Filimuun 1
1
1Jawaab minni ana Buulus al-masjuun fi chaan al-Masiih Isa wa min akhuuna Timuutaawus. Wa naktib leek inta, ya habiibna wa rafiigna fi l-khidme Filimuun 2wa jamaaʼat al-muʼminiin al-yilimmu fi beetak wa akhutna Affiiya wa akhuuna Arkhibba al-misilna yitaabiʼ kalaam Rabbina misil askari yitaabiʼ kabiirah. 3Aleekum al-salaam wa l-rahma min Allah abuuna wa Rabbina Isa al-Masiih.
4Ya Filimuun, ayyi wakit al-nisalli, nifakkir foogak wa nachkur Allah Rabbi 5achaan simiʼt khabar iimaanak be Rabbina Isa wa be mahabbitak le kulla l-saalihiin. 6Wa nasʼal leek Allah kadar be l-alaakha al-indak maʼa akhwaanak al-muʼminiin talga irfe be ziyaada fi kulla l-kheer al-indina fi l-Masiih. 7Wa be l-sahiih, ya akhuuyi, khabar hana mahabbitak antaani farha kabiire wa chajaaʼa chadiide achaan al-cheyy al-inta sawweetah farrah guluub al-saalihiin.
8Wa achaan da, nidoor natlub minnak cheyy waahid. Indi hagg fi l-Masiih le naamurak tawwaali achaan tisawwi al-cheyy al-nidoorah. 9Wa laakin aniina nirraayado wa achaan da, yabga leyi akheer kan nigaddim leek talab wa inta tafhamni. Wa ana al-nihajji leek, ana Buulus safiir al-Masiih Isa al-haaliiyan masjuun fi chaanah.
10Wa nigaddim leek talab fi chaan wileedi Alfaayid#1:10 Alfaayid Be kalaam yuunaani usum al-naadum da Unisiimus. Wa maʼana hana l-usum da, hu al-indah faayde. al-ana bigiit leyah abuuh wakit ana gaaʼid fi l-sijin. 11Awwal hu ma indah leek faayde laakin be l-sahiih hassaʼ hu bigi naadum indah faayde katiire bilheen. Hu indah faayde leek inta wa leyi ana kula. 12Wa ana gaaʼid nigabbilah leek maʼa l-jawaab da wa da gaasi leyi achaan nagram leyah bilheen.
13Be l-sahiih, dawwart hu yagood hini maʼaayi. Ana gaaʼid fi l-sijin fi chaan bichaarat al-Masiih wa naʼarif kadar inta tidoor tisaaʼidni. Wa kan Alfaayid yagood maʼaayi, hu yagdar yisaaʼidni fi badalak inta. 14Laakin ma dawwart nisawwi ayyi cheyy al-bukhussah illa kan inta khassadt beyah. Wa misil da, tisawwi al-kheer ma achaan ana asartak leyah laakin achaan inta chilt niiye leyah be nafsak. 15Akuun fi chaan da bas, Allah faragah minnak wakit chiyya achaan hassaʼ yigabbil leek wa yagood maʼaak daayman. 16Wa ma yabga battaan abdak bas laakin yabga akheer min abdak. Hu bigi akhuuk al-mahbuub. Akiid ana nihibbah laakin inta waajib tihibbah be ziyaada achaan hu abdak al-khaali wa be Rabbina al-Masiih, hu bigi akhuuk.
17Zeen. Naʼarif kadar inta tajʼalni ana muchaarik maʼaak fi l-iimaan. Wa natlub minnak takrub Alfaayid gawi misil tidoor takrubni ana gawi. 18Kan hu sawwa leek cheyy fasil walla indah deen fi raasah kula, kallifni beyah ana. 19Ana Buulus karabt al-galam wa naktib al-kalaam da be iidi : «Ana bas nikaffiik.» Wa inta ligiit al-haya al-jadiide be kalaami ana bas wa laakin ma nidoor nihajji leek be l-cheyy al-waajib tisawwiih leyi.
20Aywa, ya akhuuyi, aniina akhwaan fi l-Rabb wa nidoor minnak faayde chiyya. Farrih galbi fi l-Masiih be ziyaada. 21Ana muʼakkid kadar titaabiʼ kalaami. Ana gaaʼid naktib leek wa fi galbi naʼarif inta tisawwi ziyaada min al-gultah leek kula.
22Wa maʼa l-kalaam da, nuguul leek jahhiz leyi bakaan fi beetak achaan naji nagood maʼaak. Narja Allah yasmaʼ duʼaaku fi chaani wa yatulguuni gariib. 23Akhuuna Abfuraas al-gaaʼid maʼaayi fi l-sijin fi chaan al-Masiih Isa, hu yisallimak. 24Wa maʼaayah al-akhwaan al-yakhdumu maʼaayi Markhus wa Aristaarkus wa Diimaas wa Luukha.
25Aleekum rahmat al-Rabb Isa al-Masiih.
Currently Selected:
Filimuun 1: ADT19
Highlight
Share
Copy
Want to have your highlights saved across all your devices? Sign up or sign in
Arabe tchadien (alphabet latin) Bible © Alliance Biblique du Tchad, 2019.