Isa 1
1
Ri kiyakatajinen ri rutinamit ri Dios
1Ja yin ri' ri Isaías, ri ruk'ajol ri Amós. Jare' k'a ri rutzijol ri xink'ul rik'in ri Dios pa ruwi' ri tinamit Jerusalem y ri ruwach'ulew Judá, toq xeq'aton-tzij ri Ozías, ri Jotam, ri Acaz y ri Ezequías ri chiri' pa Judá.
2Tawak'axaj k'a rat kaj,
tawak'axaj k'a rat ruwach'ulew,
roma ri Jehová nibech'on y niberubij:
Xenk'iytisaj walk'ual,
jak'a rije' xa xeyakatej chuwij.
3Ri taq bóyix y ri taq bur ketaman ruwech ri kajaw,
y ketaman achike niya'on kiway.
Jak'a rix nuwinaq israelita man iwetaman ta nuwech;
rix nutinamit kan maneq iwetamabal.
4¡Toq'ex iwech rix tzobaj winaqi' aj-maki'!
Rix ix jun tinamit ri kan ix nojineq chi etzelal,
jun sol winaqi' ri kan ix richin etzelal,
achi'el alk'ualaxela' ri maneq k'ix kik'in.
Rix kan xinimalij k'a kan.
Y kan xiben chi xyakatej janila woyowal yin Jehová ri ink'o pan iwi'.
5¿Achike k'a roma k'a niwajo' na más tijoj-poqonal?
¿K'a niwajo' na yixk'oje' chupan ri iyakatajinenri'il?
Rix kan ix achi'el jun wineq ri janila yawa'.
Chijun ri ijolon kan janila k'a sokotajineq,
y ri iwánima janila chik niq'axon,
6roma ri imak kan achi'el chik ri sokotajik ri nuk'uaj jun wineq;
nitiker k'a el pan iwaqen y napon k'a pan ijolon.
Kan man jun chik utz chire ri ich'akul;
xa kan xaxe chik k'a sokotajik, kajtajik y ch'a'k.
Xa kan man banon ta iwaq'omal,
ni man e pison ta rik'in jun tzieq,
ni man e ya'on ta juba' aceite chiwij richin yixch'uch'u' ta juba'.
7Ri iruwach'ulew xa kan man jun chik k'o chuwech;
y konojel ri itinamit kan xeporox.
ri e etzelanel iwichin kan chiwech rix nikitej-el ri itiko'n ri ibanon-qa,
y kan nimalin kan achi'el toq nikiwulaj kan ri man e aj wawe' ta.
8Kan ruyon k'a xk'oje' kan ri itinamit Jerusalem.
Ri iwachoch achi'el jun mo'k ri k'o pa jun li'aj-ulew ri tikon uva chuwech,
achi'el jun ti jay ri banon rik'in ruq'a-che';
ruyon k'o pa jun ulew ri tikil melón chuwech.
Ri itinamit Sión kan sutin-rij koma ri e etzelanel richin.
9Wi ta yin Jehová k'iytisanel richin ronojel man ta xixinya' kan juba' chiwe rix,
kan ix achi'el ta chik ri tinamit Sodoma y Gomorra.
10Tiwak'axaj k'a ri nuch'abel rix ri ix tata'al,
ri kan ix achi'el chik ri aj-Sodoma.
Chuqa' rix ri kan ix achi'el chik ri aj-Gomorra,
kan tiwak'axaj k'a ri nupixa'.
11¿Achike ta k'a nik'atzin chuwe ri janila chi kamelabel ri niben?
Kan xik'o yan nuk'u'x rik'in ri poron taq karne'l,
y ri kiq'anal ri e tiojirisan taq chikopi'.
Man ninrayij ta chik ri kikik'el ri bóyix,
ni kichin ri alaji' taq karne'l ni ri taq tzuntzun.
12Rix ri jantape' yixpe chinuwech yin;
¿achike xk'utun chiwe richin nixolq'otij kan ri ruwa-jay richin ri wachoch?
13Man tik'en-pe sipanik chuwe ri xa man jun rejqalen.
Ri pom kan man niqa' ta chik chinuwech,
chuqa' toq ninimaq'ijuj ri k'ak'a' ik',
ri q'ij richin uxlanen,
y ri q'ij richin molojri'il.
Kan man ninkoch' ta chik ri itzel taq ibanobal toq nimol-iwi' richin yixnimaq'ijun.
14Kan niben chuwe chi ninwetzelaj ri nimaq'ij richin ri k'ak'a' ik'.
Y man ninwajo' ta chik nimaq'ij richin niya' nuq'ij.
Re' kan jun ejqa'n chuwe yin.
Kan janila chik in kosineq richin ninkoch'.
15Toq rix nitzeqej ri iq'a' chikaj richin yixch'on wik'in,
yin kan ninwelesaj ri nutzubal pan iwi'.
Stape' janila chi ch'owen niben,
yin kan man xkixinwak'axaj ta,
roma ri iq'a' kan tz'ilobitajineq rik'in kik'.
16Tijosq'ij-iwi', tich'ajch'ojirisaj k'a iwi'.
Man chik tiben ri itzel taq banobel chinuwech yin,
y kan tiya' kan ronojel ruwech etzelal.
17Tiwetamaj niben ri utz.
Kan titija' iq'ij richin nikanoj ri ruchojmilal.
Kan ke'ito' ri yetz'ilox.
Kan tibana' pa ruchojmilal kik'in ri meba'i'.
Y kan ke'ito' ri malkani' toq ek'o chuwech ri q'atbel-tzij.
18Kixanpe richin yojch'on pa ruwi' re':
Stape' ri ik'aslen man ch'ajch'oj ta achi'el jun tz'il laj tzieq,
yin kan xtinben seq-seq chire achi'el ri chuma-tew.
Stape' ri imak kan xujel ri ik'aslen achi'el jun seq tzieq xok keq,
yin kan xtinben chik seq chire achi'el ri lana seq.
19Y wi rix xtiwak'axaj ri nuch'abel y xtinimaj nutzij,
kan xtitej k'a ri xtiwachin chuwech re ruwach'ulew.
20Jak'a wi man xtiwajo' ta xtinimaj nutzij,
xa xkixkamisex k'a chi espada,
roma ja yin Jehová ri yibin.
Ri rutojbalil y ri rukolik ri tinamit Jerusalem
21Rix aj-Jerusalem rubanon kan, kan in itzeqeliben,
jak'a re wakami ix achi'el jun ixoq itzel ruk'aslen ri xuya' kan ri rachijil.
Ri ojer kan chi'iwonojel rix kan ronojel pa ruchojmilal ri xiben.
Jak'a re wakami xa chi'iwonojel rix ix kamisanela'.
22Rix rubanon kan, kan ix achi'el ri saqipueq ri jebel ch'ajch'oj,
jak'a re wakami ix achi'el saqipueq ri xolon tz'il rik'in.
Chuqa' rubanon kan, kan ix achi'el ri vino ri man jun ya'on rik'in,
jak'a re wakami, ix achi'el vino ri xa xolon ya' rik'in.
23Ri e aj-raqen ri ek'o pan iwi' kan man e nimey ta tzij,
y kan xe'ok kachibil ri eleq'oma'.
Chikijujunal niqa' chikiwech chi yepuaqix,
y xaxe sipanik nikajo' nikik'ul.
Man nikiben ta pa ruchojmilal kik'in ri meba'i',
ni man yekito' ta ri malkani' toq ek'o chuwech ri q'atbel-tzij.
24Roma ri' ninbij yin ri in Dios k'iytisanel richin ronojel
chi kan xtinwelesaj k'a woyowal chiwij rix ri ix etzelanel wichin.
Ninbij yin ri k'o ronojel uchuq'a' wik'in
chi kan xtinya' k'a rutojbalil chiwe ri itzel nina' chuwe.
25K'ari' xkitzolin iwik'in rix;
richin xkixinch'ajch'ojirisaj chire ri imak,
achi'el toq nich'ajch'ojirisex ri saqipueq.
Chuqa' kan xtinwelesaj ronojel ri man ch'ajch'oj ta ri ek'o chi'ikojol.
26Kan xtinben k'a richin xkek'oje' chik to'onela',
y ri pixabanela' kan xtibekibana' chik achi'el ri ojer.
K'ari' xtikibij ri ch'aqa' chik winaqi' chiwe
chi ix jun tinamit ri kan k'o ruchojmilal iwik'in,
y ix jun tinamit ri kan nuben ri nubij.
27Wi ri winaqi' aj-Sión nikiben pa ruchojmilal, kan xkekolotej.
Ri winaqi' ri yetzolin wik'in kan xketotej, wi nikiben ri utz.
28Jak'a ri man e nimey ta tzij y ri e aj-maki' xa xkek'is,
y chuqa' ri xkemalin kan wichin yin, kan xkeken.
29Y rix kan xkixk'ixbitej k'a
roma xe'iya' kiq'ij wachibel chuxe' paten taq che'.
Xtiqasex iq'ij roma ri qejoj ri xe'iben richin xiya' kiq'ij ri i-dios.
30Rix xa kan xtik'is ri iwuchuq'a'
achi'el jun paten-che' yetzaq-el ri e chaqi'j taq ruxaq.
Rix xa kan xkixk'is
achi'el jun qejoj ri man ya'an ta.
31Ri k'o janila ruchuq'a' xa xtok achi'el páxa
y ri rusamaj xa xtok rubix q'aq'.
Re' junan k'a xkejinon pa q'aq'
y kan man jun k'a xtichupu, nicha' ri Dios.
Currently Selected:
Isa 1: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.