Deut 1
1
Ri Moisés nunataj ri xusuj ri Jehová chike pa ruwi' ri juyu' Horeb
1Wawe' tz'ibatel-wi ri xubij ri Moisés chike ri israelita, toq ek'o chiri' pa tz'iran ruwach'ulew Arabá ri k'o pa relebel-q'ij chire ri raqen-ya' Jordán. Ek'o k'a chiri' chuwech-pe ri taq'aj Suf, pa xaman chire ri tz'iran ruwach'ulew Parán, y ri tinamit Tófel, Labán, Haserot y ri Dizahab. 2Y richin yatel-pe pan Horeb y yatapon pa tinamit Cadés-barnea y nak'uaj ri bey richin ri ruwach'ulew Seír ri k'o chuwi' taq juyu', k'o chi yabiyin julajuj q'ij. 3Y chupan k'a ri kawineq juna' richin ke'el-pe ri israelita pan Egipto, chupan ri nabey q'ij chire ri ik' julajuj, jari' toq ri Moisés xch'on kik'in ri ruwinaq y xukamuluj ronojel achi'el ri rubin ri Jehová richin nikiben. 4Y re' xubij ri Moisés toq xeruch'ek yan kan ri Sihón ki-rey ri winaqi' amorreo ri chiri' pa tinamit Hesbón, y ri Og rey richin ri ruwach'ulew Basán ri chiri' pa tinamit Edrei y Astarot. 5Y toq k'a ek'o na pa relebel-q'ij chire ri raqen-ya' Jordán, ri chiri' pa ruwach'ulew Moab, jari' toq ri Moisés xuben chike chi niq'ax jebel chikiwech re pixa' re', y kere' k'a xubij: 6Ri Jehová ri qa-Dios, xch'on qik'in pan Horeb y xubij: Janila ix yalojineq-qa, chuxe-pe re juyu' re'. 7Kixk'olon k'a el y tichapa' chik k'a el bey y kixbiyin pa li'an ruwi' taq juyu' pa kiruwach'ulew ri winaqi' amorreo y ri winaqi' ri ek'o chikinaqaj. Chuqa' pa ruwach'ulew Arabá y ri ruwa taq juyu' y chupan ri taq'aj ri k'o kojol juyu', pa Négueb, y ri ruwach'ulew ri ek'o chuchi' ri palou y k'a rik'in ri kiruwach'ulew ri cananeo, ri Líbano y k'a rik'in ri raqen-ya' Éufrates. 8Tiwetamaj k'a chi kan ja yin yiya'on chiwe ri ruwach'ulew, kixok chupan y tichapa' k'a y kan tibana' iwichin chire ri ruwach'ulew ri nuya'on nutzij chire. Yin in Jehová, chi kan chike ri iwati't-imama', Abraham, Isaac y ri Jacob y chiwe rix ri ix kijatzul kan rije' ninya-wi, xcha' ri Jehová, xcha' ri Moisés.
Toq xecha'ox kan ri to'onela'
(Ex 18:13-27)
9Y ri Moisés chuqa' xubij chike ri winaqi': Chupan ri q'ij ri', toq k'a ojk'o na pan Horeb, yin xinbij chiwe chi nuyon yin man yitikir ta yixink'uaj. 10Roma ri Jehová ri qa-Dios xuben chiqe chi janila xojk'iyer yan y kan oj achi'el chik ri kajlabal ri ch'umila' ri ek'o chila' chikaj. 11Ri Jehová ri qa-Dios, ri kichin kan ri qati't-qamama', xtuben ta chiqe chi yojk'iyer pa 1,000 más chuwech ri ojk'o wakami, y kan ta xqojrurtisaj achi'el ri rusujun kan. 12Roma nuyon yin man yitikir ta ninchojmirisaj ronojel ri ruk'ayewal ri iwichin rix, ri ibanobal y ronojel ri ich'ojikil. 13Wakami, ke'icha-pe chupan ri tzobaj ri ixk'o-wi, achi'a' ri e aj-na'oj, ri e nowineq, ri kan k'o kiq'ij, richin chi xkenya' pan iwi', xicha' chiwe.
14Y rix xibij chuwe: Kan utz niqak'axaj ri nawajo' naben, xixcha'.
15Y keri' k'a toq yin xencha' ri achi'a' ri', y ja rije' ri xenya' pan iwi': Pa kiwi' 1,000 winaqi', pa kiwi' wok'al, pa kiwi' kawineq lajuj y pa kiwi' lajujteq winaqi' y ja rije' ri yeyuqen iwichin. 16Y kere' k'a xinbij chike ri to'onela': Ri q'atoj-tzij ri xtiben, kan ta choj, kan pa ruchojmilal k'a xtiben kik'in ri qawinaq y ri man qawinaq ta. 17Man tiben rukojolil kik'in ri winaqi' chupan jun q'atoj-tzij, xa junan tibana' kik'in, chi k'o kiq'ij chi maneq kiq'ij. Man jun achoq chuwech tixibij-iwi', roma re q'atoj-tzij re' kan richin ri Dios. Wi k'o jun k'ayew nuben chiwech, tik'ama-pe wik'in yin, richin chi ja yin ri yichojmirisan, xicha' chike.
18Y chupan ri q'ij ri' yin xinbij chiwe ronojel ri achike ruk'amon richin niben.
Ri kablajuj nachanela'
(Núm 13:1-14:4)
19Roj kan xojel k'a pe pan Horeb y xojpe pa ruchojmilal ri k'echelaj ri k'o pa kiruwach'ulew ri winaqi' amorreo, achi'el ri xubij ri Jehová ri qa-Dios chiqe. Xqaq'axaj k'a ri itzel y ri nimalej tz'iran ruwach'ulew, y keri' xojoqaqa pa Cadés-barnea. 20Y jari' toq xinbij chiwe: Xojoqaqa k'a chupan re ruwi' taq juyu' kichin ri winaqi' amorreo, ri nuya' ri Jehová ri qa-Dios chiqe. 21Tiwetamaj k'a chi ri Jehová ri qa-Dios nujech ri ruwach'ulew chiqe, kixbiyin k'a q'anej y tichapa' y kan tibana' iwichin chire, kan achi'el ri rubin ri Jehová chike ri qati't-qamama'. Man k'a tixibij-iwi' y man kixmayamo-qa, xicha' chiwe. 22Jari' toq xixpe wik'in y xibij chuwe chi más ta utz xa ta yeqateq-el ka'i-oxi' achi'a' richin nibeketamaj kan jebel ri ruwach'ulew y toq xketzolin-pe xtokibij chiqe ri achike bey ri k'o chi xqojjote-wi-el y achike tinamit xqojapon-wi.
23Y ri xibij, kan xqa' chinuwech y roma ri' xencha' k'a e kablajuj achi'a', jujun chupan ri jujun tzobaj. 24Y ri achi'a' xebe k'a chuwi' taq juyu' y xe'apon k'a pa taq'aj Escol y xketamaj k'a jebel ri achike rubanik ri ruwach'ulew. 25Y xekik'amala-pe ri yewachin chiri' y xokik'utu' chiqawech y xokitzijoj chiqe. Y xkibij k'a chi ri ruwach'ulew ri nuya' ri Jehová Dios chiqe, kan janila jebel. 26Y man rik'in ri', rix man xiwajo' ta xixbe-el, xa xipaba-iwi' y man xitaqej ta ri ruchojmilal ri ruya'on kan chiqe ri Jehová ri qa-Dios. 27Y k'ari' xichop yixxebexot pa taq iwachoch ri e banon rik'in tzieq y xibij: Ri Jehová xa kan man yojrajo' ta, roma ri' xojrelesaj-pe pan Egipto, xaxe richin yojrujech pa kiq'a' ri winaqi' amorreo richin yojkikamisaj. 28Wakami k'a ¿Akuchi k'a xqojbe-wi? Ri qawinaq ri xeqateq xojokixibij y xkibij chiqe chi ri winaqi' ri ek'o chiri' kan más kuchuq'a' y más nima'q kipalen chiqawech roj y ri kitinamit kan janila e nima'q, y e sutin-kij rik'in tz'aq ri kan janila nej e jotol chikaj. Y chuqa' xkibij chiqe chi xekitz'et kan ri e rijatzul ri Anac. Y roma ri' xqamalij qak'u'x, xixcha'.
29Jak'a yin xinbij chiwe: Man tixibij-iwi' y man kixbaybot chikiwech. 30Roma ri Jehová ri qa-Dios, kan beneq chiqawech, y kan ja rija' ri xtibanon ri oyowal pa qak'exel, achi'el ri xuben qik'in toq xojel-pe pan Egipto. 31Y ri pa tz'iran ruwach'ulew, rix xitz'et chi ri Jehová ri qa-Dios xojruk'en-pe, achi'el jun tata'aj toq nuk'uaj ri ti ruk'ajol. Kan keri' k'a rubanon-pe qik'in chupan ri qabey ri qabanon-pe, k'a re akuchi xojoqaqa-wi, xicha' chiwe. 32Y man rik'in ri' man xikuquba' ta ik'u'x rik'in ri Jehová ri qa-Dios. 33Rija' kan beneq k'a chiqawech, ri chaq'a' kan yojrusaqirisaj k'a rik'in jun achi'el q'aq', y ri paq'ij kan nuk'ut k'a chiqawech rik'in ri sutz' pa'el chikaj, ri akuchi k'o chi yojbe-wi y ri akuchi yojk'oje-wi-qa.
Ri Jehová xoyower kik'in ri israelita
(Núm 14:20-35)
34Toq ri Jehová xrak'axaj ri xibij rix, jari' toq xyakatej royowal, y xuya' rutzij y xubij: 35Man jun achin chire re itzel sol winaqi' re' ri xtitz'eton ta ri utzilej ruwach'ulew ri nusujun kan chike ri iwati't-imama'. 36Xa kan xaxe k'a ri Caleb ri ruk'ajol ri Jefuné ri xtitz'eton ri ruwach'ulew ri akuchi xq'ax-wi. Y re' xtinya' k'a chire rija' y chike ri e rijatzul, roma kan rutijon-pe ruq'ij richin in rutzeliben-pe, chayineq kan ri Jehová.
37Chuqa' ri Jehová xyakatej royowal wik'in yin iwoma rix y xubij chuwe chi chuqa' yin man xkinok ta apo chupan ri ruwach'ulew ri'. 38Chuqa' xubij: Jak'a ri ato'onel Josué, ri xtok-apo chupan ri ruwach'ulew ri' pan ak'exel rat. Tabij chire chi tutija' ruq'ij, roma ja rija' ri xtich'aron ri ruwach'ulew chikiwech ri ch'aqa' chik israelita. 39Stape' rix xich'ob chi ri e etzelanel iwichin xkekik'uaj-el ri taq iwalk'ual, re ak'uala' k'a re', ri k'a man jani k'o kina'oj, xa chike k'a rije' xtinya-wi ri ruwach'ulew, xke'ok-apo y kan xtikichinaj kan. 40Rokik nibanatej re' kixtzolin y kixbiyin chupan ri tz'iran ruwach'ulew chupan ri bey ri nibe rik'in ri Kaqa-Palou, chayineq kan ri Dios.
Toq ri israelita xech'akatej
(Núm 14:39-45)
41Rix kere' k'a xibij chuwe: Kan qitzij na wi chi oj makuwineq chuwech ri Jehová; wakami k'a xqojbe y xtibeqabana' oyowal achi'el ri rubin ri Jehová ri qa-Dios chiqe, xixcha' chuwe. Xik'uaj k'a el ri ikamisabal chi'ijujunal, y kan xich'ob chi man k'ayew ta richin yixjote-el chupan ri ruwach'ulew ri' richin niwichinaj. 42Jak'a ri Jehová xa xubij chuwe yin chi tinbij chiwe chi man kixjote-el richin nibebana' oyowal, roma rija' man k'o ta chik iwik'in, y rix xa xkixch'akatej k'a pe koma ri e etzelanel iwichin.
43Y yin kan xinbij chiwe, jak'a rix man xiwak'axaj ta, rix xa xipaba-iwi' chire ri ruchojmilal ri rubin ri Jehová, rik'in ri inimirisanen, kan xixjote-el chuwi' taq juyu'. 44Jak'a ri winaqi' amorreo ri ek'o chiri' xa xixkik'ul chi oyowal y k'ari' xixkoqotaj-pe, kan e achi'el k'a q'atz'utuj ri xebejopojo-pe chiwij y kan xixkich'ek k'a chiri' pa ruwach'ulew Seír y xixkitzeqelibej k'a pa tinamit Hormá. 45Toq rix xixtzolin-pe, k'ari' xixoq' chuwech ri Jehová, jak'a rija' man xixrak'axaj ta y man xniman ta chiwe.
Ri juna' ri xkiq'axaj chupan ri tz'iran ruwach'ulew
46Keri', k'o chi xojk'oje' kan k'iy juna' ri chiri' pa Cadés.
Currently Selected:
Deut 1: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.