1 Muluuk 17
17
Al-nabi Iliyaas ballakh be l-jafaaf
1Wa fiyah raajil waahid usmah Iliyaas saakin fi hillit Tichbi fi turaab Gilʼaad. Wa hu gaal le l-malik Akhaab : «Nahlif be Allah al-Hayy, Ilaah Bani Israaʼiil al-ana gaaʼid naʼabudah, fi l-siniin al-jaayiin ma fi karany wa la matara illa kan ana chahadtah.»
2Wa baʼad da, Allah hajja le Iliyaas wa gaal : 3«Gumm min hini wa amchi ale sabaah wa allabbad fi waadi Kariit sabaah le bahar al-Urdun. 4Wa hinaak tachrab min al-waadi wa ana amart khurbaat yijiibu leek akil.»
5Wa khalaas, Iliyaas sawwa hasab amur Allah. Hu macha sakan fi waadi Kariit sabaah le bahar al-Urdun. 6Wa fi l-bakaan da fajur wa achiiye, al-khurbaat gaaʼidiin yijiibu leyah khubza wa laham. Wa hu gaaʼid yachrab min almi al-waadi.
Iliyaas macha le armala fi Sarafa
7Wa baʼad Iliyaas gaʼad wakit chiyya fi l-bakaan da, al-waadi yibis achaan al-matara ma sabbat fi l-balad. 8Wa khalaas, Allah hajja leyah wa gaal : 9«Gumm amchi hillit Sarafa al-gaaʼide fi turaab Seeda wa askun hinaak. Achaan ana amart le mara waahide armala tantiik akil.»
10Wa khalaas, Iliyaas gamma macha fi Sarafa. Wa wakit wisil fi madkhal al-hille, hu chaaf al-mara al-armala gaaʼide tilaggit hatab. Hu naadaaha wa gaal leeha : «Min fadulki, jiibi leyi almi chiyya fi maaʼuun nachrab.» 11Wa wakit maache tijiib leyah al-almi da, hu naadaaha battaan wa gaal leeha : «Jiibi leyi maʼaaki khubza sakhayre kula.»
12Wa hi raddat leyah : «Nahlif be Allah al-Hayy Ilaahak, ana ma indi cheyy jaahiz. Ma faddal leyi illa dagiig fi umra yisaawi malyit iid wa dihin chiyya fi karyo. Wa hassaʼ jiit nilaggit hatab achaan nisawwi akil leyi ana wa le wileedi naakulu. Wa baʼad da, numuutu.»
13Wa khalaas Iliyaas gaal leeha : «Ma takhaafe, amchi wa sawwi misil inti gultiih. Wa be l-cheyy al-indiki da bas, sawwi leyi ana khubza sakhayre wa jiibiiha leyi. Wa baʼad da, sawwiih leeki inti wa le wileedki. 14Achaan daahu Allah Ilaah Bani Israaʼiil gaal : ‹Al-dagiig ma yikammil min al-umra wa l-dihin ma yikammil min al-karyo lahaddi l-yoom al-Allah yijiib al-matara fi l-ard.›»
15Wa khalaas, al-mara machat wa sawwat misil Iliyaas gaalah leeha. Wa humman akalo, hi wa Iliyaas wa aayilitha le muddit ayyaam. 16Wa l-dagiig al-fi l-umra ma kammal wa l-dihin al-fi l-karyo kula ma kammal wa da bigi hasab kalaam Allah al-gaalah be waasitat Iliyaas.
Al-nabi Iliyaas gawwam wileed al-mara
17Wa baʼad da, wileed al-mara al-armala sitt al-beet di bigi mardaan. Wa maradah bigi chadiid bilheen lahaddi maat. 18Wa hi gaalat le Iliyaas : «Chunu al-beeni wa beenak, ya nabi Allah ? Inta jiit achaan tizakkirni be khataayi wa taktul wileedi walla ?» 19Wa hu radda leeha wa gaal : «Antiini wileedki.»
Wa khalaas, chaal al-wileed min iideenha wa macha beyah foog fi l-gasir, fi l-beet al-hu saakin foogah wa raggadah fi l-sariir. 20Wa fi l-bakaan da, saʼal Allah be chidde wa gaal : «Ya Allah Ilaahi, le l-mara al-ana gaaʼid deef fi bakaanha di kula tisawwi leeha cheyy fasil wa taktul wileedha walla ?»
21Wa Iliyaas almattat talaata marraat min foog le l-wileed wa saʼal Allah be chidde wa gaal : «Ya Allah Ilaahi, nachhadak tigabbil ruuh al-wileed da.» 22Wa Allah khibil suʼaalah wa ruuh al-wileed gabbalat wa hu hiyi. 23Wa Iliyaas chaal al-wileed wa dalla beyah min al-gasir wa antaah le ammah wa gaal : «Chiifi ! Daahu wileedki hiyi.» 24Wa l-mara gaalat le Iliyaas : «Aywa, hassaʼ ana irift kadar inta nabi Allah wa akiid al-kalaam al-gaaʼid tuguulah da jaayi min Allah.»
Currently Selected:
1 Muluuk 17: ADT19
Highlight
Share
Copy
Want to have your highlights saved across all your devices? Sign up or sign in
Arabe tchadien (alphabet latin) Bible © Alliance Biblique du Tchad, 2019.