Sal 90
90
Re' Dios k'achlik chi juneliik re' winaq xama' najt ta nk'acharik
1QaJaaw Dios, xa re' wo' hat ti ko'linik qeh pampeet,
eh xakok'ahchi' wo' kooj ako'leem yu'naak.
2Eh noq komajaa' i natz'uhkrisaj i yuuq' k'ixkaab',
i wach ak'al, taqe i k'achareel wilkeeb' chupaam,
xa hat wo' cho Dios, eh je' wo' chi juneliik.
3Re' hat i naasutej wo' chik chi pooq i winaq.
Noq inaq'or chi naa wo' chik kisutiniik chi pooq, kisutinik wo' hoq.
4Xti korik noq re' jinaj miil haab' chawee hat,
xa je' rukab' noq xik'ik i q'iij eew,
eh xa je' naa nik'ik kiib' ixib'-oq ora reh aq'ab'.
5Re' ruk'achariik i winaq xa je' jino'q xohk'risanik
inasach wach chi jumehq'iil, je' naa nik'ik qeerjoq ruum i rooq ha'.
Xa je' rukab' i ch'ahn, ink'ihik pan wahq'eq.
6Chawil i ch'ahn reh xasuq chik i k'ihik i rub'an pan wahq'eq,
eh paruxq'eqiil inb'ooyrik, eh inkimik chi jumpech.
7Xti korik noq re' hat i nayeew aajosq'iil chi qanaah, inasach qawach.
Eh insahchik qana'ojb'al chi jumpech.
8Ruum chu'nchel i qamahk i ruyib'kiil wach qana'ojb'al
pansaqum wilik chawach i hat.
9Eh xti korik chi re' qak'achariik naa asacham wach ruum aajosq'iil,
eh jarub' haab' qak'achariik xa je' nik'ik junjiiq' chi uxlab'al.
10Ruum re' hoj xalajeeb' wo' ru kajwinaq haab'
qoh k'acharik, eh re' taqe i xti q'e' kow, kajwinaq haab' kik'achariik.
Eh chi q'e' najt nee qoh k'acharik, xaruti'kiil k'uxliis,
xa kowlaj kamanik i ruk'am chaloq.
Eh re' i ju'jun chi haab' jumehq'iil inik'ik je' rukab' i qak'achariik.
11Ma' jino'q ineht'alinik reh nik' wach i sachooj neena a'n ruuk' aajosq'iil.
Ma' jino'q ineht'alinik reh ko aha' neemponik i ransil aajosq'iil
12Chayeew qeh chi naab'jik chi xama' najt ta rooq i qak'achariik,
reh chi neenqareq qana'ojb'al chub'anariik
i holohik imponik chawach i hat.
13QaJaaw Dios, ¿konik' chik najtiil naa aye'em
aajosq'iil chi qanaah?
Chaketelaaj wo' chik qawach i hoj, hoj amoso.
14Chak'uhtaaj qeh chi jumehq'iil aawotob'il.
Chi je' re' ma' k'isiin ta suq kiil qak'ux
noq neenqatz'uyej awach nik' chik najtiil i qak'achariik.
15Chayeew jarub'-oq haab' qeh i suq laj k'acharik
je' rukab' noq xqak'ul i k'ih laj haab' chi ti' k'axik.
16Chayeew qeh chi naab'jik taqe aakamaj i hoj, hoj amoso.
Eh re' taqe i qiih qamaam neenkilow wach aaloq'il.
17Re' ta naq i rotob'il i QaJaaw Dios nee ruyeew chi qanaah.
Xti re' ta naq i reh neentoob'inik qeh chi manlik ruuk' i qakamaj
reh chi nee qoh elik korik ruuk' i neenqa a'n.
Currently Selected:
Sal 90: POK
Highlight
Copy
Compare
Share
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.
