Gudiya 21

Gabiilat Banyaamiin yalgo awiin

1Wakit Bani Israaʼiil lammo fi Misfa, humman halafo wa gaalo : «Khalli ayyi naadum minnina ma yijawwiz bittah le raajil min gabiilat Banyaamiin.» 2Wa baʼad al-harib da, al-chaʼab jo fi Beet Iil wa gaʼado giddaam al-Rabb lahaddi l-achiiye. Wa humman bako ziyaada wa dumuuʼhum kula daffago katiir. 3Wa gaalo : «Ya Allah Ilaah Bani Israaʼiil, maala al-yoom waahide min gabaayil Bani Israaʼiil bigat ma fiiha ?»

4Wa ambaakir, al-chaʼab bakkaro wa bano madbah fi l-bakaan da wa gaddamo foogah dahaaya muharragiin wa dahaaya salaama. 5Wa Bani Israaʼiil gaalo : «Yaatu min kulla gabaayil Bani Israaʼiil ma hidir fi l-malamma fi Misfa giddaam Allah ?» Achaan fi l-yoom da fi Misfa, humman halafo le yaktulu ayyi naadum al-ma hidir fi l-malamma giddaam Allah.

6Wa hassaʼ Bani Israaʼiil nidmo fi chaan akhwaanhum naas gabiilat Banyaamiin. Wa gaalo : «Al-yoom gabiila waahide anfasalat min Israaʼiil. 7Wa kikkeef nisawwu le nijawwuzu awiin le l-faddalo minhum achaan awwal aniina halafna be Allah wa gulna ma nijawwuzuuhum banaatna ?» 8Wa battaan gaalo : «Hal fiyah naas min gabaayil Israaʼiil al-ma hidro giddaam Allah fi Misfa walla ?» Wa khalaas, humman azzakkaro kadar naas Yaabiich fi turaab Gilʼaad ma jo fi l-muʼaskar le l-malamma al-yoom daak. 9Achaan wakit al-chaʼab lammo le l-hasaaba, naadum waahid kula min sukkaan Yaabiich Gilʼaad ma hidir.

10Wa khalaas, humman rassalo 12 000 raajil min al-muhaaribiin wa gaalo leehum : «Amchu wa aktulu kulla sukkaan Yaabiich Gilʼaad be l-seef hatta awiinhum wa iyaalhum kula aktuluuhum. 11Wa daahu al-cheyy al-tisawwuuh. Dammuru kulla l-dakar wa ayyi mara al-daakhle beet.» 12Wa min sukkaan Yaabiich Gilʼaad, ligo 400 banaat udriiyaat al-ma dakhalan beet wa humman chaaloohin wa jaaboohin fi l-muʼaskar fi Chiilooh fi turaab Kanʼaan.

13Wa kulla l-mujtamaʼ rassalo naas le gabiilat Banyaamiin fi hajar Rimmuun achaan yisawwu salaam. 14Wa fi l-wakit da, al-rujaal al-faddalo min gabiilat Banyaamiin gabbalo fi bakaanaathum. Wa Bani Israaʼiil antoohum al-banaat al-jaaboohin hayyaat min Yaabiich Gilʼaad. Wa laakin adad al-banaat ma tamma wa rujaal waahidiin ma ligo awiin.

15Wa l-chaʼab nidmo fi chaan naas gabiilat Banyaamiin achaan Allah khalla faraga hana gabiila waahide min gabaayil Israaʼiil. 16Wa kubaaraat al-mujtamaʼ gaalo : «Awiin Banyaamiin kammalo. Nisawwu chunu achaan al-rujaal al-faddalo kula yalgo awiin ?» 17Wa gaalo battaan : «Khalli gabiilat Banyaamiin kula talga zurriiye achaan gabiila waahide ma tiwaddir min Bani Israaʼiil. 18Wa aniina zaatna ma nagdaro nantuuhum banaatna le yaakhuduuhin achaan aniina halafna wa gulna : ‹Malʼuun al-yanti mara le iyaal Banyaamiin.›»

19Wa baʼad da, gaalo : «Kulli sana fiyah iid le Allah fi Chiilooh al-gaaʼide munchaakh le Beet Iil wa wati le Labuuna wa sabaah le l-derib al-yamchi min Beet Iil le Chakiim.» 20Wa amaro iyaal Banyaamiin wa gaalo leehum : «Amchu allabbado fi jineenaat al-inab. 21Wa kan chiftu banaat min Chiilooh maragan yalʼaban sawa, khalaas intu amurgu fooghin min jineenaat al-inab. Wa khalli ayyi waahid minku yakrub leyah mara min banaat Chiilooh. Chiiluuhin wa amchu beehin fi turaab Banyaamiin. 22Wa kan abbahaathin aw akhwaanhin yaju yachku leena, nuguulu leehum : ‹Hinnu foogah akhwaanna min Banyaamiin achaan aniina ma ligiina leehum kulluhum awiin wakit haarabna Yaabiich Gilʼaad. Wa intu kula ma anteetu leehum banaatku be raayku wa be da, haliifitku ma talhagku.›»

23Wa da bas al-cheyy al-iyaal Banyaamiin sawwooh. Humman chaalo min al-banaat al-laʼʼaabaat hasab adadhum. Wa macho beehin fi ard warasathum wa bano hillaalhum battaan wa sakano fooghum.

24Wa fi l-wakit da, Bani Israaʼiil chatto. Ayyi waahid macha le gabiiltah wa le khachum beetah wa gaʼad fi ard warasatah. 25Wa fi l-wakit daak, ma fi malik fi Israaʼiil wa ayyi naadum bisawwi cheyy al-hu bidoorah.

Currently Selected:

Gudiya 21: ADT19

Highlight

Copy

Compare