YouVersion Logo
Search Icon

Ibraaniyiin 1

1
1Fi l-zaman al-faat, Allah kallam le juduudna be waasitat al-anbiya iddat marraat wa be turug chig chig. 2Wa hassaʼ fi l-zaman al-akhiir, Allah kallam leena be waasitat Ibnah al-hu jaʼalah wariis hana kulla cheyy. Wa beyah hu bas, Allah khalag kulla cheyy. 3Wa Ibn Allah hu nuur Allah al-majiid wa suurat tabiiʼtah wa hu yahfad kulla cheyy be gudrat kalaamah. Wa wakit hu tahhar al-naas min zunuubhum khalaas, hu talaʼ fi l-bakaan al-aali wa gaaʼid jamb Allah al-Aziim fi nussah al-zeenaay. 4Wa Allah antaah daraja kabiire ziyaada min al-malaaʼika misil al-usum al-Allah antaah leyah afdal ziyaada min asaameehum.
Ibn Allah akbar min al-malaaʼika
5Abadan ma fi malak al-Allah gaal leyah : <Inta ibni wa l-yoom, ana bigiit abuuk.>#1:5 Al-kalaam da talgooh fi Zabuur 2:7. Walla battaan gaal : <Ana nabga leyah abuuh wa hu yabga leyi ibni.>#1:5 Al-kalaam da talgooh fi 2 Samuwiil 7:14. 6Wa laakin wakit Allah rassal Ibnah al-bikir fi l-dunya, hu gaal : <Khalli kulla malaaʼikat Allah yasjudu leyah.>#1:6 Al-kalaam da talgooh fi Tasniya 32:43, hasab al-tarjama al-yuunaaniiye.
7Wa l-kalaam al-maktuub al-bukhuss al-malaaʼika buguul : <Hu jaʼal malaaʼikatah misil al-riih wa khaddaamiinah dool misil al-naar al-tahrig.>#1:7 Al-kalaam da talgooh fi Zabuur 104:4, hasab al-tarjama al-yuunaaniiye. 8Wa laakin fi Ibnah buguul :
<Ya Allah, archak gaaʼid ila l-abad
wa asaat mulkak, hi asaat adaala.
9Inta tihibb al-adaala
wa takrah al-zulum.
Achaan da, Allah Ilaahak azalak inta bas min rufgaanak
wa masahak be dihin al-suruur.>#1:9 Al-kalaam da talgooh fi Zabuur 45:6-7.
10Wa battaan buguul :
<Ya Rabb, fi l-bidaaya inta farracht al-ard
wa inta bas falleet al-samaawaat.
11Humman yiddammaro
wa laakin inta gaaʼid ila l-abad.
Humman kulluhum yagdamo
misil khalag.
12Wa misil naadum yatwi furaachah,
inta kula tatwiihum
wa tibaddilhum misil lubaas.
Laakin inta tagood daayman,
ma tilkhayyar
wa waktak kula
abadan ma yikammil.>#1:12 Al-kalaam da talgooh fi Zabuur 102:25-27.
13Wa abadan ma fi malak al-Allah gaal leyah : <Agood be nussi al-zeenaay lahaddi nukhutt udwaanak tihit rijileenak.>#1:13 Al-kalaam da talgooh fi Zabuur 110:1. 14Wa l-malaaʼika humman kulluhum arwaah khaddaamiin bas wa Allah yirassilhum achaan yakhdumu fi chaan al-naas al-yalgo al-naja.

Currently Selected:

Ibraaniyiin 1: ADT19

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy