Eclesiastés 1
1
Tcyakilju in baj twitz tx'otx' nokx gan
1Atzun ke yol lu tu'n ju xjal pacbal, aju tcy'ajal David aju o cawin tuj Jerusalén.
2Tcyakilju in bant cyu'n xjal nokx gan, chi pacbal, tcyakilju in bant cyu'n xjal nokx gan. Nokx gan tcyakil.
3¿Ti tajben te xjal tu'nju in baj tbyon tib ti'j ak'untl tzalu twitz tx'otx'?
4Cycyakil xjal in che cyim, ex in che ul itz'j mastl te cyxel, atzun te tx'otx' minti' in ch'expaj.
5In jawil k'ij, ex nne'x k'ij, ex ax nna'j meltz'aj juntl maj tuj tlugar tu'ntzun tjawil juntl maj.
6Ate cyk'ik' in xumin cyja' t-xi' tuj tnayaj k'ij ex in k'on welt tu'n t-xi' tuj tbank'ab k'ij. Ate cyk'ik' in xi' ex nna'jtz meltz'aj juntl maj tuj tlugar.
7Ke nima max in che pon baj cycyakil tuj mar, atzunte mar minti' in noj; ex ake cye nima in che ajtz meltz'aj juntl maj tuj cylugar tu'ntzun cybet juntl maj tuj cybe.
8Cycyakil ti'xti at twitz tx'otx' in ko sict cyu'n, ex mlay bant tchic'bet ku'n tza'n tten jlu; ke tbak' witzbaj mlay baj cygan tu'n cyque'yin ex ke ẍcyinbaj mlay baj cygan tu'n cybin.
9Aju o baj ojtxi, axtzunju cbajel juntl maj. Aju o binchanjtz ojtxi, axtzunju cbantel juntl maj. Minti' jun ac'aj in bant tzalu twitz tx'otx'.
10Ex ka at xjal ma tma cyja': Que'yintza, ate jlu ac'aj, ka chi, ax icx te jlu o bant atxix ojtxi.
11Akeju o che bant ojtxi, ya minti' in che tzaj na'ntl, ax icxtzun aju cbantel tuj tk'ijlalil tzul, mlay tzaj na'ntl cyu'n ke xjal che ul itz'j te tibajxi.
Aju o tzic' twitz pacbal ti'j.
12Akine pacbal o chin oque te rey cye aj Israel tuj Jerusalén, 13xi nk'on wibe tu'n tel nnic'e ti'j ex tu'n nxnak'tzane tuc'il nabl ti'j tcyakilju in binchanjtz tzalu twitz tx'otx'. Cyuwxix ak'untl o cub tk'o'n Dios cyibaj xjal tu'ntzun cyak'nanxix ti'j. 14Ex eltzun nnic'e ti'j ka tcyakilju in binchanjtz tzalu twitz tx'otx' nokx gan, junx ta' ic tza'n jun xjal taj tzaj ttzyu'n cyk'ik' tu'n tk'ab.
15Aju ẍo'c ti'j, mlay bant tjikumanjtz ti'j, aju minti' at kuc'il mlay tz'oc kk'o'n te tajlal.
16Entons, o nmaye tuj wanmiye cyja': Ma ch'iy woclene, ma chin oque mas at nnable cywitz cycyakil keju o che cawin tuj Jerusalén tej na'nxtok woque te rey; ma tz'oc nim nnable ex ma tz'el nnic'e ti'j nimcu; 17ex xi nk'on wibe tu'n tel nnic'e ti'j nabl, ax icx tu'n tel nnic'e ti'j tza'n tten jun xjal minti' tnabl ex minti' ttxolil tyol, ex ma tz'el nnic'e ti'j, tcyakil jlu minti' tajben. 18Ax toc, ka at nim tnabl jun xjal, mas in tzaj bis ti'j tu'n jlu; ex ka at nim ba'n tu'n, ax nim yajbil in tzaj ti'j.
Currently Selected:
Eclesiastés 1: MAMH
Highlight
Share
Copy
Want to have your highlights saved across all your devices? Sign up or sign in
Mam del Norte © Sociedades Bíblicas Unidas 1993