Ester 1
1
Ri reina Vasti xuyek royowal ri rey Asuero
1Xk'oje' k'a jun achin rubini'an Asuero, ri xok rey pa ruwi' k'iy ruwach'ulew ri xubini'aj Medo-Persia, ri k'o 127 nima'q taq ruwach'ulew chupan. Y nitiker-pe pa relebel-q'ij rik'in ri ruwach'ulew India y ri pa qajbel-q'ij napon k'a pa ruwach'ulew Etiopía. 2Y ri tinamit ri akuchi niq'aton-wi-tzij rija' ja ri tinamit Susa, y ri tinamit ri' kan chajin jebel y sutin-rij rik'in tz'aq.
3Y xbanatej k'a, chi chupan ri rox juna' richin ri ruq'atbal-tzij, chi xuben jun nimalej nimaq'ij chike konojel ri e tata'al, ri nima'q taq samajela', ri e aj-raqen kichin ri aj-labal y ri e aj-raqen pa kiwi' ri nima'q taq ruwach'ulew. 4Re jun nimaq'ij re' xyaloj waqi' ik' y rokik ri' xq'alajin chikiwech konojel ri e royon ronojel ri rubeyomel, ri ruk'ojlen y ri nimalej uchuq'a' ri k'o pa ruq'a'. 5Toq xetane' chire re jun nimaq'ij re', ri rey xuben jun chik nimaq'ij richin wuqu' q'ij, chuwa-jay chire ri rachoch. Xeroyoj k'a konojel ri winaqi'; nitiker-el kik'in ri k'o kiq'ij ri ek'o chiri' pa tinamit Susa, y k'a kik'in ri relik taq samajela' ri e yuqul pa samaj. 6Xuwiq k'a ri ruwech ri ruwa-jay rik'in peraj tzieq, seq, rex y raxroj ri kan janila jebel yetzu'un. Y ri peraj tzieq ri' e tzeqel rik'in argolla ri e banon rik'in saqipueq chuwech kolo' ri e banon rik'in lino q'eqq'oj-keq nitzu'un. Y ri kolo' ri' e ximil chikiwech ri pilar ri ek'o chiri'. Y ri pilar e banon rik'in abej mármol. Chuqa' ri ch'aket ri ek'o chiri' ronojel e banon rik'in q'anapueq y saqipueq. Ri ruwa-jay banon rik'in tz'ajtz'eq abej, ri banon rik'in mármol seq, y rik'in ch'aqa' chik jalajoj ruwech jebejoj taq abej keq, seq y raxroj yetzu'un. 7Keri' chuqa' ronojel ri qumbel vino ri ek'o chiri' e banon rik'in q'anapueq, y ronojel jalajoj kibanikil. Y ri vino kan pa ruk'iyal k'a k'o chiri' achi'el ri rubeyomel ri rey. 8Y ri rey xubij k'a chi chikijujunal ri winaqi' ri ek'o chupan ri nimaq'ij ri', tikiqumu' ri vino ri xa janipe' nikirayij; y man jun tiq'aton kichin, ni man jun tibanon chire jun chi kan tuqumu' ri vino ri'.
9Y chupan ri q'ij ri', k'o jun reina ri rubini'an Vasti, y rija' xuben jun chik nimaq'ij pa rachoch ri Asuero, ri rachijil, kik'in konojel ri ixoqi' ri ek'o.
10Toq xapon ri ruwuq q'ij, ri rey kan janila nikikot ri ránima roma k'iy vino ruqumun-qa, y roma ri' xeroyoj ri e wuqu' rusamajela' eunuco*f1* ri kibini'an Mehumán, ri Biztá, ri Harboná, ri Bigtá, ri Abagtá, ri Zetar y ri Carcás, y xubij chike chi 11kebe richin nibekik'ama' ri reina Vasti, y tukusaj-pe ri ru-corona, richin keri' konojel ri achi'a' y ri e tata'al xtikimey roma kan jebejoj ok rubanik. 12Xebe k'a ri eunuco chuk'amik ri reina achi'el xbix-el chike. Y toq xe'apon akuchi k'o-wi ri reina, rija' xa man xrajo' ta xpe y man xunimaj ta rutzij ri rey. Roma ri' ri rey xyakatej janila royowal. 13Y xuteq k'a koyoxik ri achi'a' ri e aj-na'oj ri kan ketaman ri nubij ri pixa', richin yeruk'ulubej; roma ri chiri' ri e rey kan nikiben-wi achi'el nikibij ri achi'a' ri kan ketaman ri pixa'.
14Y ri achi'a' ri', ja ri Carsená, ri Setar, ri Admata, ri Tarsis, ri Meres, ri Marsená y ri Memucán. Ja e wuqu' aj-na'oj re' ri ek'o más naqaj chire ri rey, y rije' e tata'al richin ri ruwach'ulew Medo-Persia. 15Y ri Asuero xuk'utuj k'a chike y xubij: ¿Achike k'a nubij ri pixa' pa ruwi' ri reina Vasti, roma man xunimaj ta nutzij toq xinteq ruk'amik, koma ri eunuco? ¿Achike k'a niqaben wakami?, xcha'.
16Y ri Memucán xubij k'a chire ri rey y chike ri e waqi' chik tata'al: Man xaxe ta chawech rat rey xmakun-wi ri reina Vasti, xa kan chikiwech konojel e tata'al y chikiwech konojel tinamit richin re ruwach'ulew ri ek'o pan aq'a', 17roma ri rubanobal re reina re' xtikak'axaj ri ch'aqa' chik ixoqi', y rije' xtikiqasaj ruq'ij ri kachijilal y xa xtikinataj chi rat rey Asuero xateq royoxik ri reina Vasti y rija' man xpe ta chawech. 18Ri ixjayilonela' kichin ri e tata'al richin ri ruwach'ulew Medo-Persia kan xtikinatala' k'a re banobel re' chike ri kachijilal. Y jari' k'a toq xtipe oyowalen chikikojol rije'. 19Roma ri', wi rat rey niqa' chawech, tatz'ibaj k'a jun wuj ri akuchi nubij-wi chi ri Vasti man reina ta chik. Y tikanox chik k'a jun ruk'exel ri más nimey-tzij chuwech rija'. Y re wuj re' kan xtik'oje' jantape' chukojol ri pixa' qichin roj ri oj richin ri ruwach'ulew Medo-Persia. 20Y ri pixa' ri xtaya' rat, kan xtitalux k'a chupan chijun ri qaruwach'ulew. Y toq ri ixoqi' xtikak'axaj re' kan xtikinimaj k'a kitzij ri kachijilal, stape' k'o kiq'ij o maneq kiq'ij; xcha' ri Memucán.
21Y ri rey Asuero y ri tata'al ri ek'o chiri' kan utz k'a xkak'axaj ri xubij ri Memucán. Y kan keri' k'a xbanatej. 22Ri rey xubij k'a el chupan ri wuj ri xutz'ibaj chi konojel achi'a' kan kow kepa'e' pa kiwi' ri e aj pa kachoch. Re wuj re' xtz'ibex k'a pa kich'abel ronojel tinamit richin ri ruwach'ulew Medo-Persia, richin keri' konojel niq'ax chikiwech; y re wuj re' xetaqalox k'a pa ronojel taq tinamit.
Currently Selected:
Ester 1: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.