Ap 1
1
Da'me 'uaechiñe 'naqatac
1Jenjo' jo'ne qoyen di'yoq, da'me jo'ne maliaĝa ja qoyayate'n jo'ne Dios yane'm joñe'me Jesucristo, qaedi yayatenaĝanaĝaneque jogaa'me mach'e lalemaĝaje'te ga'me jo'ne paja'a 'uo qomle, chane'eja jayem namaĝa ñe'me lamaĝajec jo'ne piyem le'ec qaedi jayem yayatenaĝanaĝan, da'me jayem Juan jo'ne mach'e jayem lalemaĝajet joñe'me. 2Chane'eja male jechoĝot yema da'me jo'ne jauana, nach'edaua daa'me 'laqataĝanaĝaco joñe'me Dios, jo'ne 'yaĝatetedac joñe'me Jesucristo.
3Matac ga'me jo'ne dojelegue jenjo' yediijec jo'ne 'yaĝate'tape gaa'me uo'oe nayi nataq'aen gaa'me jo'ne uo'oe jo' qomle, nataq'aen made'tape yema gaa'me jo'ne domachita qama'le yoqochideta na'me jo'ne qoyediñe, qa'a male qoyoqo'ta ga'me laloqo' qom yema qoyen di'yoq.
Nep'iyenataĝanaĝac
4Jayem Juan ami jep'iye'n nayi, da'me ami Dios lec'oqo'tepi jo'ne oñiya'ña di'me aleua jo'ne Asia. Auacoñiyeguet nayi da'me nichoĝodenataĝanaĝac nataq'aen da'me 'nemaĝac jo'ne chiyoqo'ot joñe'me jo'ne jalchi'ena 'uo, nataq'aen nach'e eta't da'me qo'mi ue'tajopa, choqoñaa'me siete nepaqa'li ja 'nalo'te jo'ne dajoteda'aguet da'me lejaliaqa' joñe'me, 5qama'le nach'e ena'am chiyoqo'ot joñe'me Jesucristo, nach'eñe jo'ne choqotaĝanaĝaic 'me yataqatelegue, joñe'me jo'ne 'uaechiñe da'me 'niyelaĝajeguem da'me chiyaqauelo gaa'me napa'lpi, qama'le yataqata nejaliaĝatelo'te yema jogaa'me nejaliaĝanaqa jena'me aleua.
Nach'eñe jo'ne jalcote da'me qo'mi noqopitalo,
Qama'le qo'mi doĝotaĝaneque gaa'me qadoeco
Ca'li naliñi jaga'me letauo' da'me qoyalat.
6Nataq'aen da'me nach'eñe jo'ne en qo'mi lec'oqo'tepi,
Da'me en qo'mi letaĝayaĝanaĝanaqa ga'me jiyaĝadipi
da'me jajoqotalegue ñe'me Qadet'a Dios.
¡'Noota qom nach'e eta't 'uo da'me 'lonaĝac joñe'me Jesucristo
nataq'aen da'me lañoqotaĝanaĝac jo'ne qaya'te ena'am! Jaja'a, nach'e naq'aeta da'me dojo'.
7¡A'vicheta't! ¡Cristo na'taquena qomle da'me nalegue ga'me piyem lo'oc!
Qama'le yema ga'me jiyaĝadipi male yauata,
Chayovida'alo jogaa'me nalatoqo't nach'e ena'am da'me yauata joñe'me;
Qama'le yema joga'me jiyaĝadipi jo'ne uedalegue jena'me aleua
male 'uo da'me lachoĝode'j yajouaĝat joñe'me.
Chane'eja naq'aeta da'me dojo'. Jaja'a, nach'e naq'aeta da'me dojo'.
8“Naqayem jo'ne je'uaechiñe nataq'aen da'me naqayem jo'ne jep'ategue,” naq'aeta da'me 'laqatac joñe'me Jaliaĝanec Dios jo'ne qaya'te yaqalaatac, joñe'me jo'ne jalchi'ena 'uo, nataq'aen nach'e eta't da'me qo'mi ue'tajopa.
Jesús naloĝona ñe'me Juan
9Jayem Juan 'me mach'e jayem adaqayai, qama'le qo'mi nepi'iyaĝa'u da'me qademe'teguet joñe'me Jesús. Qo'che' 'uo da'me qadachoĝodec nayi, nataq'aen 'uo da'me qat'añaĝac da'me qaedi ñapogaĝadenaq, chayovida'a da'me yataqata jouaqataue da'me lejaliaĝa joñe'me Dios. Da'me jayem jonetalegue ca'li di'me comadaĝa jo'ne lenaĝat da'me Patmos, yajouaĝat da'me ja'aĝate'tape naa'me 'laqataĝanaĝaco joñe'me Dios, nach'enaua jo'ne dechoqotaĝatec joñe'me Jesús. 10Ca'li jouetoue jo'me nolo' jo'ne laloqo' joñe'me Jaliaĝanec da'me qo'nonaĝachigui, qama'le jayem ua'ajop da'me lañoqotaĝanaĝac ñe'me Dios Lepaqal. Chane'eja jomachiya ga'me lejamaĝa da'me chimaqapegue jena'me jachiyoĝogue jo'ne netenec da'me 'laqatac, ena'am jaga'me najeede qom qoyajediye. 11Qama'le jayem enapega: “Auediñe da'me dojo' jo'ne auana jo' qomle, auachalegue jaga'me nede qaedi auamaĝalo jogaa'me siete tamenaĝaiqui', jogaa'me jo'ne napi'ñalo jogaa'me noyaqa jo'ne netedaue di'me aleua Asia: gaa'me noyaqa jo'ne Éfeso, Esmirna, Pérgamo, Tiatira, Sardes, Filadelfia nataq'aen di'me Laodicea.”
12Qama'le ji'iyelaĝague jena'me jachiyoĝogue qaedi jauana ga'me jo'ne jayem dojapegue', qama'le jauanalo jogaa'me siete coyadaĝanaqatel jo'ne oro, 13nataq'aen da'me 'uo ga'me jauana jo'ne uetañgui laeñi jogaa'me siete coyadaĝanaqatel jo'ne ena'am ta'le jiyaĝaua, 'me yatañe joga'me leuo jo'ne yeda'ñalo naa'me lapia'te, choqoga'me oro jo'ne nejataĝaiqui yovidaje'ma jajo'me letogue. 14Jena'me layoĝot yataqata pagaĝaic, ena'am da'me lepagaĝa ga'me 'naĝanaĝate layoĝot, uotaĝa ena'am jaga'me loñi da'me yapagaq, nataq'aen naa'me 'lae'te edetedañgui, ena'ama ga'me dole' lauaq. 15Choqonaa'me lapia'te da'me yaqasele'j ena'am ta'le bronce qom qoyachiyoĝotaue jaga'me nec'atoĝoiqui qaedi ñeegue ga'me letoĝo, nataq'aen 'uo da'me lejamaĝa let'adaic jo'ne ena'am ga'me noĝop qom vichaĝaguet da'me nayeñe. 16Jena'me louaq jo'ne yayaten uo'oe gaa'me siete uaqachiñil jo'ne uetedaye, qama'le nataq'aen jena'me nedegaĝat chiyaqaue jo'me ledaĝanaĝat jo'ne dos naa'me lia'a; nataq'aen jena'me latajoĝoc yataqata yaqaselec, ena'am jañe'me ajeua nale nolo' laeñi.
17Mane'e da'me jauana, qama'le jachiyaqajeguem, jouo'oto naa'me lapia'te da'me ena'am ta'le jeleu, qalaĝaja joñe'me jayem yachalegue jo'me louaq jo'ne yayaten, qama'le jayem dojapegue', enaac: “Ena'te ado'e, qa'a mach'e jayem jo'ne je'uaechiñe nataq'aen da'me naqayem jo'ne jep'ategue; 18nataq'aen da'me naqayem jo'ne nach'e eta't da'me jec'aletaye: naqayem jo'ne jeleu ca'li, qalaĝaja nayi male nach'e eta't da'me jec'aletaye, qama'le jayem ue'tajop da'me yañoqotaĝanaĝac qaedi 'ñiyelaĝachidijeguem gaa'me joote yele'u, da'me jachiyoĝotedaue di'me napa'lpi necoñetaĝaiqui'. 19Chane'eja auediñe nayi jenjo' jo'ne auana: naa'me uo'oe nayi nataq'aen jogaa'me uo'oe qom'che. 20Naa'me naajo' jo'ne ja di'yo't 'me siete uaqachiñil jo'ne auanalo da'me uetedaye jenjo' youaq jo'ne yayaten nataq'aen naa'me siete coyadaĝanaqatel jo'ne oro: jonaa'me siete uaqachiñil nach'enaua jo'ne piyem laje' 'me yelolo'te gaa'me siete tamenaĝaiqui', qama'le naa'me siete coyadaĝanaqatel jo'ne auanalo nach'enaua jo'ne siete naa'me tamenaĝaiqui'.
Currently Selected:
Ap 1: TSN
Highlight
Share
Copy
Want to have your highlights saved across all your devices? Sign up or sign in
Nuevo Testament Toba del Oeste © 2010 Sociedad Bíblica Argentina