ᐊᐸᔅᑕᓚᒃ 5
5
ᐋᓇᓈᐃᐊᔅ ᓀᔥᑕ ᓵᐹᐃᕋ
1ᒫᑲ ᐯᔭᒃ ᐃᓕᓕᐤ ᐋᓇᓈᐃᐊᔅ ᐁ ᐃᔑᓂᑳᓱᑦ, ᓀᔥᑕ ᐎᐗ ᓴᐹᐃᕋ, ᑮ ᐊᑖᐙᑫᐗᒃ ᐅᑦ ᐊᔮᓂᐙᐗ, 2ᑮ ᑲᓇᐌᓕᑕᒶᒃ ᒫᑲ ᐸᔅᑭ ᑳ ᐃᑕᑭᒋᑳᑌᓕᒃ ᐎᐗ ᐊᓯᒋ ᐁ ᑭᔅᑫᓕᑕᒥᓕᒋ, ᐸᔅᑭ ᒫᑲ ᑮ ᐯᑖᐗᒃ, ᓀᔥᑕ ᑮ ᐸᑭᑎᓇᒶᒃ ᐊᐸᔅᑕᓚ ᐅᓯᑎᓕᒃ᙮ 3ᒫᑲ ᐱᑕᕐ ᑮ ᐃᑌᐤ ᐋᓇᓈᐃᐊᓴ, ᑕᓀᑭ ᐌᒋ ᓭᑕᓐ ᑮ ᓵᑲᔅᑭᓇᑖᑦ ᑭᑌᐃᓕᐤ ᑭᒋ ᑭᓛᔅᑭᒪ ᑳ ᐸᓓᑭᓯᑦ ᐊᒑᒃ, ᓀᔥᑕ ᑭᒋ ᓇᑳᓇᒪᓐ ᐸᔅᑭ ᐊᓂᒪ ᑳ ᐃᑕᑭᒋᑳᑌᒃ ᐊᔅᑭ? 4ᒣᒀᒡ ᑳ ᐃᑕᔅᑌᒃ, ᓇᒪ ᓈ ᑭ ᑎᐱᓚᐌᐎᓯᑖᔾ? ᐃᔅᐱ ᒫᑲ ᑳ ᐊᑖᐙᑫᔭᓐ, ᓇᒪ ᓇ ᑎᐱᓚᐌ ᑭ ᑎᐯᓕᑌᑖᔾ ᑫᔮᐸᒡ? ᑖᓀᑭ ᐌᒋ ᐅᒪ ᑫᒀᓐ ᑮ ᐃᑌᓕᑕᒪᓐ ᑭᑌᐃᒃ? ᓇᒪᐎᓚ ᑭ ᑮ ᐅᒋ ᑭᓛᔅᑭᒫᐗᒃ ᐃᓕᓕᐗᒃ, ᒫᑲ ᑭᒋᒪᓂᑐ᙮ 5ᐋᓇᓈᐃᐊᔅ ᒫᑲ ᐁ ᐯᑕᒃ ᐅᐅ ᐋᔭᒥᐎᓇ ᑮ ᐸᑭᔑᓐ, ᑮ ᓂᐱᐤ ᒫᑲ; ᓀᔥᑕ ᑭᒋ ᓭᑭᓯᐎᓂᓕᐤ ᑮ ᐅᑎᑎᑯᐗᒃ ᒥᓯᐌ ᑳ ᐯᑕᑭᒃ ᐅᐅ ᑫᒀᓇ᙮ 6ᐆᔥᑭᓂᑭᐗᒃ ᒫᑲ ᑮ ᐸᓯᑰᐗᒃ, ᑮ ᐌᐌᑭᓀᐗᒃ, ᓀᔥᑕ ᑮ ᐗᓚᐎᑕᐁᐗᒃ, ᑮ ᓇᐃᑲᐌᐗᒃ ᒫᑲ᙮
7ᓈᓐᑕᐤ ᒫᑲ ᓂᔅᑐ ᑎᐸᐃᑲᓇ ᐱᓯᒧᑳᓂᒃ ᐹᑎᒪ, ᐃᔅᐱ ᐎᐗ, ᐁᑳ ᐁ ᑭᔅᑫᓕᑕᒥᓕᒋ ᑖᓂ ᑳ ᑐᒋᑳᑌᓕᒃ, ᑮ ᐯᒋ ᐱᑐᑫᓕᐗ᙮ 8ᐱᑕᕐ ᒫᑲ ᑮ ᓇᔅᑴᐙᔑᐁᐤ, ᐎᑕᒪᐎᓐ ᑮᔥᐱᓐ ᑳ ᐊᑖᐙᑫᑴ ᐊᔅᑭ ᐊᓂᒪ ᐃᔥᐱᔥ ᐅᒋ᙮ ᑮ ᐃᑗᐤ ᒫᑲ, ᐁᐁ, ᐁᒀᓂ ᐃᓕᑯᒃ᙮
9ᐁᑯ ᐱᑕᕐ ᑳ ᐃᑖᑦ, ᑖᓀᑭ ᐌᒋ ᑖᐱᔅᑯᒡ ᑮ ᓇᔅᑯᒥᑐᔦᒃ ᑭᒋ ᑲᑴᒋᐃᒣᒃ ᐅᑦ ᐊᒑᑾ ᐅᑎᐯᓕᒋᑫᐤ? ᒫᑎᑲ ᐅᓯᑎᐙᐗ ᑳ ᑮ ᓇᐃᑲᐙᒋᒃ ᑭ ᓈᐯᒪ ᐃᔥᒀᑌᒥᒃ ᐃᑕᑾᓂᓕᐗ, ᓀᔥᑕ ᑭᓚ ᑭ ᑳ ᐗᓚᐎᑕᐃᑾᒃ᙮ 10ᐁᑯ ᑣᔦᒃ ᑳ ᐸᑭᔑᒃ ᐅᓯᑎᓕᒃ, ᑮ ᓂᐱᐤ ᒫᑲ: ᐆᔥᑭᓂᑭᐗᒃ ᒫᑲ ᑮ ᐯᒋ ᐱᑐᑫᐗᒃ, ᑮ ᒥᔅᑲᐌᐗᒃ ᒫᑲ ᐁ ᓂᐱᓕᒋ, ᓀᔥᑕ ᐁ ᑭᒋᐎᓚᒋᒃ, ᑮ ᓇᐃᑲᐌᐗᒃ ᐊᓐᑕ ᑳ ᐃᔑ ᓇᐃᑳᒥᒋ ᐅ ᓈᐯᒪ᙮ 11ᑭᒋ ᓭᑭᓯᐎᓂᓕᐤ ᒫᑲ ᑮ ᐅᑎᑎᑯᐗᒃ ᒥᓯᐌ ᒫᒪᐎᐋᔭᒥᐋᐗᒃ ᓀᔥᑕ ᑕᑐ ᐊᓂᑭ ᑳ ᐯᑕᑭᒃ ᐅᐅ ᑫᒀᓇ᙮
ᑭᔅᑭᓄᐙᒋᒋᑲᓇ ᓀᔥᑕ ᒫᒪᔅᑳᒋ ᐃᔑᒋᑫᐎᓇ
12ᐅᒋᒋᐙᒃ ᒫᑲ ᐅᒋ ᐊᐸᔅᑕᓚᒃ ᒥᒉᑦ ᑭᔅᑭᓄᐙᒋᒋᑲᓇ ᓀᔥᑕ ᒫᒪᔅᑳᒋᐃᓯᒋᑫᐎᓇ ᑮ ᑐᑕᒪᐙᑲᓂᐎᐙᒃ ᐃᓕᓕᐗᒃ; (ᒥᓯᐌ ᒫᑲ ᐁ ᐯᔭᑯ ᒥᑐᓀᓕᒋᑳᓂᒋᒡ ᑮ ᒫᒪᐤ ᐃᑖᐗᒃ ᐱᒋ ᓵᓚᒪᓐ ᐅ ᐱᔅᑭᒋᐙᔅᑲᔨᑲᓂᒃ᙮ 13ᐊᓂᑭ ᒫᑲ ᑯᑕᑭᔭᒃ ᐅᒋ ᓇᒪ ᐊᐌᓇ ᐃᓕᓕᐤ ᑮ ᐃᔅᐱᑌᓕᒥᑎᓱ ᑭᒋ ᐎᒉᐙᑦ ᒫᑲ ᐃᓕᓕᐗ ᑮ ᑭᔅᑖᒋᒥᑯᐗᒃ᙮ 14ᐅᑖᐺᑕᒧᐗᒃ ᒫᑲ ᐊᐙᓯᑌ ᑮ ᑕᑯᑕᒪᐙᑲᓂᐎᐤ ᐅᑎᐯᓕᒋᑫᐤ, ᐁ ᒥᒉᑎᒋᒃ ᑖᐱᔅᑯᒡ ᓈᐯᐗᒃ ᓀᔥᑕ ᐃᔅᑴᐗᒃ᙮) 15ᑳ ᐅᒋ ᐯᒋ ᐗᓚᐎᑕᐋᒋᒃ ᑳ ᐋᑯᓯᓕᒋ ᐊᓐᑕ ᐱᒧᑌᔅᑲᓈᒃ, ᑮ ᐱᒥᔑᒣᐙᒃ ᒫᑲ ᓂᐯᐎᓂᒃ, ᓀᔥᑕ ᐋᔅᐱᔑᒨᐎᓂᒃ, ᒥᑰᒋᑲ ᐁ ᐋᑲᐙᔅᑌᔑᒃ ᐱᑕᕐ ᐁ ᐱᒧᑌᑦ ᑭᒋ ᑮ ᐋᑲᐙᔅᑌᔅᑳᑯᒋᒃ ᐋᑎᑦ ᐁ ᐃᑕᓯᒋᒃ᙮ 16ᑮ ᐯᒋ ᑕᑯᔑᓋᒃ ᓀᔥᑕ ᒥᒉᑦ ᐃᓕᓕᐗᒃ ᐊᓐᑕ ᒋᕉᓴᓚᒥᒃ ᐊᓂᐃ ᐃᑖᐎᓐ ᐅᒋ ᐙᔅᑲ ᑳ ᐃᑖᑾᑭ, ᐁ ᐯᔑᐙᒋᒃ ᑳ ᐋᑯᓯᓕᒋ ᐃᓕᓕᐗ, ᓀᔥᑕ ᐊᓂᐃ ᑳ ᑲᒀᑕᑭᐃᑰᓕᒋ ᑳ ᐎᓕᐱᓯᓕᒋ ᐊᒑᒀ: ᒥᓯᐌ ᐁ ᐃᑖᓯᒋᒃ ᒫᑲ ᑮ ᒥᓇᐙᒋᐊᑳᓂᐎᐗᒃ᙮
ᐊᑄᔅᑕᓚᒃ ᑲᒀᑕᑭᐋᑲᓂᐎᐗᒃ
17ᐁᑯ ᒫᐗᒋ ᑭᒋ ᓵᓵᑭᐎᓕᐌᐎᓕᓕᐤ ᑮ ᐹᓯᑯ, ᓀᔥᑕ ᒥᓯᐌ ᐊᓂᐃ ᑳ ᐎᒉᐎᑯᑦ, (ᐁᐗᒀᓂᑭ ᐊᓂᑭ ᓵᑦᔪᓯᔭᒃ,) ᓀᔥᑕ ᑮ ᓵᑲᔅᑭᓀᔅᑳᑯᐗᒃ ᑭᓯᐙᓯᐎᓂᓕᐤ, 18ᑮ ᒫᑯᓀᐗᒃ ᒫᑲ ᐊᓂᐃ ᐊᐸᔅᑕᓚ, ᓀᔥᑕ ᑮ ᐸᑭᑎᓀᐙᒃ ᑭᐸᐅᑐᐎᑲᒥᑯᒃ᙮ 19ᒫᑲ ᐅᑦ ᐁᓐᒐᓕᒪ ᐅᑎᐯᓕᒋᑫᐤ ᒣᒀᑎᐱᔉ ᑮ ᐋᐸᐊᒻ ᑭᐸᐅᑑᐎᑲᒥᒃ ᐃᔥᒀᑌᒪ, ᑮ ᐯᒋ ᐗᓚᐎᑕᐁᐤ ᒫᑲ, ᓀᔥᑕ ᑮ ᐃᑌᐤ, 20ᒫᒑᒃ, ᓇᑕᐎ ᓂᐸᐎᒃ ᐋᔭᒥᐃᑯᒃ ᒫᑲ ᐃᓕᓕᐗᒃ ᑭᒋᐊᔭᒥᐁᐎᑲᒥᑯᒃ ᒥᓯᐌ ᐅᐅ ᐱᒫᑎᓯᐎᓂ ᐋᔭᒥᐎᓇ᙮ 21ᐃᔅᐱ ᒫᑲ ᐅᒪ ᑳ ᐯᑕᑭᒃ, ᑮ ᐱᑐᑫᐗᒃ ᑭᒋᐊᔭᒥᐁᐎᑲᒥᑯᒃ ᐎᐸᒡ ᐁ ᑭᑭᔐᐸᔮᓕᒃ, ᓀᔥᑕ ᑮ ᑭᔅᑭᓄᐊᒪᑫᐗᒃ᙮
ᒫᑲ ᒫᐗᒋ ᑭᒋ ᓵᓵᑭᐎᓕᐌᐎᓕᓕᐤ ᑮ ᐯᒋ ᑕᑯᔑᓐ, ᓀᔥᑕ ᐊᓂᐃ ᑳ ᐎᒉᐎᑯᑦ, ᓀᔥᑕ ᑮ ᒫᒪᐎ ᓇᑐᒣᐤ ᐅᓚᔓᐌᐗ, ᓀᔥᑕ ᒥᓯᐌ ᑳ ᑭᔅᑌᓕᑕᑯᓯᓕᒋ ᐃᔅᕃᐃᓪ ᐅᑦ ᐊᐙᔑᒥᔕ ᐅᒋ, ᑮ ᐃᔑᑎᔓᐅᐌᐗᒃ ᑭᐸᐅᑑᐎᑲᒥᑯᒃ ᒫᑲ ᑭᒋ ᐯᔑᒥᒋ᙮ 22ᒫᑲ ᐃᔅᐱ ᐅᑭᒫᐗᒃ ᑳ ᑕᑯᔑᑭᒃ, ᓀᔥᑕ ᐁᑳ ᐁ ᒥᔅᑲᐙᒋᒃ ᑭᐸᐅᑑᐎᑲᒥᑯᒃ, ᑮ ᑭᐌᐗᒃ, ᓀᔥᑕ ᑮ ᐎᑕᒶᒃ, 23ᐁ ᐃᑗᒋᒃ, ᑭᐸᐅᑑᐎᑲᒥᒃ ᑖᐺ ᓂ ᑮ ᒥᔅᑫᓈᓐ ᐁ ᐋᔨᒋ ᑭᐸᐃᑳᑌᐤ, ᐊᓂᑭ ᒫᑲ ᑳ ᑲᓇᐌᓕᑕᑭᒃ ᐁ ᓂᐸᐎᒋᒃ ᐗᓚᐎᑎᒥᒃ ᐃᔥᒀᑌᒥᒃ: ᒫᑲ ᐃᔅᐱ ᑳ ᑮ ᐋᐸᐊᒫᒃ, ᓇᒪᐎᓚ ᐊᐌᓇ ᐃᓕᓕᐤ ᐱᒋ ᓂ ᑮ ᒥᔅᑲᐗᓈᓐ᙮ 24ᐁᑯ ᐃᔅᐱ ᒫᐗᒋ ᑭᒋ ᓵᓵᑭᐎᓕᐌᐎᓕᓕᐤ, ᓀᔥᑕ ᐊᓇ ᐅᑭᒫᐤ ᑳ ᑎᐯᓕᑕᒃ ᑭᒋᐊᔭᒥᐁᐎᑲᒥᑯᓕᐤ, ᓀᔥᑕ ᑭᒋ ᓵᓵᑭᐎᓕᐌᐎᓕᓕᐗᒃ ᑳ ᐯᑕᑭᒃ ᐅᐅ ᑫᒀᓇ ᑮ ᐙᐙᓀᓕᑕᒶᒃ ᑖᓂ ᑫ ᐊᑎ ᐃᑭᓂᓕᒃ ᐅᒪ᙮ 25ᐁᑯ ᒫᑲ ᐯᔭᒃ ᑳ ᐯᒋ ᑕᑯᔑᒃ ᓀᔥᑕ ᑮ ᐎᑕᒫᐌᐤ, ᐁ ᐃᑗᑦ, ᒫᑎᑲ, ᐊᓂᑭ ᐃᓕᓕᐗᒃ ᑳ ᑮ ᑭᐸᐌᑾᒃ ᑭᐸᐅᑑᐎᑲᒥᑯᒃ ᓂᐸᐎᐗᒃ ᐱᒋ ᑭᒋᐊᔭᒥᐁᐎᑲᒥᑯᒃ, ᓀᔥᑕ ᑭᔅᑭᓅᐊᒪᐌᐙᒃ ᐃᓕᓕᐗ᙮ 26ᐁᑯ ᐃᑐᑌᑦ ᓇᑐᐸᓕᐎᑭᒫᐤ ᐅᑭᒫᐗᒃ ᐊᓯᒋ, ᑮ ᐯᔑᐌᐗᒃ ᒫᑲ ᐁᑳ ᐗᔦᔥ ᐁ ᑐᑕᐙᒋᒃ: ᐌᓴ ᑮ ᑯᔅᑌᐗᒃ ᐃᓕᓕᐗ, ᐁᑳ ᑭᒋ ᐱᒧᓯᓈᑕᐅᑯᒋᒃ᙮
27ᐃᔅᐱ ᒫᑲ ᑳ ᑮ ᐯᔑᐙᒋᒃ, ᑮ ᐸᑭᑎᓀᐗᒃ ᐅᑎᔥᑲᐤ ᑳ ᒫᐗᒋᐃᑐᓕᒋ, ᒫᐗᒋ ᑭᒋ ᓵᓵᑭᐎᓕᐌᐎᓕᓕᐤ ᑮ ᑲᑴᒋᒣᐤ ᒫᑲ, 28ᐁ ᐃᑗᑦ, ᓇᒪ ᓈ ᐋᔨᒋ ᑭ ᑮ ᐃᑕᔓᐗᑎᑎᓇᓐ ᐁᑳ ᑭᒋ ᑭᔅᑭᓄᐊᒫᑫᔦᒃ ᐅᒪ ᐃᔑᓂᑳᓱᐎᓂᒃ? ᓀᔥᑕ, ᒫᑎᑲ, ᑭ ᑮ ᓵᑲᔅᑭᓇᑕᓈᐗᐤ ᒋᕉᓴᓚᒻ ᐅᒪ ᑭ ᑭᔅᑭᓄᐊᒪᑫᐎᓂᐙᐤ ᐅᒋ, ᓀᔥᑕ ᐁ ᐃᑌᓕᑕᒣᒃ ᑭᒋ ᐊᑖᒣᓕᒥᔮᒃ, ᐊᐗ ᐃᓕᓕᐤ ᐅᒥᑯᒻ ᐅᒋ᙮
29ᐁᑯ ᐱᑕᕐ ᓀᔥᑕ ᑯᑕᑭᔭᒃ ᐊᐸᔅᑕᓚᒃ ᑳ ᓇᔅᑴᐗᔑᐃᐌᒋᒃ ᓀᔥᑕ ᐃᑗᒋᒃ, ᓂ ᑳ ᐱᔑᒋᐋᑖᓈᓐ ᑭᒋᒪᓂᑐ ᐊᐙᓯᑌ ᐃᔥᐱᔥ ᐃᓕᓕᐗᒃ᙮ 30ᐅ ᑭᒋᒪᓂᑐᒥᐗᐗ ᐊᓂᑭ ᑯᑖᐎᓇᐗᒃ ᑮ ᐗᓂᔥᑳᓀᐤ ᒋᓴᓴ, ᑳ ᑮ ᓂᐸᐁᒃ ᓀᔥᑕ ᒥᔅᑎᑯᒃ ᑳ ᑮ ᐊᑰᓓᒃ᙮ 31ᐁᐗᒀᓂᐃ ᑭᒋᒪᓂᑐ ᑳ ᑮ ᑭᔅᑌᓕᑖᑯᐋᑦ ᐅ ᑭᒋᓂᔉ ᐅᒋ ᑭᒋ ᐅᑭᒪᐎᓕᑭ ᓀᔥᑕ ᑭᒋ ᐱᒫᒋᐃᐌᓕᒋ, ᑭᒋ ᒥᓛᑦ ᑴᔅᑳᑎᓯᐎᓂᓕᐤ ᐃᔅᕃᐃᓚ ᓀᔥᑕ ᐁ ᐌᐯᓕᒋᑲᑌᓕᑭ ᒪᒋᑣᐎᓇ᙮ 32ᓂᓚᓈᓐ ᒫᑲ ᓂ ᑎᐸᒋᒨᔅᑕᒪᐙᓇᓐ ᐅᐅ ᑫᒀᓇ; ᐁᒀᓂ ᓀᔥᑕ ᐁ ᑐᑕᒃ ᑳ ᐸᓓᑭᓯᑦ ᐊᒑᒃ, ᐊᓂᐃ ᑭᒋᒪᓂᑐ ᑳ ᑮ ᒥᓛᑦ ᒥᓯᐌ ᑕᑐ ᑳ ᓇᓇᐃᑖᑯᑦ᙮
33ᐃᔅᐱ ᒫᑲ ᐊᓂᒪ ᐱᐁᑕᑭᒃ, ᑮ ᐎᓴᑭᑌᐁᐗᒃ, ᑮ ᐊᔭᒥᐃᑐᐗᒃ ᒫᑲ ᑭᒋ ᓂᐸᐋᒋᒃ᙮ 34ᐁᑯ ᒫᑲ ᑳ ᐸᓯᑯᑦ ᐯᔭᒃ ᐊᓐᑕ ᐅᓚᔓᐌᐎᑲᒥᑯᒃ, ᐁ ᐸᕋᓯᐎᑦ, ᑲᒣᓕᔭᓪ ᐁ ᐃᔑᓂᑳᓱᑦ, ᐁ ᑲᑫᑖᐌᓕᑕᒃ ᐅᓚᔓᐌᐎᓂᒃ, ᑳ ᑭᔅᑌᓕᒥᑯᑦ ᒥᓯᐌ ᐃᓕᓕᐗ, ᓀᔥᑕ ᑮ ᐃᑗᐤ ᐅᐱᒣᔑᔥ ᑭᒋ ᐃᑐᑕᐃᒥᒋ ᐊᓂᐃ ᐊᐹᔅᑕᓚ; 35ᑮ ᐃᑌᐤ ᒫᑲ, ᑭᓚᐗᐤ ᐃᔅᕃᐃᓕᐎᓕᓕᑐᒃ, ᔮᑾᒃ ᑳ ᐃᑌᓕᑕᒣᒃ ᑭᒋ ᑑᑕᐌᑾᒃ ᐅᑯ ᐃᓕᓕᐗᒃ᙮ 36ᐌᓴ ᐹᒧᔑ ᐅᐅ ᑭᔑᑳᐗ ᑮ ᐸᓯᑯ ᑎᔪᑕᔅ ᐁ ᑮ ᑲᑭᒋᒥᓱᑦ ᑖᐱᔅᑯᒡ ᐊᐌᓇ ᑳ ᑭᔅᑎᓯᑦ; ᐊᓇ ᐋᑎᑦ ᐃᓕᓕᐗ ᑳ ᑮ ᐎᒉᐎᑯᑦ, ᓈᓐᑕᐤ ᓀᐗᐤ ᒥᑖᑐᒥᑕᓇᐤ ᐁ ᐃᑕᓯᓕᒋ: ᑳ ᑮ ᓂᐸᐋᑲᓂᐎᑦ: ᓀᔥᑕ ᒥᓯᐌ, ᐱᑯ ᑕᑐ ᑳ ᑮ ᑖᐺᑖᑯᑦ, ᑮ ᐗᓴᓶᑎᔕᐙᑲᓂᐎᓕᐗ, ᓀᔥᑕ ᑮ ᐊᑎ ᒣᒋᐸᓕᐗ᙮ 37ᐹᑎᒪ ᐁᑳ ᑳ ᐃᑖᑦ ᐊᐗ ᐃᓕᓕᐤ, ᑮ ᐸᓯᑯ ᒎᑕᔅ ᑲᓕᓕᒃ ᑳ ᐅᒌᑦ, ᒣᒀᒡ ᐊᓂᐃ ᑭᔑᑳᐗ ᑳ ᒪᐗᒋᐊᑲᓂᐎᑦ ᑎᐯᓕᒋᑫᐎ ᔓᓕᐋᓐ, ᑮ ᑐᑕᐌᐤ ᒫᑲ ᒥᒉᑦ ᐃᓕᓕᐗ ᑭᒋ ᓄᓱᓀᐊᓂᑦ: ᐎᓚ ᐊᓯᒋ ᑮ ᓂᔑᐗᓈᑎᓯᐤ; ᓀᔥᑕ ᒥᓯᐌ, ᐙᐗᒡ ᐃᑯ ᑕᑐ ᑳ ᑮ ᑖᐺᑖᑰᑦ ᑮ ᐊᓴᓶᑎᔕᐙᑲᓂᐎᓕᐗ᙮ 38ᐊᓄᒡ ᒫᑲ ᑭ ᐎᑕᒪᑎᓈᐗᐤ, ᐴᓂᐃᑯᒃ ᐅᑯ ᐃᓕᓕᐗᒃ, ᓀᔥᑕ ᐁᑳ ᐱᓯᔅᑫᓕᒥᑯᒃ: ᐌᓴ ᑮᔥᐱᓐ ᐅᒪ ᑲᑫᔅᑭᒥᐌᐎᓐ ᓀᔥᑕᐱᑯ ᐅᒪ ᐊᑐᔅᑫᐎᓐ ᐃᓕᓕᓇᒃ ᐌᒋᒪᑲᓄᑴ ᑲᑕ ᐃᔥᒀᐸᓕᐤ: 39ᒫᑲ ᑮᔥᐱᓐ ᑭᒋᒪᓂᑐᒃ ᐌᒋᒪᑲᓄᑴ, ᓇᒪᐎᓚ ᑭ ᑳ ᑮ ᓂᔑᐗᓈᒋᑖᓇᐗᐤ; ᑫᑲ ᒫᔅᑯᒡ ᑭ ᑳ ᒥᔅᑳᑲᐎᓈᐗᐤ ᐙᐗᒡ ᑭᒋᒪᓂᑐ ᐁ ᓇᔅᑰᔅᑕᐌᒃ᙮
40ᐎᓚ ᒫᑲ ᑮ ᑖᐺᑖᑯ; ᐃᔅᐱ ᒫᑲ ᑳ ᑮ ᓇᑐᒫᒋᒃ ᐊᓂᐃ ᐊᐸᔅᑕᓚ, ᓀᔥᑕ ᑳ ᐅᑕᑖᒪᐙᒋᒃ, ᑮ ᐃᑕᔓᐌᐗᒃ ᐁᑳ ᑭᒋ ᐋᔭᒥᓕᒋ ᒋᓴᓴ ᐅᑦ ᐃᔑᓂᑳᓱᐎᓂᓕᒃ, ᓀᔥᑕ ᑮ ᐸᑭᑎᓀᐗᒃ᙮ 41ᑮ ᑭᑐᑌᐙᒃ ᒫᑲ ᐅᑎᔥᑲᐤ ᐊᓂᐃ ᑳ ᒥᐗᒋᐃᑐᓕᒋ ᐅᒋ, ᐁ ᓯᑭᓓᓯᒋᒃ ᐁ ᑮ ᐃᑕᑭᒥᒋᒃ ᐁ ᑌᐸᑫᓕᑖᑯᓯᒋᒃ ᑭᒋ ᒧᔑᑖᒋᑲ ᓀᐯᐎᓯᐎᓂᓕᐤ ᐅᑦ ᐃᔑᓂᑳᓱᐎᓂᓕᐤ ᐅᒋ, 42ᑖᑡᐤ ᑳᔑᑳᒃ ᒫᑲ ᐱᒋ ᑭᒋᐋᔭᒥᐁᐎᑲᒥᑯᒃ, ᓀᔥᑕ ᐱᒋ ᑕᑐ ᐙᔅᑲᔨᑲᓇ, ᓇᒪᐎᓚ ᐅᒋ ᐳᓂᑖᐗᒃ ᐁ ᑭᔅᑭᓄᐊᒫᑫᒋᒃ ᓀᔥᑕ ᐁ ᐋᓕᒧᒫᒋᒃ ᒋᓴᔅ ᙭ᑕ᙮
Currently Selected:
ᐊᐸᔅᑕᓚᒃ 5: MCNT91
Highlight
Copy
Compare
Share
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.
