Oseas 1
1
Aju t-xu'jil Oseas ex ke tc'wa'l
1Atzun yol jlu tzaj tma'n Kman te Oseas aju tcy'ajal Beeri, tej cyten ke rey lu tuj Judá: Uzías, Jotam, Acaz ex Ezequías, ex tej tten Jeroboam aju tcy'ajal Joás te rey cye aj Israel.
2Cyja'tzun tten o xe't tyol Kman tuc'il Oseas tu'n t-xi tma'n cye aj Israel, chi cyja': Ke aj Israel ma tz'el cypa'n cyib wi'je tu'nju ma che oc ic tza'n jun xu'j jawni twitz cyuc'il xinak. Icxtzun teya, txi'ya ex k'intza jun t-xu'jila jawni twitz cyuc'il xinak, ex ba'n tu'n tul tc'wa'la ti'j tu'ntzun cyoc ke c'wa'l lu te tal jun xu'j jawni twitz cyuc'il xinak, chi Dios te Oseas.
3Tzajtzun ti'n Oseas ju xu'j Gomer tbi, aju tme'jel Diblaim, tu'n toc te t-xu'jil, oc ten tal ex tzaj jun tcy'ajal Oseas ti'j. 4Xi'tzun tma'n Kman te Oseas: Jezreel tbi tal k'a c'oquel tk'o'na, porque ch'ix tpon tyemp tu'n tcub nk'o'ne cycastiw ke tiyjil rey Jehú, tu'n tlaj e cub byo'n xjal tu'n tuj lugar Jezreel, ex bi'x cnajel wu'ne aju cycawbil rey cyxol aj Israel. 5Masque nim cyipun ke cysoldad aj Israel, che najel wu'ne tuj chk'ajlaj Jezreel tuj tk'ijlalil tzul, chi Kman te Oseas.
6Oc ten juntl tal Gomer ex txin tal ul itz'j. Tzajtzun tma'n Kman te Oseas: Lo-ruhama*fn* tbi tal txin c'oquel tk'o'na, porque mlay tzaj k'ak'an nc'u'je juntl maj cyi'j aj Israel ex mlay cub nnajsa'ne cyil. 7Atzun cyi'j aj judá ctzajel k'ak'an nc'u'je. Wu'nxe che cletel, akine Cymane ex Cydiose; mya tu'n k'oj che cletel wu'ne, mya tu'n xobl plech, mya tu'n spad, ex mi'n che ajben chej mi ke xjal cyjax cyibaj chej, chi Kman te Oseas.
8Tej tel tal txin Lo-ruhama ti'j tch'u', oc ten juntl tal Gomer ex ul itz'j juntl tal, k'a. 9Tzajtzun tma'ntl Kman te Oseas: Lo-ami*fn* tbi tal k'a c'oquel tk'o'na, porque mya etzantl keye wu'ne ex myatl Cydiose kine.
Che c'metel aj Israel juntl maj tu'n Dios
10Tzul tk'ijlalil tu'n cyoc aj Israel ic tza'n ttxa tz'a'n ttzi mar, misicyer jun jacu bant tmalon ti'j ex mlay bant tajlanjtz. Mlay k'manjtz cye tu'n Dios cyja': Mya etzan keye wu'ne, chiwt, nok o'cx cxel tma'n Dios cye: Akeye tc'wa'l Dios itz'. 11C'oqueltzun cychmon cyib aj Judá ex ke aj Israel ex cjawil cysc'o'n o'cxcu jun nejenel cyxol, ex tuj tcyakil part che tzajel tu'n cyul meltz'aj tuj Jerusalén. Ma'xix toclen aju tk'ijlalil Jezreel.
Currently Selected:
Oseas 1: MAMH
Highlight
Share
Copy
Want to have your highlights saved across all your devices? Sign up or sign in
Mam del Norte © Sociedades Bíblicas Unidas 1993