجْتِماع

7وَ أَيِّ وَكِتْ كَنْ الشَّعَبْ نَزَلَوْا فِي بَكَانْ، مُوسَى يِشِيلْ الْخَيْمَةْ وَ يَبْنِيهَا بَرَّا بَعِيدْ مِنْ الْفَرِيقْ. وَ مُوسَى سَمَّاهَا خَيْمَةْ الْإِجْتِمَاعْ. وَ أَيِّ نَادُمْ كَنْ دَوَّرْ يَسْأَلْ اللّٰهْ، يَمْشِي لَيْهَا بَرَّا مِنْ الْفَرِيقْ. 8وَ فِي أَيِّ وَكِتْ كَنْ مُوسَى مَرَقْ مَاشِي لِلْخَيْمَةْ دِي، كُلَّ الشَّعَبْ يَقِيفُوا أَيِّ وَاحِدْ فِي خَشُمْ بَابْ خَيْمِتَهْ وَ يِشِيفْ مُوسَى لَحَدِّي يَدْخُلْ فِي خَيْمَةْ الْإِجْتِمَاعْ. 9وَ وَكِتْ مُوسَى يَدْخُلْ فِي الْخَيْمَةْ دِي، عَمُودْ السَّحَابْ يَنْزِلْ وَ يَقِيفْ فِي خَشُمْ بَابْ الْخَيْمَةْ. وَ فِي الْبَكَانْ دَا، اللّٰهْ يِكَلِّمْ مَعَ مُوسَى. 10وَ وَكِتْ كُلَّ الشَّعَبْ يِشِيفُوا عَمُودْ السَّحَابْ وَاقِفْ فِي بَابْ الْخَيْمَةْ، كُلُّهُمْ يَسْجُدُوا أَيِّ وَاحِدْ فِي خَشُمْ بَابْ خَيْمِتَهْ. 11وَ فِي الْبَكَانْ دَا، اللّٰهْ يِكَلِّمْ مَعَ مُوسَى خَشُمْ بِخَشُمْ مِثِلْ نَادُمْ يِكَلِّمْ مَعَ رَفِيقَهْ. وَ كَنْ مُوسَى قَبَّلْ لِلْفَرِيقْ كُلَ، مُسَاعِدَهْ الصَّبِي الْأُسْمَهْ يَشُوعْ وِلَيْد نُونْ يَقْعُدْ دَايْماً فِي الْخَيْمَةْ.

اللّه واعد مُوسَى

12وَ مُوسَى قَالْ لِلّٰهْ: «إِنْتَ دَوَّرْت مِنِّي أَنَا نُقُودْ الشَّعَبْ دَا. وَ لَاكِنْ مَا عَرَّفْتِنِي يَاتُو التِّرَسِّلَهْ مَعَايِ. وَ بَتَّانْ إِنْتَ قُلْت لَيِّ: ‹أَنَا بَسْ عَزَلْتَكْ وَ رِضِيتْ لَيْك.› 13وَ كَنْ صَحِيحْ كَيْ إِنْتَ رِضِيتْ لَيِّ، عَرِّفْنِي دَرْبَكْ أَشَانْ نَعَرْفَكْ وَ إِنْتَ تَرْضَى لَيِّ دَايْماً. وَ فَكِّرْ فِي الْأُمَّةْ دِي أَشَانْ هِي شَعَبَكْ.» 14وَ اللّٰهْ قَالْ: «أَنَا ذَاتِي نَمْشِي قِدَّامَكْ وَ بَيْدَا، إِنْتَ مَا تِهِمّ.» 15وَ مُوسَى قَالْ: «كَنْ إِنْتَ بِنَفْسَكْ مَا تَمْشِي مَعَانَا، مَا تَمْرُقْنَا مِنْ هِنِي. 16وَ كَنْ إِنْتَ مَا تَمْشِي مَعَانَا، كِكَّيْف نَادُمْ يَقْدَرْ يَعَرِفْ كَدَرْ إِنْتَ رِضِيتْ لَيِّ وَ لِشَعَبَكْ؟ وَ كِكَّيْف يَقْدَرَوْا يِفَنُّدُونَا أَنَا وَ شَعَبَكْ مِنْ كُلَّ شُعُوبْ الْأَرْض الْآخَرِينْ؟» 17وَ اللّٰهْ قَالْ لِمُوسَى: «الشَّيّءْ الْإِنْتَ طَلَبْتَهْ دَا، أَنَا نِسَوِّيهْ أَشَانْ أَنَا رِضِيتْ لَيْك وَ أَنَا بَسْ عَزَلْتَكْ.»

18وَ مُوسَى قَالْ: «خَلِّينِي نِشِيفْ عَظَمَتَكْ.» 19وَ اللّٰهْ قَالْ: «نِوَصِّفَكْ كُلَّ خَيْرِي وَ نِعَالِنْ لَيْك أُسْمِي هُو اللّٰهْ. وَ أَنَا نِحِنّ أَيِّ نَادُمْ النِّدَوْر نِحِنَّهْ وَ نَرْحَمْ أَيِّ نَادُمْ النِّدَوْر نَرْحَمَهْ. 20وَ لَاكِنْ مَا تَقْدَرْ تِشِيفْ وِجْهِي أَشَانْ كَنْ إِنْسَانْ شَافْ وِجْهِي، بَتَّانْ مَا يِعِيشْ.»

21وَ اللّٰهْ قَالْ بَتَّانْ: «دَاهُو فِي بَكَانْ قَرِيبْ لَيِّ فِي الْحَجَرْ. أَقِيفْ فَوْقَهْ. 22وَ وَكِتْ عَظَمَتِي تُفُوتْ قِدَّامَكْ، نُخُطَّكْ فِي فَرَقَةْ الْحَجَرْ وَ نِغَطِّيكْ بِإِيدِي. وَ بَعَدْ عَظَمَتِي تُفُوتْ خَلَاصْ، 23أَنَا نَرْفَعْ إِيدِي وَ تِشِيفْ عَظَمَتِي بِوَرَاءْ. أَشَانْ وِجْهِي، نَادُمْ مَا يَقْدَرْ يِشِيفَهْ.»

Currently Selected:

خُروج 33: ع.د.ت19

Highlight

Copy