ᐱᓕᐱᔭᓇ 1
1
1ᐹᓪ ᓀᔥᑕ ᑎᒧᑎ, ᐅᑦ ᐊᑑᔅᑫᓛᑲᓂᒪ ᒋᓴᔅ ᙭, ᐁ ᒪᓯᓇᐊᒪᐙᒋᒃ ᒥᓯᐌ ᐅᐸᓓᑭᓴ ᙭ ᒋᓴᓯᒃ, ᑳ ᐃᑖᓕᒋ ᐱᓕᐹᐃᐃᒃ, ᐊᓯᒋ ᑭᒋᐋᔭᒥᐁᐎᑭᒪᐗ ᓀᔥᑕ ᑎᑲᓇ:
2ᔕᐌᓕᒋᑫᐎᓐ ᑭ ᑳ ᐎ ᐋᔭᓇᐗᐤ, ᓀᔥᑕ ᑳᔮᒣᓕᑕᒧᐎᓐ ᑭᒋᒪᓂᑐ ᑯᑖᐎᓇᐤ ᐅᒋ, ᓀᔥᑕ ᐅᑎᐯᓕᒋᑫᐤ ᒋᓴᔅ ᙭᙮
ᐹᓪ ᐊᔭᒥᐁᔅᑕᒪᐌᐤ ᐱᓕᐱᔭᓇ
3ᓂ ᓇᓈᔅᑯᒪᐤ ᓂ ᑭᒋᒪᓂᑐᒻ ᒧᔕᒃ ᐁ ᑭᔅᑭᓯᑐᑖᑖᑾᒃ, 4ᒧᔕᒃ ᑕᑡᐤ ᐁ ᐋᔭᒥᐁᔅᑕᒫᑕᑾᒃ ᒥᓯᐌ ᐁ ᐃᑕᔑᔦᒃ, ᐁ ᓇᑐᑕᒫᑫᔮᓐ ᒥᓚᐙᑕᒧᐎᓂᒃ, 5ᑭᑦ ᐅᑐᑌᒥᐌᐎᓂᐗᐤ ᐅᒋ ᒥᓗᐋᒋᒧᐎᓂᒃ ᐊᔅᐱᓐ ᓃᔥᑕᒻ ᐁ ᑭᔑᑳᒃ ᐱᓕᔥ ᐊᓄᒡ: 6ᐁ ᑫᒋᓇᐅᔮᓐ ᐅᒪ ᑫᒀᓐ, ᐊᓇ ᑳ ᑮ ᑭᒋᑖᑦ ᒥᓗ ᐊᑑᔅᑫᐎᓂᓕᐤ ᐁ ᐱᒋᔅᑳᑯᔦᒃ, ᑲᑕ ᑎᐱᑐᑕᒻ ᐱᓕᔥ ᐅᑎᒋᐸᓕᓕᑫ ᒋᓴᔅ ᙭ ᐅ ᑭᔑᑳᒻ: 7ᐁ ᒀᔭᔅᑾᒃ ᐅᒪ ᑭᒋ ᐃᔑ ᐃᑌᓕᒥᑕᑾᒃ ᒥᓯᐌ ᐁ ᐃᑕᔑᔦᒃ, ᐁ ᐋᔭᐎᑕᑾᒃ ᓂᑌᐃᒃ, ᐌᓴ ᐁ ᒫᒫᒋᒀᐱᔅᑲᐅᑲᐎᔮᓐ, ᐁ ᓇᔅᑯᔅᑕᒫᓐ ᓀᔥᑕ ᐁ ᐊᓕᒋᑖᔮᓐ ᒥᓗᐋᒋᒧᐎᓐ, ᐊᓯᒋ ᓂᓚ ᑭ ᑮ ᒫᑎᓇᒫᑲᐎᓇᐗᐤ ᔕᐌᓕᒋᑫᐎᓐ᙮ 8ᐌᓴ ᑭᒋᒪᓂᑐ ᑭᔅᑫᓕᑕᒻ ᐁᔅᐱᒋ ᑭᐗᔐᓕᒥᑕᑾᒃ ᒥᓯᐌ ᐁ ᐃᑕᔑᔦᒃ ᐅᑦ ᐊᑖᒥᔭᐎᒃ ᒋᓴᔅ ᙭᙮
9ᐅᒪ ᓀᔥᑕ ᓂ ᓇᑐᑕᒫᑳᓐ, ᑭ ᓵᑭᐃᐌᐎᓂᐗᐤ ᐊᐙᓯᑌ ᓀᔥᑕ ᐊᐙᓯᑌ ᑭᒋ ᐌᓗᑕᒃ, ᑭᔅᑫᓕᑕᒧᐎᓂᒃ, ᓀᔥᑕ ᒥᓯᐌ ᑎᐹᔅᑯᓀᓕᑕᒧᐎᓂᒃ; 10ᑭᒋ ᑯᒋᑭᔅᑫᓕᑕᒣᒃ ᑫᒀᓇ ᑳ ᒥᓨᔑᑭ; ᑭᒋ ᐸᓓᑭᓯᔦᒃ ᓀᔥᑕ ᐁᑳ ᑭᒋ ᓈᔦᑕᐌᓕᒥᑲᐎᔦᒃ ᐱᓕᔥ ᐅᑎᒋᐸᓕᓕᑫ ᐅ ᑭᔑᑳᒻ ᙭; 11ᐁ ᓵᑲᔅᑭᓀᔅᑳᑯᔦᒃ ᐁ ᐃᔑ ᒥᓂᔑᐗᒃ ᒀᔭᔅᑖᑎᓯᐎᓐ, ᐊᓂᐃ ᒋᓴᔅ ᙭ ᑳ ᐅᒋ ᐅᑎᒋᐸᓕᑭ, ᑭᒋ ᐅᒋ ᑭᔅᑖᒋᒫᑲᓂᐎᑦ ᓀᔥᑕ ᒫᒥᒋᒫᑲᓂᐎᑦ ᑭᒋᒪᓂᑐ᙮
ᑭᒋ ᐱᒫᑎᓯᔮᓐ ᐁᐗᑯ ᙭
12ᒫᑲ ᓂ ᓇᑕᐌᓕᑌᓐ ᑭᒋ ᓂᓯᑐᑕᒣᒃ, ᓂᒋᔖᓂᑐᒃ, ᐊᓂᐃ ᑳ ᑮ ᐅᑎᑎᑯᔮᓐ, ᐊᐙᓯᑌ ᑮ ᐃᔅᐸᓕᐗ ᑭᒋ ᐅᒋ ᒥᓨᐸᒣᐎᓯᒪᑲᒃ ᒥᓗᐋᒋᒧᐎᓐ; 13ᐁᑯᔑ ᒫᑲ ᐁ ᐃᔑ ᒫᒪᒋᒀᐱᓱᔮᓐ ᙭ᑎᒃ ᐸᔭᑌ ᑭᔅᑫᓕᒋᑳᑌᐤ ᒥᓯᐌ ᑭᒋᐅᑭᒫᐎᑲᒥᑯᕽ, ᓀᔥᑕ ᒥᓯᐌ ᐃᑌ; 14ᓀᔥᑕ ᒥᒉᑦ ᐎᒋᔖᓂᒪᐗᒃ ᐅᑎᐯᓕᒋᑫᒃ, ᐁ ᐊᑎ ᑫᒋᓇᑌᐁᒋᒃ ᐁ ᒫᒫᒋᒀᐱᓱᔮᓐ, ᓈᔅᐱᒡ ᐊᐙᓯᑌ ᓱᑭᑌᐁᐗᒃ ᑭᒋ ᐎᑐᑭᒃ ᐋᔭᒥᐎᓂᓕᐤ ᐁᑳ ᐁ ᑯᔅᑖᒋᒋᒃ᙮
15ᐋᑎᑦ ᑖᐺ ᐙᐎᑕᒶᒃ ᙭ᑕ ᐅᑌᓕᑕᒧᐎᓂᒃ ᓀᔥᑕ ᒪᒉᓕᑕᒧᐎᓂᒃ; ᐋᑎᑦ ᓀᔥᑕ ᒥᓜᓕᑕᒧᐎᓂᒃ: 16ᐊᓂᑭ ᐙᐎᑕᒶᒃ ᙭ᑕ ᐊᒀᑎᓯᐎᓂᒃ, ᓇᒪᐎᓚ ᒀᔭᔅᑭᑌᓕᑕᒧᐎᓂᒃ, ᐁ ᐃᑌᓕᑕᑭᒃ ᑭᒋ ᑕᑯᑕᒋᒃ ᐊᓕᒥᓯᐎᓂᓕᐤ ᓂ ᒫᒫᒋᒀᐱᓱᐎᓂᒃ: 17ᐅᑯ ᒫᑲ ᓵᑭᐃᐌᐎᓂᒃ, ᐁ ᑭᔅᑫᓕᑕᑭᒃ ᐁ ᑮ ᐃᑕᓕᑲᐎᐗᒃ ᑭᒋ ᓈᑕᒧᑕᒫᓐ ᒥᓗᐋᒋᒧᐎᓐ᙮
18ᑫᒀᓐ ᒫᑲ? ᐁᓕᐌᒃ ᒥᓯᐌ ᐃᔑ, ᑮᔥᐱᓐ ᐋᑕ ᐸᑾᓐᑕᐤ ᐃᑌᓕᑕᒧᐎᓂᒃ, ᓀᔥᑕᐱᑯ ᑖᐺᐎᓂᒃ, ᙭ ᐋᓕᒧᒫᑲᓂᐎᐤ; ᐁᑯᑕ ᒫᑲ ᓂᑦ ᐃᔑ ᒥᓚᐙᑌᓐ, ᓀᔥᑕ ᓂ ᑳ ᒥᓚᐙᑌᓐ᙮ 19ᐌᓴ ᓂ ᑭᔅᑫᓕᑌᓐ ᐅᒪ ᓂ ᐱᒫᒋᐃᑯᓯᐎᓂᒃ ᑭᒋ ᐃᔑ ᑴᔅᑭᐸᓕᒃ, ᑭᑦ ᐋᔭᒥᐋᐎᓂᐗᐤ ᐅᒋ, ᓀᔥᑕ ᐁ ᒥᓕᐙᓂᐗᓂᓕᒃ ᐅᑦ ᐊᒑᑾ ᒋᓴᔅ ᙭᙮ 20ᑖᐱᔅᑯᒡ ᓈᔅᐱᒡ ᑳ ᐃᔑ ᐃᑌᓕᑕᒫᓐ, ᓀᔥᑕ ᑳ ᐊᔅᐯᓕᒧᔮᓐ, ᐁᑳ ᑫᒀᓐ ᑭᒋ ᐅᒋ ᓇᓀᐯᐎᓯᔮᓐ, ᒫᑲ ᒥᓯᐌ ᓱᑭᑌᐁᐎᓂᒃ, ᑖᐱᔅᑯᒡ ᒧᔕᒃ, ᐁᑯ ᓀᔥᑕ ᙭ ᑫ ᒫᒪᑖᑯᒫᑲᓂᐎᑦ ᓂᔭᐎᒃ, ᑮᔥᐱᓐ ᐯᒫᑎᓯᐙᓀ ᓀᔥᑕᐱᑯ ᓀᐱᐙᓀ᙮ 21ᐌᓴ ᓂᓚ ᑭᒋ ᐱᒫᑎᓯᔮᓐ ᐁᐗᑯ ᙭, ᓀᔥᑕ ᑭᒋ ᓂᐱᔮᓐ ᐁᐗᑯ ᐅᑎᓯᐎᓐ᙮ 22ᒫᑲ ᑮᔥᐱᓐ ᐎᔮᓯᐎᓂᒃ ᐱᒫᑎᓯᔮᓐ, ᐁᐗᑯ ᐅᒪ ᑳ ᒥᓂᔑᐗᒃ ᓂᑦ ᐊᑑᔅᑫᐎᓐ; ᐁᓕᐌᒃ ᒫᑲ ᑫᒀᓐ ᑫ ᓇᐗᔓᓇᒫᓐ ᓇᒪᐎᓚ ᓂ ᑭᔅᑫᓕᑌᓐ᙮ 23ᐌᓴ ᓂ ᐙᐙᓀᓕᔅᑳᑯᓐ ᑳ ᓂᔑᑭ, ᐁ ᓇᑕᐌᓕᑕᒫᓐ ᑭᒋ ᑭᑐᑌᔮᓐ, ᓀᔥᑕ ᑭᒋ ᐎᒋᑕᔑᑫᒪᒃ ᙭, ᐁᐗᑯ ᓈᔅᐱᒡ ᐊᐙᓯᑌ ᐁ ᒥᓨᔑᒃ: 24ᐁᓕᐌᒃ ᒫᑲ, ᑭᒋ ᑕᔑᑫᔮᓐ ᐎᔮᓯᐎᓂᒃ, ᐊᐙᓯᑌ ᓇᑕᐌᓕᑕᑾᓐ ᑭᓚᐗᐤ ᐅᒋ᙮ 25ᐁ ᐋᔮᔮᓐ ᒫᑲ ᐅᒪ ᒪᔥᑲᐎ ᐊᔅᐯᓕᒧᐎᓐ, ᓂ ᑭᔅᑫᓕᑌᓐ ᑭᒋ ᐃᑖᔮᓐ ᓀᔥᑕ ᑭᒋ ᐎᒋᑕᔑᑫᒥᑕᑾᒃ ᒥᓯᐌ ᐁ ᐃᑕᔑᔦᒃ, ᑭᒋ ᐅᒋ ᓚᑭᐋᔮᔦᒃ ᓀᔥᑕ ᑭᒋ ᐅᒋ ᒥᓚᐙᑕᒣᒃ ᑖᐺᔦᓕᑕᒧᐎᓐ; 26ᑭ ᒥᓚᐙᑕᒧᐎᓕᐗᐤ ᐊᐙᓯᑌ ᑭᒋ ᒥᔖᒃ ᒋᓴᔅ ᙭ᑎᒃ ᓂᓚ ᐅᒋ, ᒥᓇ ᐁ ᐯᒋᓈᑎᑖᑾᒃ᙮
27ᐁᑯᔑ ᐱᑯ ᑭᑦ ᐃᔑ ᐱᒫᑎᓯᐎᓂᐗᐤ ᑲᑕ ᐎ ᐃᔑᓈᑾᓐ ᐁ ᐃᔑᓈᑾᓂᓕᒃ ᐅᒥᓗᐋᒋᒧᐎᓐ ᙭: ᑮᔥᐱᓐ ᑫ ᑕᑯᔑᓄᐙᓀ ᑭᒋ ᐙᐸᒥᑕᑾᒃ, ᓀᔥᑕᐱᑯ ᑫ ᐃᑖᐱᒋᐙᓀ, ᓂ ᑳ ᐯᑌᓐ ᐁ ᐋᔨᑎᔦᒃ, ᓀᔥᑕ ᐁ ᐋᔭᒋᑳᐸᐎᔦᒃ ᐯᔭᒃ ᐊᒑᑯᒃ, ᐁ ᐯᔭᑯ ᒥᑐᓀᓕᒋᑲᓂᔦᒃ ᒫᒪᐎ ᑭᑐᒋᑲᓇᐌᓕᑕᒣᒃ ᒥᓗᐋᒋᒧᐎᓂ ᑖᐺᔦᓕᑕᒧᐎᓐ; 28ᐁᑳ ᑫᒀᓐ ᒫᑲ ᐁ ᓭᑭᐃᑖᑾᒃ ᐊᓂᑭ ᑳ ᓄᑎᓂᑖᑾᒃ: ᑳ ᐸᔭᑌ ᑭᔅᑭᓄᐙᒋᑕᒫᒋᒃ ᓂᔑᐗᓈᑎᓯᐎᓂᓕᐤ, ᑭᓚᐗᐤ ᒫᑲ ᐱᒫᒋᐃᑯᓯᐎᓐ, ᐁᐗᑯ ᓀᔥᑕ ᑭᒋᒪᓂᑐ ᐅᒋ᙮ 29ᐌᓴ ᑭᓚᐗᐤ ᑭ ᒥᓕᑲᐎᓇᐗᐤ ᐅᑦ ᐃᑌᓕᑖᑯᓯᐎᓂᒃ ᙭, ᓇᒪᐎᓚ ᐱᑯ ᑭᒋ ᑖᐺᔦᓕᒣᒃ, ᒫᑲ ᐊᓯᒋ ᐎᓚ ᐅᒋ ᑭᒋ ᐎᓴᑫᓕᑕᒣᒃ; 30ᐁ ᐋᔮᔦᒃ ᐊᓂᒪ ᑫᔮᐸᒡ ᐋᓕᒣᓕᑕᒧᐎᓐ, ᑳ ᑮ ᐙᐸᑕᒣᒃ ᐁ ᐱᒋᔅᑳᑯᔮᓐ, ᐊᓄᒡ ᓀᔥᑕ ᑳ ᐯᑕᒣᒃ ᐁ ᐱᒋᔅᑳᑯᔮᓐ᙮
Currently Selected:
ᐱᓕᐱᔭᓇ 1: MCNT91
Highlight
Share
Copy
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.