Stg 1
1
Is yichbanil carta Santiago
1Ayin ton Santiago in, yak'omal serbil Dios wayji, yak'omal c'apax serbil Cham Jajawil Jesucristo wayji. Chi watok cawil e c'ul e lajcaweb makanil, ex wet israelal, ex tol sakleminak e yayji ec' bay junjun conob.
Jun jelanilal chi yak' Dios
2Ex wuẍtak, ex wanab, a yet chi jayoc tzanc'al tzet porobalil e yiban, ak'ek wal tzalojbok e c'ul sic'libil. 3Ay wal bay chon ak'lay porobal, yet watx' chi txecloj elok tatol yel asannej wal yin Dios chi jaoc co c'ul. Jojtak wali, tol a ton yuj tu' chi ji' co tec'anil. 4Yuj tu xin, caw wal tol che ya wal oc e c'ul yin Dios, yet watx' ok watx'jokc'al oc e nabal. Tatol caytu' che yut caktu', watx' ex ton wal satak Dios. C'am jabok palta ayex. 5Tatol ayon manto tz'akanok co jelanil xin, co k'an bay Dios. Ok ak'lay ayon, yujtol ok yak' Cham ayon co masanil yin masanil is c'ul, tatol chi co k'an bay. Man ok on tzulay yuj. 6A yet chi co k'anon co jelanil, yowalil tol chi jaoc yin co c'ul tol ok co cha'. Manchak jak' cabc'ulal yet chi co k'anoni. A eb tol chi yak' cabc'ulal yin Dios, lajan eb axca wal a' mar tol chi aj pomnaj sat yuj cak'ek', cax tol chi meltzojtakbi sat. 7Tatol ay ex caytu' che yut e ba caktu', man e na' tol ay jabok tzet ok e cha' bay Cham. 8A mac chi yak' cabc'ulal, man tec'anok waay nabal yin tzanc'al tzet chi yunej.
9Mac ex tol meba' ex ch'an, tzalojanek, yujtol ay e yelapnok yul sat Dios. 10A pax ex tol beyom ex xin, tzalojanek yujtol a Dios chi ak'on nachaj el e yuj, tol yaynakil ex, yujtol lajan wal ok yuncan el eb beyom axca xumaquil an ac'un. 11A yet chi aj can c'u, chi takay bulnaj yuj yowal k'ak', cax junnej bek chi pukil xumaquil, cax manxa watx'ok yili. Axca wal chi yun takil xumaquil an ac'un tu', cay wal tu' ok yun lajwok ay eb beyom tu', yet lanan wajban eb is tumin.
A yet chon ak'lay porobal
12Tatol chi techaj juj yet chon ak'lay porobal, caw wal watx' jet. A yet chi xew jak'lay porobal tu', ok co cha' is pak, a ton k'inalej tol ayc'al yin tojbalk'inal. A ton jun tu' altebilcan yuj Dios bay eb chi camc'ulneni. 13A yet chon ikbelay junen junok yobtakil, manchak co na' tol a Dios chon ikbani, yujtol c'am chi je' yikbelay Dios yin yunen yobtakil. C'am c'apax junok mactxel chi yikbaj Cham yin yunen yobtakil. 14Yujtol a tzet chi jiloc co c'ulok yin chon ikbani. A ton juntzan tu' chon montencantok yin yobtakil. 15Axa yet chi junen juntzan tzet yetal chi jiloc co c'ulok yin tu', chi occan co yobtakil. A ton yet tu' chi etaxcan el co nabal yuj co yobtakil tu'. Yujc'al wal tu' bian, chon tojcan bay camich.
16Ex wuẍtak, c'al ex wanab camc'ulnebil wuj, manchak e yak' c'aytok e ba. 17A bay Dios chi tit masanil tzet yetal watx', tol toc'al chi sa' ayon. A ton Cham max watx'nen juntzan satcanil tzektebal. Caxc'al mi tol chi q'uexlabi yili eb, cax chi oc ewan yin, palta man cayok tu' Dios. C'am bay chi q'uexlabi nabal Cham. 18Chon yi aj wan Cham yuninalok, yin yak'balnen is k'anej tol caw wal yel, yujtol axca tu' max el yin c'ul max on yutej, yet watx' aj babel on satak masanil tzet yetal max yesnej ajok.
Yowalil chi co beybalnej tzet chi yal is k'anej Dios
19Ex wuẍtak, c'al ex wanab camc'ulnebil wuj, naektek juntzan chi wal ti'. Acbajek e txiquin e yabeni. Man comonok che yal junok tzet yetal yin aymanil. Manokab c'apax comonok chi tit e yowal. 20Yujtol a yet chi tit jowal, man yochwanok Dios chi junej. 21Yuj tu xin, bekekcan masanil yobtakil, c'al beybalej man watx'ok yet yalantok. Chaek wal yin mansoc'ulalil is k'anej Dios, jun tol abilxa oc jin, yujtol chi je' co colchajcan el yuj.
22Jikejek tzet chi yal k'anej Dios tu xin. Manokab toc'alok chi jabic'ok. Tatol toc'al chi jabic'ok, ayonc'al oc chi jetnej co ba. 23Ay mac chi aben k'anej Dios, palta c'am chi yikej pax eb, lajan wal eb axca junok mactxel chi yil sat yul junok espejo. 24Chic'al lajwi yilon sat tu', cax chi toji; yin aymanil chi toj c'ayc'ulal yuj, tzetbil yili sat. 25Ay jun ley tol caw tz'akaki. A ton chi ak'on co bekbanilal. Tatol chi cam co cuyoni, cax c'am chi toj c'ayc'ulal juj tzet chi yala', cax chi co beybalneni, tatol caytu' chi junej, ok jak' tzalojbok co c'ul yin masanil tzet chi junej.
26Tatol chi co na' tol ayon oc yin jun acaw ak'oj serbil Dios, palta c'am chi co mitx' pax tzakay co ti' yin tzet chi jala', ayonc'al oc chi jetnej co ba cax nabac'al ton wal chi jala' tol ayon oc yin jun acaw ak'oj serbil Dios. 27Tatol ay eb unin tol c'amxa is mam c'al is txutx, c'al eb ix tol camnakxa yichamil, cax ayoc eb yin yailal, yowalil chi toj jil eb, cax chon colwaj bay eb. Yetok c'apaxok, chi co pojil co ba xol masanil yobtakil bay yulyibank'inal ti'. Tatol chi jun juntzan ti', tita' wal tol yel chi jak' serbil co Mam Dios chi yal tu'.
Currently Selected:
Stg 1: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989