Jn 7
7
Joga'me mach'e lanoqolqa ñe'me Jesús 'uo da'me yoqoleguetetedac joñe'me
1Ca'li yem da'me dojo', qama'le Jesús quetalegue yema ga'me aleua jo'ne Galilea, qa'a male ja jetaque ue'ta di'me Judea, yajouaĝat da'me uo'oe jogaa'me judiopi lajoĝola'te jo'ne yelotedaque queda'me jetaque yala't joñe'me. 2Qama'le joote nadi'ta ga'me nolo' da'me qonauelo jogaa'me emaqa jo'ne nomachaĝaiqui', qa'a naq'aeta da'me jo'ne mach'e leualaĝayaĝaiqui' jogaa'me judiopi. 3Qama'le ua'a da'me eetedapega jogaa'me mach'e lanoqolqa joñe'me:
—Ena'te jetaque oue'ta jenjo', dite da'me oc, auajoyi di'me Judea, qaedi gaa'me jo'ne am quetedapegue' 'me ueteda'ague di'me Judea nach'e ena'am yayate'n da'me jo'ne a'uetetac. 4Qa'a qom jetaque 'uo da'me anatetonaguec, qama'le ja auoĝotetapiñe gaa'me uo'oe jo'ne a'uete'tape. Qa'a qalaqach'ele a'uetetac qaedi qoyauana da'me at'onatac, qama'le nach'eda aue'et da'me auajoya'agueta ena'uaque jogaa'me aleua laje'pi.
5Qa'a naq'aeta da'me yajouaĝat da'me chayovida'alo jogaa'me mach'e lanoqolqa joñe'me Jesús nataq'aen yoqoleguetetedac. 6Qama'le Jesús 'yategueta, enaac:
—Da'me jayem, maliaĝa ja yovita ga'me nolo' da'me jec, qalaĝaja da'me ami, ja ami 'te jena'ama queda'me aueñi 'noota da'me gamachaqaega nolo' da'me oquiyi. 7Jogaa'me aleua laje'pi ja ami 'te nouelatapegalo, qalaĝaja da'me jayem qamqa'me 'uo da'me nouelaqataĝanaĝac, qa'a da'me jayem jechoĝotema naa'me ja 'noe'n jo'ne 'lonataqa. 8Chane'eja auec'achiya nayi ga'me neualaĝayaĝac da'me ami, qalaĝaja da'me jayem cha'li ja jec'ata, queda'me maliaĝa ja yovita da'me laloqo' da'me jec.
9Ca'li yem da'me nenaĝategue da'me dojo', qama'le cha'li ue'ta di'me Galilea.
Jesús uetaue ga'me neualaĝayaĝaiqui jo'ne qonauelo gaa'me nomachaĝaiqui'
10Qalaĝaja ca'li male cop'a'elo da'me eque' jogaa'me mach'e lanoqolqa qama'le nach'e ena'am dajoyi ga'me neualaĝayaĝaiqui joñe'me Jesús, qalaĝaja qaya'te ta'le t'aqataĝanem. 11Qalaĝaja jogaa'me judiopi lajoĝola'te yelotedaque joñe'me Jesús, qama'le enapega'ajalo joca'li:
—¿Jach'e jogamaĝa ue'ta jo'me jojo' jiyaĝaua?
12Qama'le jogaa'me jiyaĝadipi jalcote da'me qonejoĝotapiye joga'me. Uo'oe gaa'me enapega'ajalo: “Dojo' jiyaĝaua onaĝaic da'me 'lonatac.” Qalaĝaja uo'oe gaa'me jiyaĝa'u laqaya' jo'ne enapega'ajalo: “Dojo' jiyaĝaua ja yataĝalegue, ch'e yoqovitac jena'me jiyaĝadipi.”
13Qalaĝaja qaya'te ta'le jetaque 'yaĝatetac ñe'me Jesús da'me uetedaue gaa'me jiyaĝadipi, qa'a ena'uaque jogaa'me jiyaĝa'u t'oiya'agueta jogaa'me lajoĝola'te.
14Qalaĝaja ca'li male yovita ga'me laeñi ga'me neualaĝayaĝaiqui, qama'le Jesús taue ga'me tamenaĝaiqui da'me dapaĝaguenataĝan. 15Jogaa'me najoĝola'te yataqachiñe yoqochetem ñe'me qama'le enapega'ajalo:
—¿Teua'atoqo' yayate'n yema da'me napaĝaguenataĝanaĝac, da'me ja cha'li napaĝaguela't?
16Jesús male 'yategueta jogaa'me:
—Da'me dojo' yapaĝaguenataĝanaĝac ja mach'e yoĝot, dite da'me loĝot ñe'me jo'ne jayem namaĝaquena. 17Gamachaqaega ga'me jo'ne jetaque ye'et da'me jo'ne loequenataĝanaĝac ñe'me Dios, yayaten da'me yapaĝaguenataĝanaĝac ta'le chiyoqo'ot ñe'me Dios, uotaĝa ta'le ch'e yelnataĝac. 18Ga'me jo'ne mach'e 'naĝatetapela't, nach'ega jo'ne yelotaque da'me jo'ne mach'e 'lonaĝac. Qalaĝaja da'me jayem jo'ne jelotaque da'me 'lonaĝac ñe'me jo'ne jayem namaĝaquena, qama'le ñenaĝategue da'me eja, qa'a da'me jayem qaya'te 'yaqatac ta'le ja no'en.
19“Da'me ami, ñe'me Moisés ami yanema da'me lamaĝajoĝonaĝac ñe'me Dios. Qalaĝaja da'me ami qaya'te ta'le onolec jo'ne yoqo'cha. Qama'te ¿toqoch'e jetaque jayem aualachi?”
20Jogaa'me jiyaĝadipi male qo'yateguet:
—¿Qo'li am payac lae't? ¿Jach'e ga'me jo'ne jetaque am yalat?
21Jesús 'yategueta jogaa'me:
—Yema da'me ami auoqoch'iyem da'me ch'e onolec jo'ne jo'onataĝañgui jo'me nolo' jo'ne niyamaqatac. 22Qama'le ñe'me Moisés ami yamaĝalo'te joca'li da'me anapaĝagueñiya da'me nichaĝajoĝonaĝac nale yovita gaa'me ocho noloqo'ote joga'tae'me notolec. Qama'le uotaĝa tachigui ga'me nolo' jo'ne niyamaqatac, qama'le nach'e ena'am da'me ami auauoyi ga'me 'nanaĝajet. (Qalaĝaja ja naqaeñe ñe'me Moisés ta'le chiyaqayi da'me dojo' namaĝajoĝonaĝac, ditelo jodia'me auachiyoqoya'agueta jo'ne Abraham, nataq'aen Isaac choqodi'me Jacob.) 23Da'me ami jetaque auepaqachiñichiguelo naa'me 'laqataqa ñe'me Moisés, chane'eja da'me ami male auañoĝochi da'me a'vichi ga'me 'nanaĝajet ga'me notolec, da'me te'me uetoue ga'me nolo' jo'ne niyamaqatac, qama'te ¿teua'atoqo' da'me jayem aualemataitapega queda'me yajouaĝat da'me 'loyaĝac ga'me jiyaĝaua da'me male jen yemegue da'me ñataden jo'me nolo' jo'ne niyamaqatac? 24Ami ena'te jetaque ch'e auec'achiñe ga'me jo'ne en di'yoq q'aen da'me ch'e qadec'atenaĝanaĝac; da'me 'uo ga'me aueloyilegue, qom 'uo ga'me analoqochiñe qaedi yataqatelegue chimaqachiñe da'me adaloqotenaĝanaĝaqui.
Jesús 'yaĝatetac di'me piyem da'me chiyoĝogue
25Qanach'e jogaa'me jo'ne neteda'ña di'me Jerusalén male denataĝatedapec, enapega't:
—¿Qo'li ja naqaeda da'me dojo' jo'ne qoyelotaque queda'me jetaque qoyalat? 26Qa'a da'me dojo' joote ueta'ñena da'me dojetapegoue jena'me jiyaĝadipi ja nañoĝotetapiñe, qalaĝaja qaya'te ta'le onolec jo'ne yaqanatet da'me enapega. Qa'a ¿uotaĝa naa'me qadajoĝola'te e'n eja da'me naqaeda da'me jo'ne mach'e Dios Liquiyac? 27Qalaĝaja da'me qo'mi joote jayatenaq di'me chiyaqa'ña; ga'me Dios Liquiyac qamqa'me qom novi', ja qoyayaten ga'me jo'ne chiyoĝogue.
28Joca'li Jesús domachiyalo, da'me uetaue ga'me tamenaĝaiqui da'me dapaĝaguenataĝatac, qama'le netenec da'me 'laqatac, enaac:
—¡Chane'eja auepíchitapega da'me joote jayem auatetoñi, nataq'aen da'me joote auayachiñe ga'me jo'ne jachiyoĝogue! Qalaĝaja ja mach'e jayem ta'le yelnataĝac da'me ñanaequena, dite da'me jayem namaĝaquena ñe'me jo'ne yataqatelegue, joñe'me jo'ne ja auatetoñi. 29Da'me jayem qamqa'me jateton qa'a naqayem jo'ne jachiyoĝogue, nataq'aen da'me nach'eñe jo'ne jayem namaĝaquena.
30Qama'le ua'a da'me jetaque qoyaconeuo'o qaedi qoyecoñe', qalaĝaja qaya'te ta'le onolec jo'ne nodegue ga'me louaq qaedi yaconeuo'o, qa'a maliaĝa jona'li yovita da'me mach'e laloqo'. 31Chane'eja jalcote gaa'me jiyaĝadipi jo'ne 'uo da'me 'lamaqatenataĝanaĝac joñe'me qama'le enapega't:
—Ga'me Dios Liquiyac, qom novi', ¿qo'li yauo'oe qayoĝode' gaa'me 'nanaqa 'me yaloĝo'n ta'le napacalegue da'me dojo' jiyaĝaua?
Jogaa'me fariseopi te'me 'uo da'me 'yetedec joñe'me Jesús
32Jogaa'me fariseopi domachita da'me 'naĝatetedapiye jogaa'me jiyaĝadipi ñe'me Jesús, qama'le jogaa'me fariseopi nataq'aen jogaa'me lejaliaĝanaqa gaa'me tamenaĝaiqui lo'olpi yamaĝalo'te gaa'me neteloqo't ga'me tamenaĝaiqui qaedi male yecoñe't joñe'me. 33Qama'le Jesús enaac:
—Nayi cha'li maliaĝa ami jouetauelo, qalaĝaja ja jayem 'te cop'a qom yenoĝodegue naa'me naajo' noloqo'ote, qama'le jec'ata ñe'me jo'ne jayem namaĝaquena. 34Chane'eja da'me ami jayem aueloyitaque qomle, qalaĝaja ja jayem 'te auañiya, qa'a ja auaqanachichi ta'le auajoyigui di'me jo'ne jec'ata qaedi jona'ña.
35Jogaa'me judiopi lajoĝola'te male mach'e nenatetapega't onolqa'tape, yenate'tape jogaa'me laqaya':
—¿Jach'e jogamaĝa yec'ata da'me jetaque ec, da'me qaedi ja jaqanatetaq ta'le yitaĝa jauanaĝa? ¿Qo'li ec qaedi yec'atalo jogaa'me judiopi jo'ne nelagaĝa, qama'le uetauelo jogaa'me jo'ne ja judiopi qaedi yapaĝague'n jogaa'me? 36¿Jach'e jogamaĝa yelo'teguet da'me dojo' jo'ne eetac: «Jayem aueloyitaque qomle qalaĝaja ja jayem 'te auañiya, qa'a ja auaqanachichi ta'le auajoyigui di'me jo'ne jec'ata qaedi jona'ña»?
Noĝop jo'ne 'natetayi 'me chiyaqayi da'me nec'alaĝa
37Jo'me nolo' jo'ne p'ategue 'me neualaĝayaĝaiqui, nach'ejo jo'ne yaguegue da'me ni'yoĝodenataguec, qama'le nach'ejo jo'me nolo' da'me Jesús nechachiñe da'me netenec joda'me lapaĝaguenataĝanaĝac, enaac:
—Ena'uaque jogaa'me jo'ne yelinqui'p, 'noota qom jayem nec'adeta, qaedi ñiyomaĝa'n. 38Qama'le ena'am da'me jo'ne 'yaĝate'tape jonaa'me nedii's, gaa'me jo'ne jayem p'iida'a, ga'me lai'li jogaa'me 'natetayi joga'me noĝop jo'ne chiyaqayi da'me nec'alaĝa.
39Qama'le ñe'me Jesús 'yaĝatema gaa'me jo'ne p'iida'a joñe'me da'me yacoteguet qomle ñe'me Dios Lepaqal, qalaĝaja ñe'me Dios Lepaqal maliaĝa jona'li 'uo, qa'a ñe'me Jesús maliaĝa ja yovita ga'me nolo' da'me ni'yoĝodenataguec.
Yodapecache naa'me lelnataĝaco jogaa'me jiyaĝadipi
40Uo'oe gaa'me jiyaĝa'u laqaya' jo'ne domachiyalo naa'me naajo' 'naqataqa qama'le enapega't:
—¡Jenjo' jiyaĝaua jo'ne yataqachiñe naqaena 'me jeuataqataque jo'ne 'laqataĝanaĝanec joñe'me Dios!
41Nataq'aen uo'oe jogaa'me laqaya' jo'ne eetapega't:
—¡Jenjo' jo'ne mach'e Dios Liquiyac!
Qama'le nach'e ena'am jogaa'me laqaya' enapega't:
—Jenjo' ja naqaena, qa'a ga'me jo'ne mach'e Dios Liquiyac ja chiyaqa'ña di'me Galilea. 42Qa'a naa'me nedii's 'yaĝatetac da'me joga'me Dios Liquiyac nach'ega jo'ne chiyoĝoguet di'me nejaliaĝanec David, nach'e ena'am da'me chiyoĝogue di'me noic 'me Belén jo'ne lañoqo' di'me David.
43Chane'eja male ua'a da'me yodapecache jonaa'me lelnataĝaco jogaa'me jiyaĝadipi queda'me yajouaĝat ñe'me Jesús. 44Qama'le uo'oe jogaa'me jetaque yauede'uo qaedi yecoñe't, qalaĝaja qaya'te ta'le onolec ga'me yaqanatet ta'le 'uo ga'me 'yetec.
Gaa'me najoĝola'te yoqolegue't ñe'me Jesús
45Gaa'me neteloqo't joga'me tamenaĝaiqui 'viyelaĝadeta ga'me ueteda'a jogaa'me fariseopi choqogaa'me lejaliaĝanaqa gaa'me tamenaĝaiqui lo'olpi qama'le ua'a ca'li da'me yenatetedapec:
—Queda'me ¿toqoch'e ja anaviquiquena joñe'me?
46Jogaa'me tamenaĝaiqui neteloqo't 'yadeteguet da'me nenatague'j:
—Qaya'te ta'le jiyaĝaua jo'ne ena'am da'me 'laqataĝanaĝac.
47Qama'le jogaa'me fariseopi enapega'ajalo:
—Nach'e ena'am da'me ami, ¿toqoch'e auoqochiya da'me noqovinaĝanaĝac? 48¿Qo'li 'uo jogamaĝa 'yamaqaten jonaa'me jo'ne mach'e qadajoĝola'te, uotaĝa naa'me fariseopi? 49Qalaĝaja jena'me jenjo' jiyaĝadipi, da'me ja yayate'n daa'me Dios lamaĝajoĝonaĝaco, qama'le 'uo da'me yedaĝatalegue ne'uaĝanague'j jo'ne ja no'en.
50Nicodemo, ñe'me fariseo jo'ne 'uo jo'me ua'a ca'li da'me yec'ata ñe'me Jesús, male enaac:
51—Da'me jo'ne mach'e eetac da'me dojo' Dios lamaĝajoĝonaĝac: ja jaqanatetaq ta'le je'uaĝanaq ga'me jiyaĝaua qom ja cha'li 'uaeñe da'me ñaquiaĝanaĝa, qaedi jayatenaq da'me eeta da'me yajouaĝat jo'ne 'lonatac.
52Qama'le jogaa'me male 'yadeteguet:
—¿Qo'li nach'e ena'am da'me am Galilea le'ec? Anapaĝaguenalo jonaa'me nedii's qama'le auayaten da'me ja chiyaqa'ña di'me Galilea ga'me Dios 'laqataĝanaĝanec.
53Qama'le ua'a ca'li da'me onolqa'tape yec'atapegalo jogaa'me 'lachaqa'te.
Currently Selected:
Jn 7: TSN
Highlight
Share
Copy
Want to have your highlights saved across all your devices? Sign up or sign in
Nuevo Testament Toba del Oeste © 2010 Sociedad Bíblica Argentina