Deut 14
14
1Roj kan oj ralk'ual ri Jehová ri qa-Dios, roma ri' man tisokola-qa-iwi' ni man tisokaj-el ri rusumal-iwi' ri k'o nik'aj-iwech, toq k'o jun niken. 2Roma roj kan oj jun tinamit ri kan oj ch'aron chire ri Jehová ri qa-Dios, rija' xojcha'on chikikojol ri ch'aqa' chik ruwach'ulew richin xojok jun tinamit ri kan richin rija'.
Ri chikopi' ri e ch'ajch'oj y ri man e ch'ajch'oj ta
(Lev 11:1-47)
3Kan man jun k'a chire ri man e ch'ajch'oj ta, titej. 4Ja chikopi' re' ri utz richin ye'itej rix: Ri bóyix, ri karne'l ri taq tzuntzun, 5ri jalajoj kiwech masat y ri juyubel karne'l. 6Ronojel chikopi' ri yekamulun y chuqa' ri ruch'aron-ri' ri kipi'ch, utz ye'itej rix. 7Jak'a re ch'aqa' chik chikopi' re' man ke'itej: Ri camello, ri liebre y ri umul. Re' man yetij ta roma yekamulun, jak'a man ruch'aron ta ri' ri kipi'ch y roma ri' kan man e ch'ajch'oj ta. 8Ri aq ruch'aron-ri' ri rupi'ch, jak'a man nikamulun ta. Chuqa' re' man titej y man tichop ri ruch'akul toq kamineq chik, roma xa man ch'ajch'oj ta.
9Ri chikopi' ri ek'o pa ya' utz nitej, xaxe ri k'o kixik' y k'o kisolotal. 10Jak'a ri maneq kixik' y maneq kisolotal, man ke'itej y kan tibana' chike chi man e ch'ajch'oj ta.
11Xabachike kiwech aj-xik' taq chikopi' ri e ch'ajch'oj, utz nitej. 12-18Jak'a ri jalajoj kiwech aj-xik' taq chikopi'*f3* ri nikitej ti'ij, rix man ke'itej, xa k'o chi ye'iwixowaj, achi'el ri aj-xik' taq chikopi' ri nikitej ri q'ayis y ri aj-xik' taq chikopi' ri nikitej ti'ij kichin ch'aqa' chik chikopi'.
19Ri jalajoj kiwech taq chikopi' ri ek'o taq kixik' y ri ek'o k'iy taq kaqen, man e ch'ajch'oj ta, y roma ri' man utz ta richin ye'itej. 20Jak'a ronojel ri jalajoj kiwech aj-xik' taq chikopi', ri kan e ch'ajch'oj, kan ke'itija'.
21Ri chikopi' ri kiyon yeken, man ke'itej, roma rix ix jun tinamit ri ix rucha'on ri Jehová ri qa-Dios. Xa kan utz k'a niya' chike ri man e iwinaq ta, richin nikitej rije' o nikik'ayij-el chike ri winaqi' ri choj yeq'ax-el iwik'in.
Man tichaq'arisaj ri ti alaj tzuntzun chupan ri tz'umaj richin ri te'ej.
Pixabanik pa ruwi' ri jun chire ri lajuj
22Y ronojel k'a juna' rix k'atzinel chi nich'er kan ri jun chire ri lajuj chire ri jalajoj ruwech itiko'n. 23Ri jun lajuj chire ri jalajoj ruwech ixin, ri vino, ri aceite, ri nabey taq kal ri iwákix y ri ikarne'l; kan xkixwa-xkixuk'ya' k'a chuwech ri Jehová ri qa-Dios chunaqaj ri rachoch ri chiri' ri akuchi rucha'on-wi rija', richin chi chiri' ninatex-wi ri rubi', richin chi niwetamaj ninimirisaj ruq'ij ri Jehová ri qa-Dios ronojel q'ij chire ri ik'aslen. 24Wi ri akuchi rucha'on-wi ri Jehová ri qa-Dios, kan janila nej k'o chiwe rix richin nik'uaj ri jun chire ri lajuj ri rusipan chik ri Dios chiwe, 25jari' rix nik'ayij ri jun chire ri lajuj ri' y ri pueq jari' ri nik'uaj. K'ari' xkixbe ri akuchi rucha'on-wi rija'. 26Rik'in ri pueq ri' nibeloq'o' ri achike xturayij ri iwánima, wi wákix, karne'l, juba' vino, o juba' ruya'al manzana ch'amirisan o xabachike chike ri nirayij; kan xkixwa-xkixuk'ya' chuwech ri Jehová ri qa-Dios, y kan xkixkikot k'a rix y ri e aj pan iwachoch.
27Man ke'imalij kan ri levita ri ek'o pan itinamit, roma rije' man xke'ichinan ta, achi'el ri xtiwichinaj kan rix. 28Ri pa taq ruk'isibel chire ri ox-ox juna' k'o chi nich'er kan ri jun chire ri lajuj chire ri itiko'n richin ri jun juna', y niyek kan pan itinamit, 29richin niya' chike ri levita ri man jun nikichinaj kan chi'ikojol, chuqa' ri man e iwinaq ta ri ek'o chi'ikojol, ri meba'i' y ri e malkani' ri ek'o pan itinamit richin xkewa-xke'uk'ya' jebel. Richin keri' ri Jehová ri qa-Dios xtuya' urtisanik pan iwi' rik'in ronojel ri xtiben.
Currently Selected:
Deut 14: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
