Ex 30

A jun yet'l xajmb'al yic incienso

(Ex 37.25-28)

1'Ix yaln pax Jehová 'ixtic: 'Ac' b'o junc xo yet'l xajmb'al 'a te 'a'nte acacia, yujto a 'a yib'n̈ 'oj tz'a incienso. 2Lajn tz'aj 'a schan̈ paq'uil. 45 centímetro spac'b'il, 45 centímetro pax schiquin. 90 centímetro tz'aj ste'il. Tz'och pax sch'ac 'a junjn yisquinyoal, junn̈j tz'aj sb'o 'a smasnil. 3Tza'n 'ajxoc 'och oro 'a yib'an̈ yet' 'a spac'b'il schan̈il. Tz'och pax 'a te sch'ac cha. Tz'och yelwnub'l stitac, to nab'a oro tz'aji. 4Tza'n 'ajxoc 'och chab' q'uen argoya 'a yaln̈ te yelwnub'l sti cha, chab' 'a junjn spac'b'il, yujto a 'a yojl eb' q'uen 'oj 'ec' te scan̈nub'al cha, sec wach' sb'achx b'eyoc. 5A 'a te acacia, ata tzac' b'o eb' te can̈nub' cha, tza'n 'ajxoc 'och oro 'a spatquil eb' te'. 6Tzlajw cha, tza'n 'och jun yet'l xajmb'al chi 'a yojltac 'elt te cortina 'aych yen̈loc scaxail in trato, 'a 'aj 'ay smacl te caxa 'a 'ajtil tzin chaj in b'a eyet'oc. 7'A junjn sq'uin̈b'ial, yic yorail sb'o cantil, ata tzyac' tz'a Aarón jun tzo'n̈ incienso 'a yib'n̈ jun yet'l xajmb'al cha. 8'Oj yac' tz'a pax 'a junjn yemc'ual, atn 'a yorail yoch sc'a'l cantil. 'Oj sb'o eb' jun tic 'a wojltac an Jehová in 'a smasnil tiempo. 9Man̈ scomn n̈usc jun tzo'n̈ xo incienso 'a yib'n̈ jun yet'l xajmb'al cha, man̈ sn̈us no xajmb'al 'a yib'an̈ mto harina, mto yal uva tzicx 'och 'a yib'an̈. 10A jun yet'l xajmb'al cha, to wicn̈ej yaji. 'A junjn ab'il tzsucn 'och Aarón chic' 'a sch'ac jun yet'l xajmb'al cha, atn schic'l no xajmb'al 'oj a'nc lajwc smasnil mul. 'A junjn ab'il 'oj sb'o eb' jun chi 'a smasnil tiempo, xchi Dios.

A q'uen tumn tzyac' junc mach sjeloc

11'Ix yaln Jehová 'a Moisés 'ixtic:

12A yic tze'n chan̈ sb'isl eb' et israelal tic, junjn eb', 'oj yac' eb' jun tzo'n̈ tojlb'al 'ayn an Jehová in yuj sq'uinal, sec ax yic 'oj lajwc sq'ue wan sb'isl eb' cha, may junc yab'il 'oj jawc 'a scal eb' yic tzcham eb' yu'uj. 13Smasnil eb' tzyac' tz'ib'xoc sb'a, yowlal tzyac' eb' o'e gramo q'uen plata 'ayn an Jehová in yuj stojnb'ilc sq'uinal, spacl 'a yal-l 'a jun 'echtab' tzc'anx 'a in cajnub'. 14Smasnil eb' junc'l ab'il sq'uinal yet' 'a yib'an̈, atn eb' tic tz'a'n jun tumn chi 'ayin. 15A yic tzya'n eb' jun tojlb'al chi 'ayn an Jehová in yuj sq'uinl cha, wach'xam rico, matz tac' to 'ec'b'al o'e gramo q'uen plata chi tzyac'a, toxn̈ej pax meb'a', matz tac' pax to man̈ tz'acnoc tzyac' o'e gramo q'uen plata cha. 16Tza chaj q'uen plata chi 'oj yac' eb' 'ayn yuj stojnb'ilc sq'uinl cha, yujto ata 'oj 'och yopiso q'uen 'a yol Mantiado 'a 'aj tzin chaj in b'a eyet'oc. Atn jun chi tz'ochcn e nanb'ilc 'ayn an Jehová in tic, yujto tzeyac' jun tojlb'al chi yuj e q'uinl cha, xchi Dios.

Jun palagan nab'a bronce

(Ex 38.8)

17'Ix yaln pax Jehová 'a Moisés 'ixtic:

18'Ac' b'o junc q'uen palagan nab'a bronce tz'aji yujto tz'och yopiso mixnub'al. Bronce pax tz'aj sb'achnub'al yalan̈. A 'a snan̈l yet'l xajmb'al yet' Mantiado 'aj tzin chaj in b'a eyet'oc, ata tza'cn 'ochi, tza'n 'ajxoc b'ut'joc yet' a a'. 19Yujto ata 'oj yic' q'uet Aarón yal yet' eb' yunnal, yic 'oj sb'icnc eb' sc'ab' yet' yoc. 20'Oj mixnjoc can eb' ta', yic 'oj 'och eb' 'a yol Mantiado 'a 'aj tzin chaj in b'a eyet'oc. 'Oj mixnjoc pax eb' 'a yic 'oj c'och eb' 'a stz'ey yet'l xajmb'al yic tz'at ya'nc tz'a eb' ofrenda 'a wojltac, sec wach' ma'oj comn cham eb'. 21Man̈ comnoc 'oj cham eb', toto 'oj sb'ic eb' sc'ab' yet' yoc. A jun tic ley tz'ajcn 'a smasnil tiempo 'a Aarón yet' pax 'a eb' yin̈til, xchi Dios.

Jun perjuma to yicn̈ej Dios yaji

(Ex 37.29)

22'Ix yaln pax Jehová 'a Moisés 'ixtic:

23A 'a scal te 'awb'ente', 'ay jun tzo'n̈ te wach' sjab', molb'tzej lajchwe'oc libra stzatjil te mirra, waque'oc libra te canela yet' pax waque'oc libra te cálamo, 24yet' lajchwec libra te acacia. Tz'echtax jun tzo'n̈ chi yet' jun echtab' tzc'anx 'a in cajnub'. Nan̈l schan̈l litro pax yaceiteal te olivo. 25A junc mach yojc sb'on perjuma, a cab' tzb'oni, wach' cab' tz'aj sb'o'i yujto wicn̈ej tz'aji, to a tzc'anlb'axi yic tz'och junc tas wico'oc. 26-28Tzlajw cha, tza tzicn 'och jun perjuma chi 'a yib'n̈ jun tzo'n̈ tic: Mantiado 'a 'aj tzin chaj in b'a eyet'oc, te scaxail in trato, te mexa yet' syamc'ab'il, jun yet'l cantil yet' syamc'ab'il, jun yet'l xajmb'al yic incienso, yet'l xajmb'al 'aj tz'ajx tz'a no xajmb'al yet' syamc'ab'il smasnil, q'uen palagan yet' sb'achnub'al yalan̈. 29'Ixta tzotj a'n can 'och jun tzo'n̈ chi wico'oc; tzann̈j junc tas 'oj stench sb'a 'a 'a, tz'ochcn pax wico'oc.

30Tza tzicch pax perjuma chi 'a Aarón yet' 'a eb' yunnal, sec 'ixta tzotj a'n can 'och eb' ya'malc 'och sti eb' 'anma 'ayin. 31Tzlajw cha, tzaln yab' smasnil eb' et israelal jun tzo'n̈ tic. To a yic 'oj b'ey tiempo, a jun perjuma tzb'o cha, to wicn̈ej tz'aji, yujto a 'oj c'anlb'axc 'a yic 'ay junc tas tz'ochcn wico'oc. 32Matz tac' scomn 'a'n 'och jun perjuma chi 'a junc comn 'anma', matz tac' pax scomn b'o junc xo perjuma 'icha jun cha. Yujto a jun perjuma cha to wicn̈ej yaji, matz tac' scomn yamxi. 33Toto 'ay mach tzb'on junc xo perjuma 'icha wal jun cha, mto tzcomn tzicj 'och 'a junc comn 'anma', a jun mach 'ixta tzb'o cha, 'ijx cab' 'el 'a e cal, xchi Dios.

A jun incienso

(Ex 37.29)

34'Ix yaln pax Jehová 'a Moisés 'ixtic:

Molb'tzej cot jun tzo'n̈ tic, yic tza'n b'o jun incienso to wicn̈ej tz'aji: Tzcot stzatjil te estacte, stzatjil te incienso wach' sjab', stzatjil te gálbano yet' sjoxl jun tzo'n̈ e no noc' uña sb'i 'ay 'a yojl a mar. 35Wach' tzotj a'n b'o jun incienso chi yet' jun tzo'n̈ cha, si'mb'il tzcalb'tan̈xi, tz'at pax yatz'mil.#Ex 30.35 'Ixta yaln jun tzo'n̈ xo copia 'a hebreo. Wach' tz'aj sb'o yuj mach tzb'on cha, lajn tz'aj sb'o 'icha tz'aj sb'o perjuma. 36Tza tenn chojc jab'oc jun tzo'n̈ cha, tza'n 'och 'a yol Mantiado cha, 'a yojltac 'elt scaxail in trato. A jun incienso tic, niwn cab' yel'ch 'a e sat. 37May cab' junc mach tzb'o yic tzc'an 'a yatut 'icha wal jun incienso cha, yujto an Jehová in, an 'ay wic jun cha, an̈jtona pax ax tic, niwn cab' pax yel'ch jun chi 'ayex. 38A mach tzb'on junc xo incienso 'icha jun cha, secn̈ej to wach' yec' sjab' tzyab'i. A jun cha, 'ijx cab' 'el 'a e cal, xchi Dios.

Currently Selected:

Ex 30: CSS

Highlight

Copy