Sal 91
91
Re' QaJaaw Dios inko'linik qeh chuwach i ti' k'axik
1Awach i k'acharik i rub'an chi ri'sil i rajaawriik i QaJaaw Dios
xiik' naah nimaal i rajaawriik, ma' xta nee ruk'ul.
2Je' la' wili i ruq'or: QaJaaw Dios, re' hat ti ko'linik
weh, hat ticha'jinik weh, hat nuDios,
awuuk' i hat i nuyeew nuk'ux, inki.
3Re' Dios neenko'linik aweh pan kiq'ab' inkaaj achopariik.
Eh tiruko'leej chuwach i yab'ilaal inkansanik.
4Re' reh naa ruko'liniik aweh,
je' rukab' noq i ruko'leej i rak'uun i ati't kixlaan chi ri'sil ruxiik'.
Eh re' rukorkiil wach ruk'ux naa ruko'liniik aweh
chi je' jino'q pulato ch'ihch'.
5Eh ma' naa ta ayo'jiik kuum taqe i kiyohb'isanik chaq'ab',
eh ni xata kuum taqe i ti' k'axik ink'uloq pan q'iij.
6Ma' nee ta tiyo'jik kuum taqe i yab'ilaal inchalik chaq'ab',
ni xata re' taqe i ti' k'axik kib'anik sachooj pan q'iij.
7Atoob' ta nee kikimiik jino'q miil panatz'eet,
eh lajeeb'-oq miil panasak'aaj,
re' hat ma' xta neenak'ul.
8Xa naa la' awilom ruuk' naq'awach
noq naakiye'ariik chutojariik
i kimahk taqe i yiib' wach i kina'ojb'al.
9Re' hat ma' xta naa ak'ulum,
ruum re' QaJaaw Dios nim rajaawriik xakoj chi awaj ko'loom.
Eh ruuk' i reh i nayeew ak'ux.
10Ma' xta jino'q i ti' k'axik naa ruchaliik cha naah.
Eh ni xata naakitz'a'jiik ruum yab'ilaal i wilkeeb' panapaat.
11Ruum re' QaJaaw Dios naa rutaq'aam taqe chaloq i ruánjel,
reh chi naa kaat kicha'jeem xa aha' pa' nee tiooj i k'oq.
12Re' keh naa kaat kich'ihleem ruuk' kiq'ab',
reh chi ma' nee ta naq'oj awiib' wataq ab'aj.
13Eh neetib'ehik chi kixilak kaq b'ahlam, chi kixilak i aaq',
chi kixilak i kak'uun i kaq b'ahlam,
chi kixilak i nimaq josq'laj chikop.
14Re' QaJaaw Dios je' wili ruq'or:
Ruum chi q'e' kiruk'ax naa nuko'leem chikiwach taqe re'.
Eh naa nuye'em runimaal wach ruum reht'al chi re' hin i Dios.
15Eh noq neerupahqaaj rutoob'jiik weh, nee wo' nutob'eej.
Re' hin naa wesaniik reh pan i ti' k'axik,
eh naa nuye'em ruloq'il.
16Re' hin naa nuye'em k'ih-oq haab' reh i suq laj k'acharik,
eh naa wo' nuko'leem, inki.
Currently Selected:
Sal 91: POK
Highlight
Copy
Compare
Share
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.
