1 Sam 1
1
Toq xalex ri Samuel
1Chupan ri ruwach'ulew Israel, k'o k'a jun achin rubini'an Elcaná, aj-Ramá, chiri' chuwa taq juyu' richin ri Efraín. Ri Elcaná ruk'ajol ri Jeroham, rumam ri Elihú y ruxikin-rumam ri Tohu. Y ri Tohu ruk'ajol kan ri Suf aj-Efraín. 2Ri Elcaná ek'o k'a ka'i' rixjayil, ri jun rubini'an Ana, y ri jun chik rubini'an Peniná. Ri Peniná ek'o ral, jak'a ri Ana man jun ral k'o. 3Y ronojel k'a juna' ri Elcaná nibe-q'anej pa tinamit Siló richin niberusuju' sipanik richin niberuya' ruq'ij ri Jehová k'iytisanel richin ronojel. Y chiri' k'o-wi ri sacerdote richin ri Jehová rubini'an Elí, chuqa' chiri' ek'o-wi ri e ruk'ajol kibini'an Hofní y Finees. Rije' chuqa' e sacerdote.
4Y toq napon yan k'a ri q'ij chi ri Elcaná nusuj ri sipanik ri', jari' toq nuya' jutaqba' ti'ij richin ri sipanik chire ri Peniná y chike chuqa' ri e ralk'ual. 5Jak'a chire ri Ana más k'iy nuya' roma kan janila nrajo', stape' ri Jehová rubanon chire chi man nik'oje' ta ral. 6Y ri Peniná kan niyojoben chirij ri Ana, y kan nuben chire richin janila niq'axomer, roma maneq ral.
7Keri' nuben ri Peniná chire ri Ana ronojel juna' toq yebe-q'anej pa rachoch ri Jehová, kan nuben chire chi niq'axomer. Roma ri' ri Ana janila noq', y man niwa' ta. 8Jari' toq ri Elcaná nubij chire: Ana, ¿achike roma yatoq'? ¿Achike roma man yawa' ta? ¿Achike roma poqonatajineq ri awánima? ¿K'o ta k'a más rejqalen ek'o ta lajuj awal y man ta ink'o yin?, xcha' chire.
9Y k'o k'a jun q'ij toq xebe pa Siló, y toq xewa'-xe'uk'ya' yan, xyakatej-el ri Ana y xq'ax-apo richin xbech'on rik'in ri Jehová. Y ri sacerdote Elí tz'uyul pa jun ch'aket chunaqaj jun xata't richin ri chuchi' ri rachoch ri Jehová. 10Ri Ana janila q'axomarineq ri ránima, y roma ri' xch'on rik'in ri Jehová y kan janila xoq'. 11Y xuben k'a jun jikibel-tzij rik'in ri Dios y kere' xubij: Wi rat Jehová kan at qitzij k'iytisanel richin ronojel, xtaya-pe jun ti wal ala', y yin kan xtinya' k'a chawe y kan xtok awichin chijun ruk'aslen y man xtisokex ta rusumal-ruwi', xcha'.
12Rokik ri Ana nich'on rik'in ri Jehová y kan xyaloj yan juba', ri Elí rutzuliben k'a ri ruchi'. 13Ri Ana xa pa ránima nich'on-wi, xaxe ri ruchi' nisilon. Ri ruch'abel man nak'axatej ta, y ri Elí xuch'ob chi ri Ana q'abarel. 14K'ari' ri Elí xubij chire: ¿K'a janipe' k'a xtaya' kan ri aq'abarik? Man chik taqum vino. Katel-el y k'a tik'o na pe ri q'abarik chawech k'ari' yape chik, xcha' chire.
15Y ri Ana xubij chire: Ni, yin man in q'abarel ta, ni man nuqumun ta pe vino. Yin xa janila niq'axon ri wánima y jari' ri ninbij chire ri Jehová. 16Roma ri' man tach'ob chi yin in jun chike ri ixoqi' ri maneq Dios chikiwech; yin yich'on-q'anej rik'in ri Dios, pa ruwi' ri bis ri k'o pa wánima y ri poqonal ri niban chuwe, xcha' ri Ana.
17Y ri Elí xubij chire: Kabiyin rik'in uxlanibel-k'u'x y ja ri qa-Dios xtiya'on chawe ri xak'utuj chire, xcha'.
18K'ari' ri Ana xumatioxij kan chire, y xtzolin ri akuchi k'o-wi, xbewa' y kan janila xkikot. 19Toq xkiya' yan ruq'ij ri Jehová, ri ruka'n q'ij nimaq'a' yan xeyakatej y xetzolin k'a pa kachoch kela' pa Ramá. Chirij re' ri Elcaná xk'oje' k'a rik'in ri Ana. Y jari' toq ri Jehová xoqaqa k'a chuk'u'x ri k'utunik ri rubanon ri Ana. 20Y ri Ana kan xyawej k'a kan chirij jun ak'ual, y toq xapon ruq'ijul, ri Ana xalex jun ti ral y ri ak'ual ri' xubini'aj Samuel,*f1* keri' rubi' ri xuya' roma kan chire ri Jehová xuk'utuj-wi.
21Y toq xapon chik k'a ri q'ij richin yenimaq'ijun, ri Elcaná, ri Peniná y konojel ralk'ual xebe richin nibekisuju' sipanik chuwech ri Jehová, kan achi'el nikiben ronojel juna'. 22Jak'a ri Ana man xbe ta q'anej kik'in, xa xubij k'a chire ri rachijil: Yin man yibe ta chiwij roma xa k'a xtinwelesaj na rutz'um ri ak'ual, k'ari' xkibe, richin xtink'uaj-el y ninjech pa ruq'a' ri Jehová, y xtik'oje' kan chiri' jumul, xcha' rija'.
23Y ri rachijil xubij: Tabana' achike ri más utz nuben chawech rat. Kak'oje' k'a kan. Kan k'a ja toq xtawelesaj na ri rutz'um ri ak'ual, k'ari' k'a xkabe. Y jak'a ri Jehová xtito'on awichin chubanik achi'el ri asujun chire, xcha' ri rachijil.
Y ri Ana xk'oje' k'a kan. Rija' kan xuk'iytisaj ri ak'ual, k'a toq xapon na ri q'ij richin xrelesaj rutz'um. 24Y toq xrelesaj yan k'a rutz'um ri ak'ual, ri Ana xuk'uaj-el pa rachoch ri Jehová chiri' pa Siló, stape' ri Samuel kan k'a janila ti ko'ol ok. Chuqa' xuk'uaj-el jun achij wákix ri k'o oxi' rujuna'*f2* y xuk'uaj chuqa' más juba' ka'i' arroba k'ej ri man chayun ta, y jun tz'um nojineq chi vino. 25Y toq xebe chujachik ri ak'ual y ek'o chik chiri', xkikamisaj k'a ri wákix richin sipanik, y xkijech kan ri ak'ual pa ruq'a' ri sacerdote Elí. 26Ri Ana xubij chire ri Elí: Táta, noqaqa chi'ak'u'x in achike yin, roma ja yin ri' ri ixoq ri xik'oje' chi'anaqaj ri k'o yan chik juna' ri', toq xipe re wawe' richin xich'on rik'in ri Jehová. 27Ja ak'ual re' ri xink'utuj chire ri Jehová, y rija' kan xuya-wi chuwe. 28Roma ri', wakami yin ninjech kan pa ruq'a' ri Jehová y ninjech chire chijun ri ruk'aslen, richin xtok richin ri Jehová, xcha' ri Ana. K'ari' xkiya' ruq'ij ri Jehová.
Currently Selected:
1 Sam 1: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.