Santiago 1
1
Ri Santiago nuya' rutzil kiwech ri nimanela'
1Yin Santiago, jun rusamajel ri Dios y ri ajaw Jesucristo, ninben-el re wuj re' chiwe rix ri ix nuwinaq judío ri ix talutajineq chuwech re ruwach'ulew, tik'ulu' k'a re rutzil-iwech re ninteq-el.
Ri rejqalen ri tijoj-poqonal
2Wach'alal, kan tikikot janila ri iwánima toq yixtejtobex. 3Roma kan iwetaman chi toq yixtejtobex rik'in ri ikuqubabel-k'u'x, nuben chiwe chi más nitej iq'ij. 4Man jun bey tik'is ri koch'onik iwik'in, roma k'iy utzil nuk'en-pe chire ri ik'aslen, nuben chiwe chi yixk'iy, tz'aqet ri ik'aslen y man jun chik nrajo'. 5Y wi ek'o qach'alal chi'ikojol ri nikajo' chi nik'oje' kina'oj, tikik'utuj chire ri Dios. Y rija' kan man xtupoqonaj ta xtuya-pe k'iy chike. Keri' nuben qik'in qonojel ri yojk'utun, y man jun achike ta xtubij chiqe. 6Jak'a toq rix nik'utuj ina'oj, k'o chi nikuquba' ik'u'x rik'in ri Dios, y man rik'in ta k'a ka'i' ik'u'x tik'utuj chire. Roma wi xa keri' niben, rix xa niben achi'el nuben ri ya' ri nibolqo't roma ri kaq'iq' pa ruwi' ri palou, ri nibe-kela' nibe-kela' nuben. 7Y wi rix keri' niben, man k'a tich'ob chi ri Dios xtuya-pe chiwe ri nik'utuj chire. 8Roma wi xa ka'i' ik'u'x toq nik'utuj chire ri Dios, niq'alajin chi xa ka'i' chuqa' ik'u'x iwik'in-qa rix chupan ronojel ri ik'aslen.
Ri meba'il y ri beyomel
9Y ri qach'alal ri maneq ok k'o kik'in chuwech re ruwach'ulew, xa tikikot k'a ri kánima, roma chuwech ri Dios rije' kan k'o-wi janila kiq'ij. 10Y keri' chuqa' ri qach'alal beyoma' ri kan k'o kiq'ij, kan tikikot ri kánima toq ri Dios nuqasaj kiq'ij. Roma rije' chuqa' xa man yeyaloj ta el chuwech re ruwach'ulew; xa e q'axel achi'el jun rusi'j q'ayis, 11roma toq nipe ruwech ri q'ij, ri q'ayis y ri rusi'j xa nichaqi'j y nik'is-qa, stape' kan jebel nitzu'un ri pa nabey. Kan keri' chuqa' nuk'uluwachij ri beyom rik'in ri rubeyomel, eqal-eqal nik'is qa.
Ri tejtobenik
12Ri wineq ri nukoch' ri tijoj-poqonal, kan jebel ruwa-ruq'ij, roma ri Dios xtuya' chire ri wineq ri' ri sipanik richin ri utzilej k'aslen ri man jun bey xtik'is. Ja sipanik ri' ri rubin chi xtuya' chire ri najowan richin. 13Jak'a wi k'o ta jun ri nibanon chire jun chik chi nimakun, man tubij chi ja ri Dios ri nibanon keri' chire. Roma ri Dios kan man nuben ta chire jun wineq chi nimakun, y chuqa' man jun nitikir nibanon chire ri Dios chi nimakun. 14Roma ri itzel taq rayibel ri ek'o rik'in ri wineq jari' ri yebanon chire chi niqaqa pa mak. 15Y wi nuya' q'ij chire ri itzel taq rayibel, chiri' nipe-wi ri mak. Y pa ruk'isibel nuk'en-pe kamik.
16Wach'alal ri yalan yixinwajo', man k'a kixq'olotej. 17Ronojel sipanik niqaqa-pe chila' chikaj rik'in ri Dios ri xbanon ri saqil, achi'el ri q'ij, ri ik', ri ch'umila'. Ri Dios man jun bey nijalatej achi'el nijalatej ri mach'ach'il. 18Y rik'in ri rurayibel rija' xuya' jun k'ak'a' qak'aslen toq xqakuquba' qak'u'x rik'in ri qitzij ruch'abel. Xuben keri' richin chi ja roj ri xojok achi'el ri nabey taq kiwech tiko'n ri ye'uk'uex-apo chire rija'.
Ja ri utz ri tibana'
19Wach'alal ri yalan yixinwajo', kan tiwak'axaj k'a nabey ri ruch'abel jun wineq y man chi'anin tik'uluba' ri ruch'abel. Chuqa' kan man k'a kixoyower chi'anin. 20Roma toq rix iwoyowal man yixtikir ta niben ri nrajo' ri Dios chi niben. 21Roma ri' tiya' kan ronojel ri man ch'ajch'oj ta y ronojel ri etzelal. Y k'o chi nich'utinirisaj-iwi' chuwech ri Dios, y titaqej chi utzil ri ruch'abel ri k'o pa taq iwánima. Roma ja ch'abel ri' ri nikolon iwichin.
22Y man xaxe k'a tiwak'axaj ri ruch'abel ri Dios, xa kan tibana' chuqa' ri nubij. Roma wi xaxe niwak'axaj ri ruch'abel ri Dios y man niben ta ri nubij, xa iyon rix niq'ol-qa-iwi'. 23Roma wi k'o jun ri nrak'axaj ri ruch'abel ri Dios, y xa man nuben ta ri nubij, xa junan rik'in jun wineq ri nutzu-ri' pan espejo, kan niq'alajin-wi ri qitzij rubanikil. 24Y toq xa k'a juba' tutzu' kan ri' ri pan espejo, man chik noqaqa ta chuk'u'x ri achike titzu'un. 25Jak'a ri nak'axan ri ruch'abel ri Dios y nutz'et jebel ri nubij, y kan nuben, kan jebel ruwa-ruq'ij. Roma ri ruch'abel ri Dios kan utz wi y nuben chiqe chi oj totajineq chik.
26Wi k'o jun nibin chi nuya' ruq'ij ri Dios y xa man nuchajij ta ri' rik'in ri ruch'abel, ruyon rija' nuq'ol-ri'. Y xa man jun utz nuk'en-pe chi nubij chi rija' kan nuya-wi ruq'ij ri Dios. 27Roma ri kan qitzij nuya' ruq'ij ri Dios, yerutola' ri malkani' taq ixoqi' y ri ak'uala' ri e maneq chik kite-kitata', y chuqa' man nunim ta chik ri' chupan ri etzelal richin re ruwach'ulew.
Currently Selected:
Santiago 1: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.