Job 1
1
Ri rubanik ruk'aslen ri achin rubini'an Job
1K'o k'a jun achin ri chiri' pa jun ruwach'ulew rubini'an Us, ri rubini'an Job. Re achin re' kan janila k'a choj ri ruk'aslen y kan man jun achike ta itzel nilitej chirij. Kan janila k'a rukiy ri Dios chuwech, y kan ruch'aron-ri' chire ri itzel taq banobel. 2Rija' ek'o wuqu' ruk'ajol y e oxi' rumi'al. 3Chuqa' ek'o e 7,000 rukarne'l, e 3,000 ru-camello, e 500 k'ulaj rubóyix, e 500 rubur, y janila e k'iy rusamajela'. Ja rija' ri achin ri más rubeyomel ke chikiwech ri achi'a' ri ek'o chuqa' chiri' chupan ri ruwach'ulew ri', ri k'o pa relebel-q'ij.
4Ri e ruk'ajol ri Job kan nikibanala nimaq'ij pa taq kachoch, y chikijujunal kan k'o k'a q'ij toq nikibanala' kinimaq'ij. Rije' yekoyoj k'a ri e oxi' kana' richin chi yebewa-yebe'uk'ya' junan kik'in. 5Y toq chikijujunal rije' kibanon chik k'a ri kinimaq'ij, ri Job yeroyoj k'a ri ralk'ual richin nusuj kamelabel chuwech ri Dios koma chikijujunal rije', richin yech'ajch'ojir. Y kan nimaq'a' yan k'a niyakatej richin nusuj ri kamelabel ri', richin nuk'utuj rukuyubel kimak ri ralk'ual, roma rija' kan nuch'ob chi rik'in juba' xemakun rik'in ri kich'obonik o rik'in juba' e ch'owineq itzel pa taq kánima chirij ri Dios.
Ri Jehová y ri Satanás yetzijon pa ruwi' ri ruk'aslen ri Job
6Jun q'ij ri aj-chikajil rusamajela' ri Dios xbekimolo-ki' chuwech roma ri kisamaj, y chikikojol rije' beneq k'a chuqa' ri Satanás, ri sujunel. 7K'ari' ri Jehová xuk'utuj chire ri sujunel chi akuchi peteneq-wi. Ri sujunel ri' xubij chire ri Jehová chi peteneq chuwech chijun ri ruwach'ulew.
8Xeri' ri Jehová xubij k'a chire: ¿Atz'eton ruk'aslen ri Job ri nusamajel? Rija' jun achin ri kan janila choj ri ruk'aslen y man jun achike ta itzel nilitej chirij. Rija' kan k'o nukiy chuwech y nuya' k'a nuq'ij. Chuqa' kan man jun chik ri achi'el ta rija' chuwech ri ruwach'ulew, xcha'.
9K'ari' ri Satanás xubij: ¿Achike ta k'a roma toq ri Job man ta nuya' aq'ij? 10Rija' kan k'o chi nuya' aq'ij roma kan jebel aloq'oq'en. Achajin ri rixjayil, ri e ralk'ual y ronojel ri k'o rik'in. Kan aya'on aq'a' pa ruwi' ronojel ri rusamaj y roma ri' janila chik k'iy beyomel ri rumolon chuwech ri ruwach'ulew. 11Tawelesaj na pe ronojel ri rubeyomel, y q'alaj k'a ri' wi man chawech ta xkaruyoq' kan, xcha'.
12Y ri Jehová xubij chire ri Satanás: Wakami k'a, yin ninya' q'ij chawe chi ja rat ri katelesan ronojel ri k'o rik'in, jak'a rija' man taneq, xcha-el chire. Y xeri' ri Satanás xel k'a pe chiri' chuwech ri Jehová.
Ri Satanás xuya' ruk'ayewal pa ruk'aslen ri Job
13Jun q'ij toq ri e ralk'ual ri Job yewa-ye'uk'ya' pa rachoch ri nimalaxel kinimal, 14jari' toq xapon k'a jun rusamajel ri Job y xberuya' rutzijol chire: Roj ojk'o k'a pa samaj y e qukusan ri bóyix richin niqaben arado. Chiri' chiqanaqaj-apo yewa' k'a ri bur. 15Y chaq k'ate' xe'apon qik'in, eleq'oma' aj-Sabá, xekik'uaj-el ri bóyix y ri bur ri'. Xekikamisala' kan konojel ri samajela' chi espada; y xaxe yin xinkol-pe-wi' richin chi nonya' rutzijol chawe, xcha'.
16Kan k'a man jani k'a titane-qa chi ch'owen ri samajel ri' toq kan jari' xoqaqa chik jun samajel y xberubij chire ri Job: Toq roj ojk'o chiri' e qachajin ri karne'l, k'o k'a jun koyopa' ri xbeqaqa-pe chikaj, xeruk'is konojel ri karne'l y ri yuq'unela'. Xaxe chik k'a yin ri xikolotej kan, y roma ri' nonya' rutzijol chawe, xcha'.
17Y k'a nich'on na k'a re jun samajel re' rik'in ri Job, toq kan jari' xoqaqa chik jun samajel y xubij chire: E oxi' tzobaj eleq'oma' aj-Caldea xe'apon qik'in y xojbekichapa' chi oyowal, xekimej-el konojel ri camello chiqawech y xekik'uaj-el. Konojel ri ch'aqa' chik asamajela' kan xekikamisaj kan chi espada; y xaxe ok yin ri xinkol-pe-wi' richin chi nonya' rutzijol chawe, xcha'.
18Y re jun samajel re' kan k'a najin na chutzijoxik ri xbanatej, kan jari' toq xoqaqa chik jun rusamajel y xorubij chire ri Job: Ri ami'al y ri ak'ajol kimolon k'a ki' pa rachoch ri nimalaxel kach'alal; rije' yewa' y nikiqum k'a vino. 19Jari' toq jun nimalej kaq'iq' ri peteneq pa tz'iran ruwach'ulew xumej ri jay y xuwulaj. Ri kaq'iq' ri' kan chi e kaji' k'a kajtz'uk richin ri jay xumej, roma ri' toq ri jay xtzaq pa kiwi' rije' y konojel xeken. Xaxe chik yin chike konojel ri ojk'o chiri' ri xikolotej kan, y jare' nonya' rutzijol chawe, xcha'.
Ri Job nuya' ruq'ij ri Dios chupan ri ruk'ayewal
20Kan jari' toq ri Job xuretz ri rutziaq chirij roma bis, y xujuk'uk'ej-el ri rusumal-ruwi', y xuxuk-xumej-ri' richin xuya' ruq'ij ri Dios roma ri xuk'uluwachij, 21y xubij k'a: In ch'anel k'a toq xiralaj ri nte', chuqa' kan in ch'anel ri xkitzolin-el. Kan ja ri Jehová ri niya'on ronojel y kan ja chuqa' rija' nelesan; yin kan ninya' ruq'ij ri Jehová ri nibanon ronojel re', xcha'.
22Stape' ri Job kan k'ayew ri xuk'uluwachij, man jun ri xbanon ta chire chi xtzaq ta, y man xpe ta pa ránima richin xuch'ob ta achike roma toq ri Dios keri' xuben rik'in.
Currently Selected:
Job 1: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.