Jn 16
16
1Chi walcan juntzan ti' ayex, yet watx' c'am chi somchaj el e c'ul. 2Yujtol ok ex yuktej eltek eb jet israelal yul nail is culto eb. Toltax ok jay jun tiempoal tzanxac'al mac ok ex ak'on camok, a ok yut naon eb, tol a Dios lanan yak'on serbil eb. 3Ok yun eb axca tu', yujtol man yojtakok eb in Mam, cax mayin yojtakok c'apax eb. 4Chi walcan juntzan ti' ayex, yet watx' a yet ok jay juntzan tiempoal tu', ok e natek tol albilcan ayex wuj.
Is mulnajil Cham Espíritu Santo
Maj wal juntzan ti' ayex yet yalantok, yujtol ayinto ec' e yetok yet tu'. 5Axa tinani xin, ok in pax bay Cham max in chekontek; palta c'am junok ex che k'anlej el ayin, bay ok in tok. 6A ti' e yet, tol caw wal chex cusaj yuj juntzan chi wal ti'. 7Palta wal yel chi wal ayex, a yuj ok in tok, xan caw wal watx' e yet. Ta c'am chin toji, c'am chi jay jun t'inan colwaj e yetok tu', palta a yet ok in tok, ok in chektek Cham ayex. 8A yet ok jayok, ok yak' yojtaknej el eb yet yulyibank'inal ti', tol yobtakwom eb. Ok yak' yojtaknej el eb, tol watx'c'al max wut in ba, cax ok yak' c'apax yojtaknej el eb, tol ok beyc'ulnelay eb yuj Dios. 9Ok yak' yojtaknej el eb tol yobtakwom eb, a ton yuj c'am chin yaoc eb yin is c'ul. 10Ok yak' yojtaknej el eb, tol watx'c'al max wut in ba, yujtol ok in pax bay ayic' co Mam Dios. C'amxa bay ok e yil win cayti'. 11Ok yak' c'apax yojtaknej el eb, tol ok beyc'ulnelay eb yuj Dios, yujtol mayal beyc'ulnelay jun yajaw bay yulyibank'inal ti'.
12Xiwiltoc'al tzet yetal chi yochej in c'ul chi wal ayex, palta majto nachaj el e yuj tinani'. 13A to yet ok jay Yespíritu Dios tol yel chi yala', catatu' ok nachaj el e yuj, yujtol man munilok ok yal yul yet. A masanil tzet ok al-lay bay, a ok yala'. Ok yal c'apax e yab tzet tolto ok jayok. 14A' ok tx'oxk'abnen elok, tol miman welapnok. Masanilc'al tzet ok wal bay, ok yal ayex. 15Wetc'al yayji masanilc'al tzet ay bay co Mam Dios. Yuj tu', chi wal ayex, masanilc'al tzet ok wal bay, ok yal ayex.
Max yal Jesús bay eb is cuywom tol ok jay tzalojc'ulal eb
16Junxanej bek che yil oc win, axa yet junxa bek manxa ok e yil win, palta ok in e yil yet cabej oxej, ẍi Jesús bay eb.
17Lajwi yalon axca tu xin, axa c'oli yalubtanen jaywan eb is cuywom axca ti':
—¿Tzetlaj chi yal elapnok juntzan chi yal ayon ti'? Ilab tol max yala': Yet jun bek manxa ok e yil win, a pax ato yet cabej oxej ok in e yila', ilab ẍi. Chi yalon c'apaxok: Yujtol ok in paxaj bay co Mam Dios, ẍi ayon. 18A jun chi yal, yet jun bek tu', ¿tzetlaj wal chi yal elapnok tinani'? Caw wal c'am chi nachaj el juj, tzet chi yala', ẍi eb.
19Max yojtaknej el Jesús tol chi yochej eb chi k'anlej bay, tzet chi yal elapnok tzet max yal tu'. Yuj tu' xan max yal bay eb axca ti':
—Mayal wal ayex: Yet junxa bek, manxa ok e yil win, a pax ato yet cabej oxej ok in e yila', quin chi ayex. ¿Tom a ton juntzan max wal ayex tu' che yalubtanej e xol? 20Wal yel chi wal ayex, ok ex cusok, ok ex ok'ok, axa eb yet yulyibank'inal ti xin, ok tzaloj eb. Ok ex ton cusok, palta a jun e cusc'ulal tu', tzalojc'ulalxa ok yutaj ba. 21K'inalok junok ix ix tinani', lanan yalji yune'. Ya' ton chi yabej, yujtol lanan yec' ya', palta a yet mayal jay yune' tu', tok naanto yailal tu' yuj; a ti yet, caw wal chi tzaloji, yujtol mayal jay jun unin yuj bay yulyibank'inal ti'. 22Axca ton junok ix tu', caytu' ok e yunej. Chex ton cus tinani', palta a yet ok ex wilon yet junelxa tu', caw wal ok ex tzaloj pax ajok. Axa jun e tzalojc'ulal tu', c'am mac ok je' yion ec' ayex.
23A yet jun c'ual tu', c'amxa tzet ok e k'anlej el ayin. Wal yel chi wal ayex, masanilc'al tzet ok e k'an bay co Mam Dios, ok yak' ayex yujtol wet ex. 24A tinani', c'amto tzet che k'an bay Dios yin in bi. K'anek, ok e cha'. Ok ak'lay ayex, yet watx' ok tz'aknaj el e tzalojc'ulal.
Cannakxa eb yet yulyibank'inal ti' yalan yuj Jesús
25Yin q'uexan abix max yun walon juntzan cuybanilej ti' ayex; palta ay jun tiempoal ok jayok tol manxa cayok tu' ok wut walon axca tu', yujtol tojolxa ok wut walon yabixal co Mam Dios ayex. 26A ton yet ok jay jun c'ual tu', ok e k'an tzet che yochej yujtol wet ex. Man lananok walon ayex, tol ayin ok in k'an tzetak yetal bay co Mam Dios e yuj. 27Ilab tol acaw Cham chi camil c'ul e yin, yujtol chin e camc'ulnej, cax che yaon ton oc yin e c'ul tol a bay Cham titnak in. 28Yel, a bay co Mam Dios titnak in, cax max in jay bay yulyibank'inal ti'. Axa tinani xin, ok in bekcan yulyibank'inal ti', cax ok in paxaj bay ayic' Cham, ẍi Jesús bay eb.
29Axa yalon eb is cuywom tu' bay:
—A tinani', watx'xa max ot alon ayon. Manxa q'uexan abixok max ot alon ayon axca yet junel. 30A tinani', jojtak tol ojtak masanil tzet yetal. Man yowalilok chi co k'anlej el ayach, cax ok alon ayon. Yuj tu' xan chi jaoc yin co c'ul tol a bay Dios titnak ach, ẍi eb bay.
31Xan max yal Jesús bay eb axca ti':
—¿Chimi e yaoc e c'ul win tinani'? 32Palta lananxa jay tiempoal e saklemcantok. Tx'ok tx'okxac'al bay ok ex tojcan junjun ex. Axa in e bekoncan in tx'oklil tu'; palta man in tx'oklilok ok in canok, ayic' co Mam Dios wetok. 33Max wal masanil juntzan ti' ayex, yet watx' chex can yin junc'ulalil wuj. A bay yulyibank'inal ti', ok ton e yil yail, palta tec'bajek e ba, yujtol a eb yet yulyibank'inal ti', mayal can eb yalan wuj, ẍi Jesús bay eb.
Currently Selected:
Jn 16: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989