2 Jn 1
1
Camc'ulal
1Ayin ton anciano in chin tz'ibejtok jun in carta ti' ayach, ach wanab sic'bilxa el yuj Dios, c'al yetok bay eb one'. Wal yel ay in camc'ulal e yin. Man asannejok in ay in camc'ulal e yin, palta masanil c'apax eb ojtaknen jun cuybej caw wal yel, ay c'apax is camc'ulal eb e yin. 2Ay co camc'ulal e yin yuj jun abix caw wal yel, tol ayxa oc jin yin junelnej. 3Yak'okabc'al co Mam Dios, yetok Cham Jajawil Jesucristo is watx'c'ulal ayex. Ok'okab c'ul eb e yin, yak'okab c'apax eb is junc'ulal ayex bay tu', yujtol ayoc co nabal yin tzet yetal tol yel, cax ay pax co camc'ulal.
4Caw wal max tzaloj aj in c'ul yet max wabeni, tol ay eb one' lanan beybalnen jun cuybej caw wal yel, axca wal yaloncan co Mam Dios ayon. 5A tinani xin, chin tewi ayach, tol wal chi co camc'ulnelejek co ba co masanil. A jun chekbanil chi waltok ayach ti', man aokto jaben ti', yujtol atax yet max jaon oc Dios yin co c'ul max jaben jun ti'. 6Ta lanan co beybalnen tzet chi yal chekbanil Dios, ay co camc'ulal chi yal tu'. A jun chekbanil max jab yettax max on oc yetok Dios, a' chi aloni tol chi co camc'ulnelejek co ba.
Eb lek'ti'
7A tinani', xiwil eb lek'ti' chi ec' bay yulyibank'inal ti'. Chi ec' yal eb axca ti': Man ocnakok Jesucristo animail yet max ulic'ok, ẍi eb, chi tz'akon yal eb. A eb chi alon axca tu', toc'al chi yal eb; chita yal eb axca tu' yujtol ajc'ul oc eb yin Cristo. 8Ilekc'al e ba bay eb ayex ti', yet watx' man nabaok e mulnajil bay tu'. Ta axca wal walon ti' che yut e ba, tz'akanc'al ok e cha' e paktzil bay Dios.
9Tzanc'al mac chi pitnej ba bay cuybej yalnakcan Cristo, cax chi bekoncanok, c'am oc Dios yin chi yal tu'. Palta ta ayc'al oc co nabal yin is cuybej tu xin, ayoc co Mam Dios jin chi yal tu', cax ay c'apax oc is C'ajol jin. 10Ta ay mac chi jayoc ayex, tol tx'ok cuybanilej chi ec' yala', manchak e cha eb bay e yatut, tamwal che k'an is watx'c'ulal Dios yiban. 11Ta che k'an is watx'c'ulal Dios yiban, axca wal tol che yaltok e yet yin is cuybej man watx'ok tu' yetok.
Chi alaytok cawil c'ul eb
12Xiwiltoc'al juntzanxa tzet chi yochej in c'ul chi waltok ayex, palta man ok in tz'ibejtok yul jun in carta ti'. Yujtol chin na', tol chok wal je' ex toj wiloni. Catatu' chin watx' alnencan juntzanxa tzet yetal ayex, cax chi texac'al tz'aknajcan el co tzalojc'ulal bay tu'.
13A eb yune' xal a nuej ayic' cayti', a ton xal sic'bilxa el yuj Dios, chi yatok eb cawil a c'ul bay tu'.
Currently Selected:
2 Jn 1: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989