Jer 1
1
Ri Dios nroyoj ri Jeremías
1Yin Jeremías in ruk'ajol ri Hilquías jun chike ri sacerdote ri ek'o chiri' chupan ri tinamit Anatot, ri k'o chupan ri ruwach'ulew Benjamín. 2Ri Dios xch'on wik'in toq niq'aton-tzij ri Josías, ruk'ajol ri Amón, chiri' pa Judá, chupan ri juna' oxlajuj chire ri ruq'atbal-tzij rija'. 3Chuqa' xch'on wik'in pa ruq'ijul ri Joaquim, ri ruk'ajol ri Josías, chupan ri ik' wo'o' chire ri julajuj juna' chire ri q'atbel-tzij richin ri Sedequías, ri chuqa' ruk'ajol ri Josías, toq ri aj-Jerusalem xe'uk'uex-el pa ximonri'il.
4Y toq ri Jehová xch'on wik'in, kere' xubij chuwe:
5Toq k'a man jani katintz'uk rik'in ri ate'; yin kan wetaman chik awech.
Kan k'a man jani k'a katalex, toq yin at nucha'on chik.
Xatincha' richin naq'alajirisaj ri nuch'abel chikikojol konojel tzobaj winaqi' richin re ruwach'ulew, xcha'.
6Jak'a yin xinbij chire chi man yitikir ta yich'on, roma xa k'a janila in k'ajol. 7Y rija' xubij chuwe: Man tabij chi k'a janila at k'ajol. Rat kan xkabe k'a kik'in ri winaqi' akuchi xkatinteq-wi-el yin y kan xtabebij chike ri achike ri xtinbij-el chawe. 8Man taxibij-awi' chikiwech ri winaqi' ri', roma yin kan xkik'oje' awik'in richin xkatinchajij, ja yin Jehová ri yibin y ninya' nutzij chawe, xcha'.
9Jari' toq ri Jehová xuya-apo ri ruq'a' y xuchop ri nuchi' y xubij chuwe: 10Wakami yin ninya' ri nuch'abel pan achi'. Chupan re q'ij re' ninben chawe chi rat yach'on kik'in ri q'atbel taq tzij y ri tzobaj taq winaqi', richin yenwelesaj-el y yenwulaj, richin yek'is y yenke'ej; richin yenpaba-q'anej y yentik-qa, xcha' chuwe.
Ri achik' chirij ri che' almendro
11K'ari' ri Jehová xch'on chik wik'in y xubij chuwe: ¿Achike ri natz'et rat Jeremías? Y yin xinbij chire chi nintz'et jun ruq'a' almendro. 12Y rija' xubij k'a chuwe: Ja' kan keri' wi, roma yin kan ninchajij-wi'*f1* richin ninben ri ninbij.
Ri achik' chirij ri bojo'y
13Ri Jehová xch'on chik k'a pe wik'in y xubij chuwe: ¿Achike k'a la yatajin chutz'etik re wakami?, xcha'. Y yin xinbij: Yin nintz'et jun bojo'y ri jebel niroqo y kan nipulin yan el keri' pa xaman. 14K'ari' ri Jehová xubij chuwe: Pa xaman k'a xtipe-wi ri ruk'ayewal ri xtiqaqa pa kiwi' konojel ri winaqi' ri ek'o chuwech re ruwach'ulew re'. 15Roma yin yenwoyoj konojel ri tzobaj winaqi' ri ek'o pa xaman. Xkepe ri e ki-rey y xtikiq'et-tzij chiri' chuchi' ri tinamit Jerusalem, chikiwech-apo ri tz'aq ri nikisutij-rij ri tinamit y chuwech-apo ronojel ri tinamit richin ri Judá. 16Xtinya' rutojbalil-mak pa kiwi' ri awinaq aj-Judá roma ronojel ri mak ri xkiben chinuwech yin. Xinkimalij kan, richin xkiporoj pom y xexuke' chikiwech ri ch'aqa' chik dios ri xa ja rije' e banayon.
17Wakami k'a tachojmirisaj-el awi' y kabiyin y tabebij chike ronojel ri xinbij chawe. Kan kow k'a kapa'e' y man taxibij-awi', roma wi man kow ta xkapa'e' y xtaxibij-awi', xtinben chawe chi xkatzaq chikiwech rije'. 18Roma wakami, yin ninben k'a chawe achi'el jun tinamit ri sutin-rij chi tz'aq, achi'el jun xata't ri banon rik'in q'eqapueq o jun tz'aq ri banon rik'in q'enq'oj-pueq, richin chi napaba-awi' chikiwech ri e rey richin Judá, chikiwech ri e tata'al, ri e sacerdote y konojel ri tinamit richin re ruwach'ulew. 19Rije' xtikiben labal awik'in rat, jak'a man xketikir ta xkatkich'ek, roma yin xkik'oje' awik'in richin yatinto'. Ja yin Jehová ri yibin.
Currently Selected:
Jer 1: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.