Flp 1
1
Lep'iyenataĝanaĝac ñe'me Pablo
1Jayem Pablo nataq'aen ñe'me Timoteo, da'me qo'mi Jesucristo lamaĝa's, yataqata jalcote da'me qadamaic ami qauamaĝalo, da'me ami Filipos laje' jo'ne ademii'teguet joñe'me Jesucristo. Nach'eda da'me qadamaic jo'ne janemaĝama gaa'me jo'ne yelolo'te ga'me Dios lec'oqo'tepi choqogaa'me necochaĝa'u nataq'aen yema ga'me Dios lec'oqo'tepi.
2'Noota qom Dios mach'e Qadet'a nataq'aen ñe'me Qadejaliaĝanec Jesucristo ami yanema da'me anichoĝodenataguequi nataq'aen da'me at'emaĝaqui.
Pablo dajelaĝalo'te ga'me Dios lec'oqo'tepi
3Ami yaqaya'olqa, nale ami jenate'talo nach'e eta't janem da'me yamaic joñe'me Dios. 4Qama'le nale ñetametac, nach'e eta't 'uo da'me yamaic jo'ne chiyaqayi da'me ami jajelaĝalo'te, 5qa'a jouaĝat ca'li jayem alecochiiya qaedi ja'aĝatetac jena'me jenjo' nec'alaĝa ladic, ca'li yemta chayovida'a nayi. 6Yataqata 'noota da'me 'lonataĝanaĝac joñe'me Dios jo'ne ami uauelo ca'li yemta, qama'le naajo' noloqo'ote male en nichiquetedaye da'me auep'iiya'a joñe'me, chayovida'a ga'me nolo' qom yitaĝa 'niyelaq joñe'me Jesucristo.
7Qama'le jeetapega 'noota da'me nach'e eta't ami jenatetapegalo, qa'a yataqata ami joqopitalo. Nataq'aen jayaten da'me yataqata ami uetauelo da'me lañoqotaĝanaĝac joñe'me Dios, qama'le jayem alecochiiya jena'me jenjo' 'yonatac jo'ne Dios jayem yanem, uotaĝa joue'ta jana'me janjo' coñetaĝanaĝaiqui, uotaĝa nale jajo'tagueta jogaa'me jiyaĝa'u yatenaĝanaĝayaqa, qaedi ja'aĝatetac jena'me jenjo' eja ladic, chayovida'a da'me yataqata yacoteguet. 8Dios joote yayaten da'me yataqata eja da'me ami ñetonata'n, nataq'aen da'me yataqata ami joqopitalo, nach'eda da'me yoqopich'i jo'ne jayem yanem ca'li joñe'me Jesucristo.
9Ñachoĝodetapecot joñe'me Dios qaedi nach'e eta't en nichiquetedaye da'me anoqopich'iya't, qaedi yataqata qoyayaten nataq'aen qaya'te ami qoyec'ateneque, 10qaedi auayachiñe joga'me a'vichi nale, qaedi qom yitaĝa 'niyelaq joñe'me Cristo, male yataqata qaya'te adoequi, nataq'aen da'me yataqata ami ja 'nalo'te. 11Chane'eja joda'me lecochaĝac joñe'me Jesucristo male ami yaloĝonalo joda'me 'noota ta'le a'vichi, qaedi yataqata qo'nonaĝachigui joñe'me Dios chayovida'a da'me yataqata qonenaĝachijeguem joda'me lenaĝat joñe'me.
Pablo 'yaĝatetac jena'me jenjo' qat'oyaĝac
12Ami yaqaya'olqa, 'noota qom auayachiñe joda'me jayem qo'eetec quelqaya, qa'a jenjo' ma'ejama'le jayem lecochiya da'me ja'aĝatetac jena'me jenjo' 'noota ladic. 13Chane'eja nayi yemeda gaa'me coico laje' jo'ne uetedaue ga'me nejaliaĝaiqui nataq'aen yema ga'me jiyaĝadipi joote yataqata yayate'n queda'me jayem qoyecoñedeta't yajouaĝat da'me je'etetac da'me 'lonatac joñe'me Cristo. 14Nataq'aen mane'e da'me jayem qoyecoñedeta't, ma'ejama'le jena'me qadayi da'me 'uo da'me 'lañaĝa'j da'me 'yaĝatetedac da'me 'laqataĝanaĝac joñe'me Dios, male 'uo da'me netonaĝa'j jo'ne chiyoqo'ot joñe'me Qadejaliaĝanec qama'le qaya'te t'oitedac.
15Yataqata eja da'me uo'oe gaa'me eetedapega 'yaĝatetedac joñe'me Jesucristo, qalaĝaja ch'e jetaque jayem necotedapegue' da'me 'yonataĝanaĝac, qa'a ja jayem 'te 'yamaqate'n. Qalaĝaja uo'oe gaa'me laqaya' jo'ne yataqata 'noota da'me lelnataĝa'j, 16qama'le 'yaĝatetedac jena'me jenjo' 'noota qa'a 'uo da'me lepagaĝac da'me jayem noqopideta, nataq'aen yayate'n joñe'me Dios nach'eñe jayem yanem jena'me jenjo' 'yonatac qaedi je'uolegue jena'me jenjo' qadepe'e ladic. 17Qalaĝaja gaa'me jo'ne ja jayem 'te 'yamaqate'n, da'me lapaĝaguenataĝanaĝa'j ja yataqatelo'te, yauote jena'me jenjo' qa'a ch'e 'yoĝodenaĝayaqa nataq'aen jetaque yañodelegue joga'me qoyen yaviyaĝajet da'me jonetaue jana'me janjo' coñetaĝanaĝaiqui. 18Qalaĝaja naajo' ja jayem 'te yeloiquiaĝa'n, qa'a nach'e ena'am 'yaĝatetedac joñe'me Jesucristo, te'me ja yataqatelo'te qalaĝaja yataqata en jayem matac naa'me naajo', chayovida'a gaa'me noloqo'ote jo'ne na'te', 19qa'a jayaten da'me 'uo joga'me adajelaĝanaĝaqui, nataq'aen joda'me lecochaĝac joñe'me Lepaqal ñe'me Jesucristo, qama'le jeca'e qomle jana'me janjo' coñetaĝanaĝaiqui. 20Ja jetaque jen lichigui nale jena'me yeuel, dite da'me qom maliaĝa jayem 'uo, uotaĝa qom male jeleu, jetaque jaco'teguet joda'me 'yañaĝac, qaedi nale jayem qoyec'atetac, male yataqata qo'nonaĝachigui joñe'me Cristo.
21Chane'eja qom maliaĝa jec'aletaye, male yataqata jo'onataĝatape'uo joñe'me Cristo, qalaĝaja qom jeleu male jomataĝan jo' qomle. 22Qalaĝaja, qom maliaĝa jec'aletaye, joñe'me Dios 'uo da'me en chiyaqayi da'me 'yonataĝanaĝac, qama'le da'me jayem ja jayaten joga'me jepaquetapega. 23Nale jenate'ta jena'me jenjo', yataqata 'uo joda'me jen laqalaic joga'me jetaque ja'uo, qa'a qom ua'ña da'me jeleu, male jajoya'aguet joñe'me Qadejaliaĝanec Jesucristo, jo'ne nach'ena yataqata jepaquetapega. 24Qalaĝaja jayaten da'me auepaquitapega da'me nach'e eta't jayem 'uo, qa'a jayem auoviñetaque nale. 25Qama'le yataqata eja ami jouetauelo jaĝa'te, qaedi ami yecochitapegalo, qaedi yataqata auep'iiya'a joñe'me Dios, nataq'aen male yataqata ami made'tape. 26Qama'le qom yitaĝa ami jouetauelo, male yitaĝa jen nichiguegue da'me a'nonaĝachiyegui joñe'me Jesucristo.
27Nach'edata da'me yataqata aviyamaĝachetac da'me anejiyaĝauayaĝaqui, oquitapegue' da'me 'laqatac joñe'me Cristo, uotaĝa da'me yitaĝa ami jec'atalo uotaĝa ja naq'aeta, qa'a jetaque jomachiya queda'me nach'e eta't a'nañaĝachela't, yataqata onolec joda'me auauoyi nataq'aen onolec joda'me adeloiquiaĝaqui, nach'eda da'me ademiyalegue da'me adepi'i jo'ne chiyaqayi da'me 'naqataĝanaĝac jo'ne onaĝaic.
28Ena'te at'oyiyalo jogaa'me adauteuaidi', dite da'me nach'e eta't ami 'uañaĝayaqa, qa'a male di'yoq da'me qoyapalaĝa't qomle jogaa'me. Da'me ami qamqa'me male di'yoq da'me adec'alaqai, naqaeda jo'ne chiyoqo'ot joñe'me Dios. 29Joote ami qoyaje'tema ta'le ami lalemaĝaje'te joñe'me Cristo, qama'le nayi male auep'iiya'a joñe'me, uotaĝa qom 'uo joga'me qoyen adachoĝodequi jouaĝat joñe'me. 30Chane'eja male aueloiquii, ena'am da'me jayem, nach'eda da'me qadeloiquiaĝac jo'ne joote auañiya ca'li ami jouetauelo, qama'le male auomachiiya da'me maliaĝa jeloiquiaĝatac chayovida'a nayi.
Currently Selected:
Flp 1: TSN
Highlight
Share
Copy
Want to have your highlights saved across all your devices? Sign up or sign in
Nuevo Testament Toba del Oeste © 2010 Sociedad Bíblica Argentina