Esd 1
1
Re' i k'uhb'aal xupuhkaaj ruq'orariik i reey Ciro
(2 Cron 36.22-23)
1Chupaam i peet haab' rokiik chi reyil i Ciro ar Persia, re' i QaJaaw Dios reh chi xooj eloq wach i ruk'uhb'aal ruq'orom cho ruuk' chii' i Jeremías jalal ruq'oral, xuyeew paránima i Ciro chi naa ruq'orom ruuk' chii', chi naa rutaq'aam ruq'orariik panhuuj chupaam chu'nchel i tinamit taqe i k'uhb'aal wili:
2Re' hin Ciro i kireey i aj Persia i nuq'or taq aweh i q'orik wili: Re' QaJaaw Dios wilik pan taxaaj xuyeew panuq'ab' chu'nchel i tinamit wach ak'al, xuyeew panuq'ab' chi naa nuyejaam i rupaat i Dios ar Jerusaleem wilik ar Judá. 3Je' re' noq wila' hat taq rutinamiit i Dios neerub'an chi nee taq tiooj Jerusaleem chi rutinamiit i rupaat i Dios re' i ki Dios i aj Israel. Re' i reh i Dios inkiloq'ej ar Jerusaleem. Re' ta naq i QaJaaw Dios neentoob'inik taq aweh. 4Eh nik' k'ihaal i xi kahnik chi k'achalkeeb' chupaam i ju'jun chi ye'aab', inchol kitob'eem i kika'jaah naa kojiik ye'jan reh i rupaat i Dios ruuk' i ruye'ariik i plata, i oro. Eh naakiye'em i kichikoop, naakiye'em i kimayiij xanaa ruchaliik pankik'ux, reh chi naa rukamaniik parupaat i Dios ar Jerusaleem.
Re' taqe i aj Israel wilkeeb' naq Babilonia xi sutinik wo' chik Jerusaleem
5Re' QaJaaw Dios xuq'or pankanima i k'amal kib'eeh i riih rumaam i Judá, je' wo' taqe i k'amal kib'eeh i riih rumaam i Benjamín, je' wo' taqe i k'amal kib'eeh aj tiij, je' wo' taqe i aj Levíta chi xkichop kik'ux chi ojik Jerusaleem chi rutinamiit i rupaat i Dios. 6Eh chu'nchel i kika'jaah xtoob'inik keh ruuk' i ruye'ariik i plata, i oro, taqe chikop, ruuk' taqe i xa chib'ih jariik k'ih tz'aaq, eh ruuk' i ruye'ariik i kimayiij xan chalik pankik'ux. 7Eh re' reey Ciro reh xuq'asaj taqe i kulk inkamanik parupaat i Dios. Re' taqe i relq'aam reje Jerusaleem i reey Nabucodonosor xuk'am taqe reje Babilonia xuyeew parupaat taqe i rutiyoox. 8Re' i Ciro kireey i aj Persia xuq'or reh i Mitrídates molol tumiin chi naa rajlaam taqe i kulk, noq naa ruq'asam reh Sesbasar wilik chi taaq'anik ar Judá. 9Re' taqe kulk xrajlaaj je' wili kik'ihaal: Lajeeb' ru ka'winaq i nimaq kulk, re' ruuk' i oro, jinaj miil i nimaq kulk re' ruuk' i plata, eh b'elejeeb' ru ka'winaq i kuchilo. 10Eh lajeeb' ru ka'winaq i kulk re' ruuk' i oro, kijib' siento ruuk' lajeeb' i kulk re' ruuk' i plata, eh jinaj miil taqe i xa chib'ih jariik kikamanik wii'. 11Eh chu'nchel i kulk re' ruuk' i oro, i plata ho'oob' miil ruuk' kijib' siento. Chu'nchel i re' xuk'am chaloq Jerusaleem i Sesbasar, noq xi sutinik cho Babilonia, haa' taqe i xi elik wo' chik cho Babilonia.
Currently Selected:
Esd 1: POK
Highlight
Share
Copy
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.