Hageo 1
1
Xi k'ma'n cye xjal tu'n tjaw binchet juntl maj tja Dios
1Tuj tcabin abk'i ttzyetlen tcawin rey Darío, tuj tnejel k'ij te tkakin xjaw, tzaj yolin Kman te Hageo aju t-sanjel, tu'n t-xi tma'n te Zorobabel aju tcy'ajal Salatiel ex gobernador te Judá, ex te Josué aju tcy'ajal Josadac ex nejenel cye ke pal: 2Atzun jlu in tma'n Kman aju at tipumal tu'n tbant tcyakil tu'n: Ke xjal lu in cyma'n ka na'nx tpon tk'ijlalil tu'n tjaw binchet njaye juntl maj. 3Tzajtzun yolin Kman te Hageo aju t-sanjel, tu'n t-xi tma'n cye xjal cyja': 4¿O'cxpetzun cyeye ma pon tk'ijlalil tu'n cynajane cyuj ke ja tbanilxix, ex atzun weye nja o cub xitj minti' in jaw cybincha'ne? 5Akine Cymane Tajaw Tcyakil in xi nma'ne jlu cyeye: Che ximane ti'j aju in baj cyi'je. 6Nim in cu'x cyawa'ne, pero nic'xi in jaw cychmo'ne; in che wa'ne, pero minti' in noj cyc'u'je, in che c'ane, pero minti' in we' txketle'n cyi'je; nno'c cyk'o'ne cyẍjo'we, pero minti' in che mek'te tu'n, ex aju twi cyc'u'j xjal in cyc'mo'n, in cu'x cyk'o'n mer ic tza'n tuj jun sac at toy'. 7Akine Cymane Tajaw Tcyakil in xi nma'ne jlu cyeye: Che ximane ti'j aju in baj cyi'je. 8Cyxi'ye cywi' ke witz, cyi'ntze ke tze' ex cybincha'n jawe njaye juntl maj, tu'ntzun ntzalaje tuj ja lu ex tu'n tten wajwalile tuj. 9Ximan cyu'ne tu'n tjaw cychmo'ne nim twitz cyawale, pero nok ch'in in chmet cyu'ne; ex aju in xi cyc'u'ne tuj cyjaye nok tajx in cub naj wu'ne. ¿Tiku'ntzun jlu? Chi Dios aju Tajaw Tcyakil. Tu'nju minti' in jaw cybincha'ne njaye o cub xitj, nok o'cx in che ximane ti'j tu'n tjaw cybincha'ne cyeye cyja, 10cyja'tzun minti' in tzaj jbal cyibaje, ex aju tx'otx' minti' in tzaj tk'o'n tawal. 11Wu'ne ma tzaj coresma cyibaj ke cojbil ex cyibaj ke witz, tibaj triw, tibaj tkan uva ex tibaj tkan olivo, tibaj tcyakil twitz awal tuj cojbil, cyibaj xjal, cyibaj alumaj ex tibaj tcyakil cyak'unben xjal, chi Dios.
12Atzunte Zorobabel tuc'ix Josué cyuc'ix ke xjal otok che ul meltz'aj tuj cytanmi, tej cybinte aju yol otok tma Dios te Hageo aju t-sanjel, tzaj t-xobil cyi'j ex xi cyniman. 13Atzunte Hageo aju t-sanjel Kman xi tma'n cye xjal aju yol otok txi tma'n Dios te cyja': Chi Kman in tma'n: Akine Cymane, lu kine atine cyuc'ile.
14Cyja'tzun tten, xi tcyuwsa'n Kman tc'u'j Zorobabel aju gobernador te Judá, tuc'ix Josué aju nejenel cye ke pal, ex ke xjal otok che ul meltz'aj tuj cytanmi, tu'n tjaw binchet juntl maj tja Kman Dios aju Tajaw Tcyakil. 15Tuj 24 tajlal tkakin xjaw tuj tcabin abk'i ttzyetlen tcawin Darío tzyet ak'untl cyu'n.
Currently Selected:
Hageo 1: MAMH
Highlight
Share
Copy
Want to have your highlights saved across all your devices? Sign up or sign in
Mam del Norte © Sociedades Bíblicas Unidas 1993