Jn 20
20
Is yictzojbail Jesús
(Mt 28.1-10; Mc 16.1-8; Lc 24.1-12)
1Axa yet ayto sakbi yet domingo xin, max toj María aj Magdala bay ayoctok mimanil Jesús. Axa yilon yet max apni, elnakxa makil ch'en ch'en tu'. 2Yuj tu' xan, max yak' yanej meltzoji, max jayoc bay Simón Pedro. Ayic' Pedro yetok jun cuywom camc'ulnebil tu'. Max yalon ix bay eb axca ti':
—Mayal wal ilay eltek mimanil Cham Jajawil bay max alaycan octok. ¿Baytal laj max ilaytok? ẍi bay eb. 3Max yabc'al Pedro yetok junxa cuywom tu xin, max toj eb yilon bay ch'en ch'en tu'. 4Yanej eb toj cawanil; palta max cancan Pedro tu' yuj junxa tu', xan a jun tu' max babji yapni yin aymanil. 5Max octok t'anan yul ch'en ch'en tu'. Axa yiloni, asanxanej an k'ap max chul-lay oc yin, lanancanok. Maj octok jun cuywom tu' yul ch'en. 6Tzakan yapni oc Simón Pedro tu' yintak. Max apnic'al ocok, max octok yul ch'en ch'en tu', axa max yiloni, asanxanej an k'ap tu' lanancan ayok, 7c'al an tx'ambalej max oc pixan yin jolom Jesús, chulancan ay an, cax najat ta c'otancantok an. 8Lajwi tu' max octok junxa cuywom max babji yapni oc tu'. Ato yet max yilon axca tu', max yaon oc yin c'ul. 9Puralto max yaoc eb yin c'ul tol yel max ictzonelay aj Jesús, yujtol c'amto chi nachaj el yuj eb tzet tz'ibbilcan yul tx'an Un Tz'ibbilcanok, tol ok ictzonelay pax aj Jesús xol eb camnak. 10Lajwi tu xin, max pax eb cuywom tu' bay yatut.
Max tx'oxaj ba Jesús bay María aj Magdala
(Mc 16.9-11)
11A pax María aj Magdala tu xin, max cancan c'atan jun ch'en tu'. Maj octok ix yul ch'en. Toc'al max octok t'anan ix yul, cax chi ok' ix. 12Axa max yiloni, ayoctok cawan ángel yul ch'en tu', caw wal sak is pichil eb. Chotan ay eb bay max ec'lej mimanil Jesús, jun bay jolomtak, c'al junxa bay yakantak. 13Cax max k'anlen eltek eb bay ix axca ti':
—Ach ix, ¿tzet yuj xan chach ok'i? ẍi eltek eb.
—Chin ok'i, yujtol max ilay bey is mimanil Cham Wajawil cayti'. ¿Baytal wal mi max ilaytok? ẍi ix bay eb.
14Ato wal xew yalon ix axca tu', max meltzojtok acan ix yintak, axa yilontek ix, ayic' Jesús. Palta maj yojtaknej el ix, tatol a Cham. 15Yuj tu' xan max k'anlej el bay ix axca ti':
—Ach ix, ¿tzet yuj xan chach ok'i? ¿Mac cha sayic'ok? ẍi bay ix.
A naon ix, tol a nak ilom awbejal te' lecan ec' bay tu'. Yuj tu' xan max yal ix bay axca ti':
—Ach mamin, ta ach max ul eiltek mimanil Jesús, al wal ayin bay max bet ak'canok, cax chi toj wioni, ẍi ix bay.
16—¡María! ẍi Jesús bay ix.
Yuj tu' xan max meltzojtok acan ix bay. Axa k'anjab aj ix yin hebreo tu' axca ti':
—Raboni, ẍi ix. Chi yal elapnok. Meẍtol.
17Axa yalon Jesús bay ix axca ti':
—Manchak quin a mitx'a', yujtol manto in ajtok bay ayic' in Mam; palta asi', al bay eb wuẍtak, c'al bay eb wanab masanil, tol ok in paxaj bay ayic' in Mam. A in Mam, e Mam c'apax wetok. A in Diosal, e Diosal c'apax wetok, ẍi Jesús bay ix.
18Yuj tu' max toj María tu' yal bay eb cuywom Jesús axca ti':
—Caw wal max wil yin Cham Jajawil, ẍi ix bay eb. Cax max yalon c'apax ix bay eb tzetak max yal Cham.
Max tx'oxaj ba Jesús bay eb is cuywom
(Mt 28.16-20; Mc 16.14-18; Lc 24.36-49)
19Ac'ala'c'al ton yet jun domingoal tu' yet k'ekbintakil, max wajbaj ba eb cuywom Jesús. Caw wal makaki yayji puertail te na bay wajan ec' eb tu', yuj xiwc'ulalil eb bay eb yajaw bay Judea. Axa yilontek eb, waanxa oc Jesús nan xol eb, cax max yalon bay eb axca ti':
—Junc'ulalokab ayex, ẍi bay eb.
20Lajwi tu xin, max tx'oxon yul is k'ab bay eb tu', c'al tz'eyil bay max toj ch'en lanza. Axa yet max yilon eb cuywom tu' tol a Cham Jajawil, caw wal max tzaloj aj eb sic'libil.
21Axa yalon bay eb junelxa axca ti':
—Junc'ulalokab ayex. Axca max quin yut chekontek co Mam Dios, caytu' chex wut in chekon c'apaxtok, ẍi bay eb.
22Lajwi yalon juntzan ti', axa xuontok cak'ek' yiban eb tu', cax max yalon axca ti':
—Chaekcan Cham Espíritu Santo. 23Ta ay mac che yak' tan is yobtakil, ok yak' c'apax tan Dios is yobtakil tu'. Ta ay mac c'am che yak' tan yobtakil xin, ok canc'alta' is yobtakil tu' yiban, ẍi Jesús bay eb.
Max il-lay yin Jesús yuj Tomás
24Ay jun yetbeyom eb cuywom Jesús chi yik Tomás, cax chi al-lay c'apax Tioẍ yin. C'amic' yetok eb yet max ec' Jesús yilon eb. 25Yuj tu' xan max yal eb yet cuywomal tu' bay axca ti':
—Ayon ti', max jil yin Cham Jajawil, ẍi eb bay.
—Ta c'am chi wil yechel ch'en lawuẍ yul is k'ab wal ayin caw, cax c'am chin jektok yiximal in k'ab yul yolanil ch'en tu', c'al in jekontok in k'ab bay is tz'eyil, maj waoc yin in c'ul, ẍi.
26Ukubixi wal tu', max wajban pax oc ba eb bay yul te na tu' junelxa. Ayxa ec' Tomás tu' yetok eb yet tu'. Caw wal makaki yayji puertail jun na tu', axa max yilontek eb, lecanxa oc Jesús nan xol eb. Max yalon Cham bay eb axca ti':
—Junc'ulalokab ayex, ẍi bay eb.
27Lajwi tu', axa yalon bay Tomás tu' axca ti':
—Ilab in k'ab ti'. Jektok yiximal a k'ab yul yolanil ti', cax cha jekontok c'apax a k'ab bay yolanil tz'eyil in c'ul ti'. Manchakxa ak' cabc'ulal, palta aoc a c'ul win, ẍi Jesús bay.
28Lajwi tu xin, max yalon Tomás tu' bay axca ti':
—Ach Wajawil, ach in Diosal, ẍi bay.
29Axa yalon Jesús bay axca ti':
—Tomás, max aoc a c'ul win yujtol max in ela'. A eb man yowalilok chin iloni, cax chi yaon oc eb c'ul win, yelxac'al watx' yet eb, ẍi bay.
A tzet yuj xan max tz'ibelaycan jun libro ti'
30Xiwiltoc'al milagro max el yunen Jesús satak eb is cuywom tu', palta maj tz'ibelaycan yabixal masanil yul jun libro ti'. 31Max tz'ibelaycan juntzan ti', yet watx' che yaoc yin e c'ul, tol a Jesús, a ton Cristo Cham C'ajol Dios. Ta cay tu' ok e yut e yaon oc yin e c'ul, ok e cha' k'inalej tol ayc'al yin tojbalk'inal bay.
Currently Selected:
Jn 20: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989